Պետք է ունենալ արտահանմանը միտված տնտեսություն․ Նիկոլ Փաշինյան

Կառավարության համար տնտեսական առաջընթացի կարևոր մաս է փորձարարական ճյուղը։ Ֆեյսբուքյան ուղիղ եթերի ժամանակ ՀՀ վարչապետ Նիկոլ Փաշինյանը նշեց, որ տնտեսական առաջընթացի մասին կառուցվածքում պետք է միշտ ուղերձ հղել, որ բաց են նոր գաղափարների համար։ Նա նաև ներկայացրեց, թե որոնք կարող են լինել փորձարարական ճյուղերը։ Փաշինյանն ընդգծեց՝  աշխարհում զարգանում են բիոտեխնոլոգիաները, և մեր շատ հայրենակիցներ այս ոլորտում լուրջ ներգրավվածություն ունեն։

«Հույս ունենք քաջալերել, որ իրենք իրենց ընկերությունների դուստր ձեռնարկությունները բացեն այստեղ։ Այդպիսին կարող է լինել դեղագործության ոլորտը։ Այս սեգմենտը առաջարկությունների բաց սեգմենտ է, Կառավարությունը սրանով ուղերձ է հղում, որ պատրաստ է նոր գաղափարներ քննարկել, ներդրումային միջավայրերում նոր գաղափարների համար որոշակի պայմաններ ստեղծել»,- ասաց նա։

Վարչապետը խոսեց նաև ադամանդագործության և ոսկերչության ոլորտների մասին, նշեց՝ ժամանակին ադամանդագործությունը բավական զարգացած էր Հայաստանում, բայց, ցավոք, դրամի փոխարժեքի բարձրացման, նաև ադամանդի շուկայում ազատականացման պրոցեսի հետևանքով այդ ոլորտը Հայաստանում, ըստ էության, կանգ առավ։ Փաշինյանը նշեց, որ կառավարությունը շատ կարևորում է այս ոլորտի զարգացումը Հայաստանում, ասաց՝ կան ընկերություններ, որ աշխատում են այդ ուղղությամբ, և հուսով է՝ հաջողություն կունենան, կառավարությունը նրանց կաջակցի։

Փաշինյանի խոսքով՝ կարևոր է ապրանքների տուրիստական արտահանումը։ Նա նշեց՝ ցանկացած երկրում, ուր գալիս են զբոսնելու, ընդունված է տարբեր իրեր գնել՝ որպես զբոսաշրջային տուրի մի մասնիկ։ Վարչապետի կարծիքով՝ Հայաստանում դա կարող է ոսկեգործության ոլորտի զարգացման խթան լինել։ Փաշինյանը խոսեց նաև թեթև արդյունաբերական ապրանքներից, Հայաստանում կոշիկի ու հագուստի արտադրությունից։ Նա ասաց, որ կոշիկի արտադրությունը Հայաստանում լուրջ ավանդույթներ է ունեցել, հիմա որոշակի աշխուժացում կա ոլորտում, նաև տեքստիլի արտադրության մեջ, նշեց, որ նաև ներդրումային հետաքրքրություն կա՝ նոր արտադրություն սկսելու համար։ Վարչապետը տեղեկացրեց՝ այսօր արդեն հաջող արտադրություն կա, և պետք է կարողանան աջակցել ոլորտին՝ արտաքին շուկաներ դուրս գալու համար։

«Շատ կարևոր է, որ ոլորտում ներգրավված մարդիկ ուղերձ ստանան, որ կառավարությունն աջակցում է նրանց։ Կարևոր է արձանագրել, որ պետք է ունենալ արտահանմանը միտված տնտեսություն։ Մեր շուկան շատ փոքր է ցավոք: Մենք չենք կարող հույս ունենալ, որ մեր շուկայի վրա հաշվարկված տնտեսությամբ կարող ենք աշխատատեղեր ստեղծել, բարձր աշխատավարձեր ապահովել, դրա համար մեր տնտեսությունը պետք է լինի միտված արտահանմանը»,- նշեց նա։