Հայաստան-ԵՄ խորհրդարանական գործընկերության կոմիտեի համանախագահներ Արման Եղոյանի և Մարինա Կալյուրանդի համատեղ հայտարարությունը

Հայաստան-ԵՄ խորհրդարանական գործընկերության կոմիտեի համանախագահներ ՀՀ ԱԺ պատգամավոր Արման Եղոյանի և Եվրախորհրդարանի պատգամավոր Մարինա Կալյուրանդի համատեղ հայտարարությունը` ընդունված Հայաստան-ԵՄ խորհրդարանական գործընկերության կոմիտեի երկրորդ նիստի ընթացքում։
Երևան, 2022թ. փետրվարի 24

«Եվրոպական խորհրդարանը և Հայաստանի Հանրապետության Ազգային ժողովը 2022թ. փետրվարի 24-ին Երևանում անցկացրին Հայաստան-ԵՄ խորհրդարանական գործընկերության կոմիտեի (ԽԳԿ) երկրորդ նիստը՝ կարևորելով ԵՄ-Հայաստան հարաբերությունների խորացման ամուր հանձնառությունը.

Սա Համապարփակ և ընդլայնված գործընկերության համաձայնագրի (ՀԸԳՀ)՝ նախորդ տարվա մարտ ամսին ուժի մեջ մտնելուց ի վեր առաջին հանդիպումն էր և առիթ հանդիսացավ դրա կիրարկման ընթացքը դիտարկելու համար: Մենք ողջունում ենք արձանագրված առաջընթացը և քաջալերում Հայաստանի իշխանություններին շարունակել բարեփոխումների ուղին: Մենք նաև շեշտում ենք ԵՄ զգալի աջակցությունը, օրինակ՝ արդարադատության բարեփոխումների կարևոր ոլորտում:

Մենք ողջունում ենք այն փաստը, որ ԵՄ տնտեսական և ներդրումային ծրագիրը զգալիորեն կխթանի ներդրումները առանցքային ոլորտներում՝ ներառյալ ռազմավարական տեսանկյունից կարևոր միակցող նախագծերը և աջակցությունն առավել խոցելի շրջաններին, ինչպես նաև գնահատում ենք ԵՄ ջանքերը՝ օգնելու Հայաստանին հաղթահարել ՔՈՎԻԴ-19 համավարակի հետևանքները:

Վերջերս՝ նոյեմբերին, ստորագրված Ընդհանուր ավիացիոն գոտու մասին համաձայնագիրը կարևոր քայլ է, որից շոշափելիորեն կշահեն ինչպես ԵՄ, այնպես էլ Հայաստանի քաղաքացիները և բիզնեսները: Միակցվածության ընդլայնումը կօգնի խթանել մարդկանց միջև շփումներն ու թափ հաղորդել տնտեսական աճին:

Ի թիվս շոշափելի արդյունքների հասնելու այլ որոշակի քայլերի՝ մենք ողջունել ենք նաև «Հորիզոն Եվրոպա» հետազոտական և նորարարական ծրագրի շրջանակներում Հայաստանի ասոցացման կարգավիճակի վերաբերյալ վերջին համաձայնագիրը և Եվրոպոլի հետ ռազմավարական համագործակցության համաձայնագիրը:

Չնայած Լեռնային Ղարաբաղի երկրորդ պատերազմի և ՔՈՎԻԴ-19 համավարակի հետևանքով ստեղծված դժվարություններին՝ մենք արժևորում ենք, որ 2021 թվականի հունիսին կայացած արտահերթ խորհրդարանական ընտրությունները մրցակցային էին, ընդհանուր առմամբ լավ կազմակերպված և համապատասխանում էին ժողովրդավարության չափանիշներին: Արդյունքում, Հայաստանի կառավարությունը հստակ մանդատ ստացավ երկրում հետագա բարեփոխումներ իրականացնելու, կառավարումը բարելավելու, կոռուպցիայի դեմ պայքարելու և տնտեսությունն արդիականացնելու համար: Մենք շեշտել ենք քաղաքականության մեջ բևեռացումը նվազեցնելու անհրաժեշտությունը և կոչ ենք արել բոլոր քաղաքական ուժերին դրսևորել զսպվածություն: Մենք նաև կարևորել ենք, որ բոլոր բարեփոխումներն իրականացվեն իշխանությունների տարանջատման և օրենքի գերակայության սկզբունքներին համապատասխան, ինչպես նաև առաջարկել ենք սահմանադրաիրավական բոլոր հարցերի վերաբերյալ հայցել Վենետիկի հանձնաժողովի խորհրդատվական կարծիքը և հետևել դրան:

Մենք վերահաստատում ենք մեր անփոփոխ աջակցությունը Լեռնային Ղարաբաղի հակամարտության համապարփակ և խաղաղ կարգավորմանը, ինչպես նաև ԵԱՀԿ Մինսկի խմբի համանախագահության մանդատի ներքո իրականացվող գործընթացին՝ հիմնվելով ուժի չկիրառման, տարածքային ամբողջականության և ազգերի ինքնորոշման հավասար իրավունքների սկզբունքների վրա:

Մենք բարձր ենք գնահատում Եվրոպական խորհրդի նախագահի ներգրավվածությունը՝ աջակցելու վստահության մթնոլորտի ստեղծմանն ու ամրապնդմանը, այդ թվում՝ Հայաստանի և Ադրբեջանի պաշտպանության նախարարների միջև անմիջական հաղորդակցության ուղիներ ստեղծելու և ԵՄ միջնորդությամբ Ադրբեջանում պահվող հայ զինծառայողներին վերադարձնելու միջոցով: Մենք խրախուսում ենք ակտիվացնել ԵՄ-ի ներգրավվածությունը՝ լուծելու չլուծված այնպիսի կարևոր խնդիրներ, ինչպիսիք են մնացած բոլոր հայ ռազմագերիների և այլ պահվող անձանց վերադարձը, հակամարտության տարածքում մշակութային ժառանգության պաշտպանությունը, ինչպես նաև Լեռնային Ղարաբաղ մարդասիրական օգնության անարգել հասանելիությունը:

Մենք անընդունելի ենք համարում 2021թ. մայիսի 12-ին Ադրբեջանի զինված ուժերի ժամանակավոր մուտքը Հայաստանի տարածք, ինչը համարվում է Հայաստանի տարածքային ամբողջականության և միջազգային իրավունքի խախտում: Հայաստանի և Ադրբեջանի սահմանների սահմանազատման և սահմանագծման հետագա գործընթացն ունի էական նշանակություն: Միևնույն ժամանակ, կոչ ենք անում սահմանային գոտիներից դուրս բերել բոլոր զինված ուժերը և վերադառնալ մինչև 2021թգ մայիսի 12-ը առկա ելման դիրքեր՝ էսկալացիան կանխելու և տեղի բնակչության իրավունքները երաշխավորելու նպատակով:

2020 թվականի նոյեմբերի 9-ի և 2021 թվականի հունվարի 11-ի եռակողմ հայտարարությունների համաձայն՝ տարածաշրջանում հաղորդակցության ուղիների ապաշրջափակումը նշանակալի հնարավորություններ կստեղծի Հայաստանի և Հարավային Կովկասի ողջ տարածաշրջանի համար: Մենք աջակցում ենք այս նպատակին հասնելու Հայաստանի կառավարության հավակնություններին և խրախուսում ենք հետագա առաջընթացը: Մենք նաև մեծապես աջակցում ենք Թուրքիայի հետ հարաբերություններն առանց նախապայմանների կարգավորելուն ուղղված վերջերս գործադրված ջանքերին, քանի որ դրանց հաջողությունը կնպաստի տարածաշրջանի տնտեսական զարգացմանը և կայունությանը:

Մենք անհամբեր սպասում ենք մեր միջխորհրդարանական հարաբերությունների հետագա զարգացմանը և 2023թ. Բրյուսելում կամ Ստրասբուրգում կայանալիք Կոմիտեի 3-րդ նիստին»: