«Սուրբ Հարության խորհրդով». Գյումրիում բացվել է ՀՀ վաստակավոր նկարիչ Սամվել Լաճիկյանի ցուցահանդեսը

«Սուրբ Հարության խորհրդով»․ այս խորագրով Գյումրիի  Մարիամ և Երանուհի Ասլամազյան քույրերի պատկերասրահում բացվել է ՀՀ վաստակավոր նկարիչ Սամվել Լաճիկյանի կտավների ցուցահանդեսը։ Զատկական ամենասիրուն տոնին ընդառաջ վաստակավոր նկարիչը իր ստեղծագործական ինքնատիպ, գունեղ ներկապնակն է բացահայտում՝ թեմաների բովանդակային և անկրկնելի շարքով։ Մեծ Պահքի այս օրերին Աստվածաշնչյան և հոգևոր թեմաներով ստեղծագործությունների ընտրանին է, ինչպես նաև իր հարազատ քաղաքի տեսարանները։ Սամվել Լաճիկյանն իր «Սուրբ Հարության խորհրդով» խորագրի ներքո գեղարվեստական ուղերձն է հղում աշխարհին՝ փոխանցելով ոչ միայն Բարձրյալի հրաշափառ Հարության, այլև մեր ժողովրդի Վերածնության ավետիսը։

Սամվել Լաճիկյանի նկարները ստեղծվել են տարբեր տարիներին՝ 1995-ից մինչև օրս, նրա ստեղծագործությունները հիմնականում ծնվել են այն ժամանակ, երբ հեռու է եղել հայրենիքից, ընկերներից, ընտանիքից։

«Նոր էի մեկնել Միացյալ Նահանգներ, և հայրենիքից թեկուզ ժամանակավորապես հեռանալու և բոլորովին նոր աշխարհում հայտնվելու հանգամանքը մղեց ինձ նորովի անդրադառնալու մեր հոգևոր հավատի հիմքերին ու վերապրելու առեղծվածին։ Պարզապես հոգևոր հանգստության պահ էր ու էս նկարները նկարեցի և Խորհրդավոր ընթրիքով ավարտեցի էդ շրջանը։ Հետո անցա ուրիշ այլ աշխատանքների։ Հիմա էս նկարների մեջ էլ, եթե նայեք հոգևոր շրջանի նկարները կան՝ տարբեր են 2009թ․-ին նկարած, 2011-ին, էս թեմային անդրադարձա նաև 2021-2022 թթ․-ին, երբ արդեն Հայաստանաում էի, բայց այստեղ պատերազմական իրավիճակ էր, բազմաթիվ զոհեր, մի խոսքով՝ էլի ծանր հոգեվիճակ էր ու նորից անդրադարձա էս թեմային»,- ասում է ՀՀ վաստակավոր նկարիչ Սամվել Լաճիկյանը։

Վերջին շրջանում Գյումրիում ցուցահանդեսները հաճախակի են, ինչը արվեստագետները կարևոր են համարում՝ նշելով, որ ծանր իրավիճակնորում փրկությունը արվեստն  է։

«Ամեն մի կտավից գույների ներդաշնակություն և բարություն է ծորում, որովհետև այն կապված է հոգևոր սննդի հետ, և նայելով նրա այս կտավները, մարդ իր մեջ չարությունը կարծես կթոթափի և միայն բարությամբ կհամակերպվի։ Իսկ նկարչի համար իր ասելիքը այդպես տեղ հասցնելը ամենամեծ պարգևն է հա՛մ իր համար, հա՛մ ժողովրդի։ Մարդիկ կարող են նայել և զգալ այն, ինչը ինքը ցանկացել է արտահայտել»,- ասում է գյումրեցի քանդակագործ Արտուշ Պապոյանը։

«Ես նոր ասում էի ՝Հիսուսի նկարի վրա այնքան է չարչարվել, որքան Հիսուսը ինքը չի չարչարվել, այսինքն՝ մեծ սիրով և հոգով է արել։ Երևի հոգևոր պահանջ է ունեցել, որովհետև սրբապատկեր նկարելը հենց այնպես չէ, դա քո ներսից պիտի գա, այդ պահանջը քո ներսից պիտի գա, դու հենց այնպես չես կարող վերցնել և սրբապատկեր նկարել։ Ես ինքս էլ ունեմ այդպիսի մի նկարաշարք, որ կոչվում է «Ավետումից՝ Համբարձում»․ դա էլ ես արել եմ կյանքիս մի պահին, երբ ունեցել եմ հոգևոր դժվարություններ»,- ասում է ՀՀ մշակույթի վաստակավոր գործիչ, գեղանկարչուհի Սուսաննա Մկրտչյանը։

Սամվել Լաճիկյանը Գյումրիում պատրաստվում է բացել ևս ցուցահանդեսը, որտեղ ներկայացնելու իր  հայկական գորգերի շարքը, որտեղ նկարիչը գորգերը կերպարային է դարձրել։ Գորգաշարում իր ուրույն տեղը կունենա Գյումրիի Տիրամայրը։