Սկանդալային հայտարարություններ «Իգլայի» գործով

ՀՀ Վերաքննիչ դատարանում այսօր շարունակվել է ԼՂՀ ՊԲ նախկին հրամանատար Սամվել Բաբայանի, Սանասար Գաբրիելյանի և Արմեն Պողոսյանի գործով վերաքննիչ բողոքի քննությունը: Հիշեցնենք՝  Կենտրոն-Նորք Մարաշ վարչական շրջանների ընդհանուր իրավասության դատարանի դատավճռով նրանք մեղավոր են ճանաչվել Վրաստանից Հայաստան «Իգլա» տեսակի զենիթահրթիռայի համալիր տեղափոխելու համար: Բաբայանը դատապարտվել է 6, Սանասար Գաբրիելյանը՝ 3, իսկ Արմեն Պողոսյանը՝ 2.5 տարվա ազատազրկման:

Դատարանում այսօր վերջապես ցուցմունք է տվել «Իգլա» վաճառողը՝ այլ քրեական գործով մեղադրյալ, Էջմիածնի նախկին քաղաքապետի որդի Ռոբերտ Աղվանյանը: Բանն այն է, որ Առաջին ատյանի դատարանն այդպես էլ չլսեց  այդ վկային, քանի որ այն ժամանակ «Վոզդուխ» մականունով Ռոբերտ Աղվանյանը ձերբակալված էր և գտնվում էր Վրաստանի իրավապահների հսկողության տակ: Այժմ նրան արտահանձնել են  Հայաստանի իրավապահներին: Ըստ քրեական գործի նյութերի՝ նա է իրեղեն ապացույց ճանաչված «Իգլայի» խողովակը տվել Հրաչյա Մայիլյանին: Մայիլյանն էլ այն սկզբում պահել է իր հորեղբոր ավտոտնակում, հետո հանձնել ԱԱԾ-ին: 

Վրաստանից զենք չի բերվել

Ռոբերտ Աղվանյանն այսօր դատարանում սկանդալային հայտարարություններ է արել՝ ասելով, թե Վրաստանից ռազմամթերք չի բերվել Հայաստան, որ այն պատերազմի ժամանակ իր հայրն է ձեռք բերել, ինքն էլ այն փոխանցել է Հրաչյա Մայիլյանին:

«Վրաստանից զենիթահրթիռային համալիր Հայաստան չի բերվել: Եթե նման բան լիներ, Վրաստանն ինձ չէր արտահանձնի»,- ասել է Ռոբերտ Աղվանյանը՝ հավելելով, թե զենքը հայտնաբերել է տարիներ առաջ իր տունը վաճառելիս:

Պատմել է նաև, որ Արցախյան պատերազմի տարիներից մնացած «Իգլա»-ն ցանկացել է վաճառել և, որպեսզի թանկ գնով վաճառի, ստել է` ասելով, թե Վրաստանից է զենքը բերվել:  

 Դատավորի այն հարցին, թե չի՞ գիտակցել «այդ զինատեսակի բարձր վտանգավորությունը», Աղվանյանը պատասխանել է, թե «չի մտածել այդ մասին»:

«Մենակ գումար աշխատելու մասի՞ն էիք մտածում, պարտքեր ունեի՞ք»,- հարցրել է դատավորներից մեկը:

«Դա կարևո՞ր է, չէի աշխատում …»,- ասել է Աղվանյանը:

Աղվանյանը հայտարարել է նաև, որ ինքն ամբաստանյալներից որևէ մեկի հետ զենք ձեռք բերելու հարցով չի առնչվել, առնչվել է  միայն Հրաչյա Մայիլյանի հետ, ընդ  որում, զենքը, իր տեղեկություններով, եղել է ազգությամբ եզդի մեկի համար:

«Թուրքերի հերն անիծելու համար կարող էր պետք գալ»,- հայտարարել է Աղվանյանն ու նշել, որ զենքը Մայիլյանին հանձնելիս ինքն իմացել է, թե այն Հայաստանից դուրս է տարվելու, հակառակ դեպքում չէր տա:

Ըստ Աղվանյանի՝ ինքը մինչ օրս հնարավորություն չի ունեցել Հրաչյա Մայիլյանին ասելու, որ «Իգլայի» խողովակն իրականում Վրաստանից չի բերվել, այլ  իր տանն է  եղել: 

Ի՞նչ արժե «Իգլան»

«Իգլայի» խողովակի համար Հրաչյա Մայիլյանը Ռոբերտ Աղվանյանին պետք է վճարեր  25 հազար դոլար, որից 4 հազար դոլարը վճարել էր, իսկ գումարի մնացած մասը խոստացել էր վճարել ապրանքը վաճառելուց հետո:

Ի դեպ, քրեական գործում «Իգլայի» արժեքը նշված է 50 հազար դոլար: Փաստորեն, Աղվանյանի ցուցմունքը չի համընկնում գործի նյութերում եղած  տվյալներին:

Սամվել Բաբայանը, Սանասար Գաբրիելյանը և Արմեն Պողոսյանը Վերաքննիչ դատարանից  պահանջում են բեկանել առաջին ատյանի դատարանի դատավճիռը և արդարացնել իրենց:

Դատական հաջորդ նիստին պետական մեղադրողը և պաշտպանները կներկայացնեն իրենց ճառերը: