Հիմնանորոգվելու է Երերույքի տաճար տանող 2 կմ ճանապարհահատվածը

Գյումրի-Արմավիր միջպետական ճանապարհից մինչև Անիպեմզայի գյուղամեջ ճանապարհը շուրջ 4 կմ է, որի կես ճանապարհը հարում է Երերույքի տաճարին։ Պատմական շինություն հասնելու համար մոտավորապես 2 կմ պետք է անցնես քանդված, դարուփոս ճամփեքով։ Տեղի բնակիչների համար սա միակ ու ամենօրյա անցնելիք հատվածն է, տարին տարվա վրա քանդվող ճանապարհի վիճակը միայն թե անսովոր բան է տաճար այցելող զբոսաշրջիկների համար։

Միջպետական մայրուղուց դեպի Երերույքի տաճար շուրջ 2 կմ երկարության ճանապարհն այս տարի հիմնանորոգվելու է։ Ճանապարհաշինական ծրագրի պատվիրատուն է ՀՀ տարածքային կառավարման և ենթակառուցվածքների նախարարությունը։ Շինմրցույթի արդյունքները հայտնի են, նշում է Շիրակի  մարզպետարանի քաղաքաշինության վարչության պետ Խաչատուր Խնձրցյանը, այժմ ընթացքի մեջ են պայմանագրային գործընթացները։

«Մրցութային գործընթացն արդեն իսկ ավարտման փուլում է, պայմանագրի կնքման գործընթաց է իրականացվում, 307 մլն դրամի շրջանակներում կկատարվեն 2 կմ երկարությամբ ճանապարհի ամբողջությամբ հիմնանորոգման աշխատանքներ»,- ասել է քաղաքաշինության վարչության պետը։

Ճանապարհաշինարարին Անիպեմզայում սպասում են արդեն այս ամիս։ Մարզի զբոսաշրջային պահանջված ուղղություններից է Երերույքի տաճարը։ Ամբողջ տարին այցելուներ լինում են, բայց ամռան ընթացքում հոսքն ավելի է մեծանում։ Ենթակառուցվածքների հիմնանորոգումը նաև դրական ազդեցություն կունենա նախկին ավանի համար, ասում է Անիպեմզայի վարչական ղեկավար Հարություն Թառլանյանը․

«Երերույքի տաճարն ուզում են կապել գյուղի հետ, որպեսզի գյուղում էլ փոփոխություններ լինի դեպի լավը, գյուղն էլ բարեկարգվի»։

4-րդ դարի բազիլիկ կիսավեր տաճարը կառուցված է բազմաստիճան հարթակի վրա։ Նորոգումներ եղել են, ամրացման աշխատանքներ էլ են կատարվել։ 1928 և 1948 թվերին ձեռնարկվել են ամրացման-կոնսերվացման աշխատանքներ: 1958 թ. վերանորոգվել են հարավային և արևելյան հիմնաստիճանները: Իսկ 1964-65 թթ. վերսկսված վերանորոգման աշխատանքները մնացել են թերի, և մինչ այսօր նորոգման որևէ աշխատանք չի կատարվել:

Այս տարի հատկացված 765 հազար դրամով տաճարի որոշ հատվածների ամրակայման, Անիպեմզայի մշակույթի տան հիմնանորոգման և թանգարանային մաս կառուցելու փաստաթղթերն են կազմելու։

«Կկատարվի նախագծանախահաշվային փաստաթղթերի կազմման գործընթաց, կանցնի փորձաքննություն, կճշտվի ֆինանսական միջոցների հատկացման չափը և հետագայում նաև կիրականացվեն այդ աշխատանքները»,- ShantNews.am-ի հետ զրույցում նշել է Խաչատուր Խնձրցյանը։

Բնակավայրի վարչական ղեկավարն էլ նշում է, որ թանգարանի ստեղծումը գյուղին էլ է օգտակար․

«Մտահղացումը կա, ծրագիրը կա, որպեսզի ստեղծեն փոքր թանգարան, ինչ-որ թանգարանային նմուշներ կբերվեն։ Այնտեղ ներկայացված կլինի Անիպեմզայի պատմությունը, Երերույքի պատմությունը, որ տուրիստը գա, ծանոթանա»։

Թանգարանը լինելու է Անիպեմզայի մշակույթի տանը։ Գյուղովի սպասում են, որ զբոսաշրջիկները չեն սահմանափակվի միայն տաճար այցելելով։ Բնակավայրում նախատեսում են ստեղծել սպասարկման ծառայությունների այլ հնարավորություններ, որպեսզի զբոսաշրջիկը գա ու մի քանի օրով նաև մնա գյուղական բնակավայրում, որտեղ կենցաղի ու մշակույթի տարբեր սովորույթներ են պահպանվում։