«Վայնշտայնի էֆեկտ». որտե՞ղ է ավարտվում սիրահետումը և սկսվում սեռական ոտնձգությունը

«Վայնշտայնի էֆեկտ». ահա այսպիսի անվանում է ստացել հայտնի կամ ազդեցիկ տղամարդկանց սեռական ոտնձգություններում մեղադրելու համաշխարհային միտումը: Այս եզրույթը բնութագրում է 2017թ. հոկտեմբերից ԱՄՆ-ում սկսված, այնուհետև աշխարհի տարբեր երկրներում շարունակություն գտած բողոքի ալիքը, որը սկսվեց այն ժամանակ, երբ հանրահայտ կինոպրոդյուսեր Հարվի Վայնշտայնին մեղադրեցին սեռական ոտնձգությունների մեջ:

Դրան հաջորդեց #MeToo (Ես նույնպես) արշավը, որը բոլորին կոչ էր անում պատմել իրենց հետ տեղի ունեցած սեռական ոտնձգությունների մասին:

Սեքս սկանդալի կենտրոնում հայտնվեցին քաղաքական բազմաթիվ գործիչներ, դերասաններ, հասարակական և մշակութային գործիչներ: Շատերի համար դա անհետևանք չմնաց. ոմանց դեպքում մեղադրանքները վերջ դրեցին կարիերային, ոմանց դեպքում՝ կյանքին:

Նոյեմբերին ինքնասպանություն գործեց Մեծ Բրիտանիայի Լեյբորիստական կուսակցության անդամ, Ուելսի կառավարության նախարար Կառլ Սերջենտը, որին ինքնասպանությունից օրեր առաջ ազատել էին պաշտոնից՝ մեղադրելով սեռական ոտնձգությունների մեջ: Դեկտեմբերին կյանքին վերջ տվեց սեռական ոտնձգությունների մեջ մեղադրվող ԱՄՆ Հանրապետական կուսակցության Քենթուքի նահանգի ներկայացուցիչ Դեն Ջոնսոնը: Ինքնասպանությունից առաջ նա Ֆեյսբուքում գրառում էր կատարել՝ հերքելով իր հանդեպ հնչած մեղադրանքները:

Հարվի Վայնշտայնը հեռացվեց կինոակադեմիայից, հանրահայտ դերասան Քևին Սպեյսին, երգիծաբան Լուիս Սի Քեյը, ֆիլմարտադրող Բրետ Ռաթները հրաժեշտ տվեցին իրենց կարիերային: Ցանկը չսահմանափակվեց քաղաքական և կինոաշխարհի գործիչներով: Սակայն ինչպես ասում են՝ «մետաղադրամը երկու կողմ ունի», և որոշ դեպքերում դժվար է հստակ տարանջատում կատարել սեռական ոտնձգության և պարզապես հակառակ սեռի հանդեպ տղամարդկանց՝ մինչ այժմ բնական համարվող ուշադրության միջև:

Թերևս երևույթին հենց այս տեսանկյունից էին նայել ֆրանսիացի դերասանուհի Կատրին Դենյովը, գերմանացի դերասանուհի Ինգրիդ Քավենը և նրանց միացած շուրջ 100 հայտնի կանայք: Նրանք ֆրանսիական Le Monde թերթում բաց նամակ էին հրապարակել՝ դեմ արտահայտվելով տղամարդկանց հանդեպ տարածվող ատելության ակցիաներին:

Վերջին օրերին էլ մեծ աղմուկ է հանել Նոր Զելանդիայի վարչապետ Ջասինդա Արդերնի հետ հարցազրույցը: Հաղորդավար Չարլզ Վուլին մեծ քննադատության է արժանացել, իսկ նրա վարած հարցազրույցը անվանվել է «սեքսիստական». լրագրողը 37-ամյա վարչապետին հաճոյախոսություններ է արել՝ նրան անվանելով երիտասարդ, խելացի և հմայիչ:

Սյուզաննա Չրաղյան