Շիրակի մարզի Քարաբերդ գյուղում  խմելու ջուր չկա․ խնդրի կարգավորմանը սպասում են սուբվենցիոն ծրագրով

Անի խոշորացված համայնքի Քարաբերդ գյուղում  խմելու ջուր չկ։ Ամիսներ առաջ էր նորից գյուղացիները բողոք արեցին, ջուրն օրերով չի հասնում բաժանորդներին, եղած ժամերին էլ ձեռքն ընկած ամաններում ջուր են կուտակում։

Բնակավայրն 260 տնտեսություն ունի, բոլորի համար ջրի գրաֆիկը նույն է՝ շաբաթը մեկ կամ երկու անգամ են ջուր ստանում, բայց գյուղի ամեն թաղամաս իր հերթն ունի, ներքին հատվածի բնակիչների բախտն այս հարցում բերել է, ծորակներից ջուր հասցնում են վերցնել, մինչև հասնում է բարձրադիր հատվածում գտնվող տներին, ջրի ժամն է ավարտվում, ստիպված տարաներով կրում են հարևան գյուղերից։

Ջրի գրաֆիկից բողոք քարաբերդցիները  ShantNews.am-ին պատմել են, որ մի քանի օրվա համար կուտակած ջուրը խնայողաբար են օգտագործում, որ բավականացնի մինչև մյուս գալը։

«3 օր մի մայլեն կտան, 2 օր մի մայլեն, կեղնի օր 4 օրը մեկ մարդիկ նոր ջուր կունենան, էն էլ՝ 2 ժամով։ Պատկերացրեք, եթե ներքևի տները երկու ժամ է հասնում, վերի տներին պիտի կես ժամ հասնի»։

«Բոչկաներ ունինք տեղադրած, կլցնենք մի տոննա, երկու տոննա, որ հերիքե մինչև մյուս գալը»։

«Մենք ունինք 40-50 հատ գառ, 10 հատ խոշոր եղջերավոր, ըդոնք սաղ ջուր գուզեն չէ՞»։

Քարաբերդին ջուր գալիս է Թալինից։ Բաժանորդները սպառած ջրի դիմաց վճարում են ոչ թե ջրաչափի ցուցիչով, այլ մեծածախ պայմաններով՝ խողովակի թողունակությամբ։ Գյուղի ներքին ցանցի խողովակները 5 տարի առաջ են փոխել, բոլոր տներում ջրագծերի միացումներ կատարվել են, բայց սպասարկումը մնացել է համայնքինը։ Իսկ օրվա ջրաբաշխիչ կայանը Լանջիկում է, որտեղից ջուրը բաշխվում է հարևան չորս բնակավայրերի միջև։ Չորսն էլ, համենայդեպս, բավարար քանակի ջուր չեն ունենում։ Խնդիրը սրվել է այն բանից հետո, երբ ջրային պաշարները նվազել են։

«Թալինից, որ ջուրը մեզ կտան, հիմնական գրաֆիկը օր ու մեջ է, ուղղակի չի հերիքում, որ մենք կարանանք գյուղին ամեն օր ջուր տանք», – ShantNews.am-ի հետ զրույցում նշել է Քարաբերդի վարչական ղեկավար Կոլյա Ասատրյանը։

Ներքին ցանցը նորացվել է, բայց օրվա ջրաբաշխիչ կայանից մինչ գյուղ հասնող մոտ 5 կմ երկարության խողովակները չեն փոխվել։ Թույլ ճնշումով ջուրը մաշված ջրագծերով գյուղ է հասնում մեծ կորուստներով, ինչն էլ խմելու ջուրը գյուղ չհասնելու հիմնական խնդիրն է։

«Ջրազուրկ տարի էր, բնական աղբյուրների ջրաքանակն էլ կրճատվեց, հետևաբար քիչ ջուր բաց թողնվեց և սկսվեց էս խնդիրը։ Ու ամենավատն էն է, որ գյուղն այնպիսի աշխարհագրական դիրքում է, որ այլ ջրային աղբյուրներ չունի»,- ShantNews.am-ի հետ զրույցում նշել է խոշորացված Անիի համայնքապետարանի առաջատար մասնագետ Կարեն Գրիգորյանը։

Քարաբերդի ջրի խնդիրը հրատապներից էր, այն ընդգրկվել է 2022-ի սուբվենցիոն ծրագրում, ըստ նախնական հայտի 55 մլն դրամ արժողության նախագիծ է այն։ Անիի համայնքապետարանում այժմ նախագծանախահաշվային փաստաթղթերն են պատրաստում։ Սուբվենցիոն ծրագրով համայնքի մասնակցությունը կազմելու է 40%, 60%-ն էլ կառավարությունն է համաֆինանսավորելու։ Համայնքի ներդրման հարցում ներդրողների հետ համագործակցելու տարբերակը ևս օրակարգում է։

«Փորձում ենք գտնել նաև այլ ներդրողներ, որպեսզի ծրագիրն ամբողջական ու լիարժեք այս տարի կատարվի։ Հակառակ պարագայում մենք ստիպված կլինենք փուլային տարբերակով լուծում գտնել։ Այսինքն, ծրագիրը ներկայացնենք անցողիկ 2022-23 թվականների մասով», – ասել է Կարեն Գրիգորյանը։

Մինչև ծրագրի վերջնական փաթեթը ներկայացնելը պետք է հստակեցրած լինի նաև համայնքային և այլ ֆինանսական ուղղություններով ներդրումների հարցը։ Ջրի խնդիրը նույն կերպ լուծում է ստանում հարևան Լանջիկ բնակավայրում։