Հողերը պետք է խոշորացնել՝ պահպանելով սեփականության իրավունքը. գյուղնախարար

ՀՀ գյուղատնտեսության նախարար Արթուր Խաչատրյանը պաշտոնավարման 100 օրն ամփոփելիս նշեց ոլորտում առանձնացված հիմնական առաջնահերթությունները, այն է՝ աջակցություն փոքր և միջին գյուղացիական տնտեսություններին: Նախարարը հստակ և աներկբա հայտարարեց՝ խոսքը գյուղացուն տրամադրվելիք սոցաջակցության մասին չէ, այն է՝ մի բան տալ, որ պրոբլեմներ չլինեն: Նա ասաց, որ ոլորտում իրենց վարած քաղաքականությունը միտված է լինելու սոցիալական գյուղատնտեսությունից եկամտաբեր գյուղատնտեսության անցմանը, արդյունավետության ու եկամտաբերության բարձրացմանը:

«Եթե դա անգամ չբերի գների էական անկման, գոնե կհանգեցնի գյուղատնտեսությամբ զբաղվելու եկամտաբերության բարձրացմանը, ինչն, ի վերջո, գյուղնախարարության հիմնական գործառույթն է»,- ասաց նա:

Խաչատրյանը հիշեցրեց՝ հունիսին կաթի մթերման շուկայում խնդիրներ առաջացան, իսկ նման խնդիրներ միշտ էին առաջանում, սակայն դիտարկումները ցույց են տալիս, որ վերջին մի քանի տարիներին գները նույն մակարդակի էին, այս տարի, սակայն, գնանկումը էական էր՝ եթե ձմռանը նվազագույնը 185 դրամով էր մթերվում, ամռանն այդ գինը հասավ 130 – 150 դրամի:

«Եթե հաշվի առնենք, որ գլխաքանակը քիչ է, արդյունավետությունը ցածր, մարդկանց հիմնական եկամուտը գալիս է կաթից, եթե գլխաքանակը շատ լինի, կաթնատվությունը բարձրանա, նույնիսկ, եթե մթերման գները չբարձրանան, ապա անասնապահությամբ զբաղվելու եկամտաբերությունը կարող է բավական բարձր լինել»,- նշեց նախարարը:

Նախարարի խոսքով՝ փոքր հողատարածքները «սուբօպտիմալ» են. կողք կողքի գտնվող հողատարածքներում աճեցնում են տարբեր մշակաբույսեր, կա շախմատի նման մի բան՝ ցորեն, վարունգ, դեռ խորհրդային շրջանից մնացած ծիրան, խաղող և այլն: Դրանով, ըստ նախարարի, այդ մեծ հողակտորի արդյունավետությունը նվազում է, նաև ոռոգման պահանջներն են տարբեր, գյուղտեխնիկայի պահանջները, գյուղացիների մի մասը վնասատուների դեմ պայքար իրականացնում է, մի մասը՝ ոչ:

«Բարդ է խնդիրը, այստեղ կարևոր է հողերի խոշորացումը՝ իհարկե, պահպանելով սեփականության իրավունքը, դրա մասին խոսք չի կարող լինել, ուղղակի անհրաժեշտ է, որ հողատերերը միավորվեն, որ բարձրանա այդ ընդհանուր հողակտորի արդյունավետությունը: Մենք շուտով ոռոգելի գյուղատնտեսության հետ կապված ծրագիր ենք սկսելու՝ եթե գյուղացիները միանան, հողերը խոշորացնեն, մենք կապահովենք ոռոգման կաթիլային ցանցով. կաթիլային նոր համակարգերի գրավչությունը միայն այն չէ, որ օգտագործվող ջրի ծավալն է պակասում, այլև ավելանում է բերքատվությունը, բարձրանում է բերքի որակը, ջուրը գնում է բույսին, ոչ թե կողքի մոլախոտին, պարարտացումը լինում է շատ ավելի արդյունավետ»,- ասաց Խաչատրյանը:

Նախարարն ասաց, որ դա հնարավորություն կտա վերականգնել ցանքսաշրջանառությունը, այն է՝ ինչ բերք պետք է ցանվի այդ վարելահողի վրա և ինչ հերթականությամբ, որովհետև եթե անընդհատ նույն հողակտորը նույն բերքի տակ է, հողը մաշվում է, քայքայվում, արդյունավետությունը նվազում է: