Հայաստանը՝ գիտական, մշակութային, մարզական միջոցառումների կենտրոն. Ադրբեջանն էլ փորձում է գցել մեր վարկանիշը

Հայաստանն այս տարի հյուրընկալեց մի քանի խոշոր իրադարձություն: Մոտ երկու շաբաթ առաջ ավարտվեց Սթարմուս փառատոնը, իսկ այս օրերին Հայաստանում տեղի է ունենում Բռնցքամարտի միջազգային ֆեդերացիայի արտահերթ կոնգրեսը: Ընդհանրապես, որոնք են դրանց կարևորությունն ու արդյունքները Հայաստանը աշխարհին առավել ճանաչելի դարձնելու և այլ նպատակներ իրագործելու համար: Ակնհայտ է, որ Ադրբեջանը Հայաստանին թիրախավորում է նաև հենց այս պատճառով: Այս հարցերի շուրջ հեռուստահաղորդավար Քրիստինե Ալագուլյանը «Հեռանկարի» տաղավարում զրուցել է ՀՀ վարչապետի աշխատակազմի ղեկավար Արայիկ Հարությունյանի հետ:

«Միանշանակ այդ եզրահանգմանը կարող ենք գալ: Դուք գիտեք, որ ՀՀ-ը սկսած 2021թ.-ից՝ քովիդից, պատերազմից հետո, այդ ծանր արհավիրքներից հետո, որոնք պատուհասեցին Հայաստանին, տնտեսական լուրջ առաջընթաց է ապրում, և նույնիսկ միջազգային փորձագետները, այսպես զարմանքով են վերաբերում այդ առաջընթացին և տնտեսական աճին, որովհետև պատմական փորձն է ցույց տալիս, որ պատերազմից հետո, նաև համավարակներից հետո, տնտեսությունը շատ դժվար է զարգանում, և Հայաստանը տարբերվում է այդ իրավիճակներից: 2021թ.-ին մենք բարձր տնտեսական աճ արձանագրեցինք, առավել ևս հիմա, երբ որ գոնե վերջին 3 ամիսներին Հայաստանի տնտեսական ակտիվ ցուցանիշը 18-20 տոկոս է, ինչը շատ բարձր ցուցանիշ է զարգացող, զարգացած երկրների համար:

Եվ միանշանակ եմ համարում, որ Ադրբեջանը նաև այս պատճառով է թիրախավորում Հայաստանը՝ փորձելով նաև այսպես միջազգային վարկանիշը գցել Հայաստանի, որովհետև գոնե այս տարի Հայաստանը շատ մշակութային, գիտական, մարզական միջոցառումների կենտրոն է դարձել և դա անում է լավագույն կերպով: Կարծում եմ՝ սա է պատճառներից մեկը, որ փորձել  ստեղծել Հայաստանի շուրջ, որ անկայունություն կա, փորձել վանել մեր միջազգային գործընկերներից, համագործակցությունից, Հայաստանը նման կենտրոն պատկերացնելուց, բայց կարծում եմ նաև մեր յուրաքանչյուրի գործը պետք է լիներ քրտնաջան աշխատել յուրաքանչյուրս մեր ուղղությամբ․ քաղաքական ղեկավարությունը միանշանակ արտաքին վտանգների չեզոքության ուղղությամբ աշխատանք է տանում, բայց յուրաքանչյուր պաշտոնյա, յուրաքանչյուր մարդ, գործարար իր տեղում պետք է իր աշխատանքն անի, որովհետև նաև այդ աշխատանքի արդյունքում է, որ մենք պետք է ուժեղացնենք տնտեսությունը, հետևաբար, գումարներ կուտակենք, նաև դրանք ուղղենք անվտանգությանը, որ այսպիսի մարտահրավերները կարողանանք միասին հաղթահարել»,- ասաց ՀՀ վարչապետի աշխատակազմի ղեկավար Արայիկ Հարությունյանը:

Սա, ըստ էության, բռնցքամարտին առնչվող երկրորդ կարևոր միջոցառումն է, որ տեղի է ունենում Հայաստանում: Հարությունյանը խոսեց այն մասին, թե ինչպես Հայաստանը դարձավ նախ բռնցքամարտի Եվրոպայի առաջնությունը, ապա նաև այս կոնգրեսը անցկացնելու վայր:

Մանրամասները՝ ամբողջական հարցազրույցում: