Խորհրդատվական ծառայությունները պետք է նաև նախաձեռնողական գործառույթ ունենան. գյուղնախարար

ՀՀ գյուղատնտեսության նախարար Արթուր Խաչատրյանը պաշտոնավարման 100 օրն ամփոփելով՝ ոլորտի զարգացմանը միտված երեք կարևոր գործիք առանձնացրեց: Դրանցից առաջինը սուբսիդավորումն է: Նախարարի խոսքով՝ մինչ օրս օգտագործվող սուբսիդավորման քաղաքականությունը երկու ուղղությամբ է գնացել, առաջինը հումքի սուբսիդավորումն է, երբ գյուղացիներին սուբսիդավորված գներով տալիս էին կալիումական, ֆոսֆորական, ազոտական պարարտանյութ, սերմացու, նաև դիզվառելիք, հիմա, սակայն, մի փոքր այլ մոտեցման են ուզում գնալ, գումարը տրամադրվում է վերջնական սպառողին, ինքն է որոշում կայացնում՝ ումից ինչ սերմացու գնի, ումից վառելանյութ կամ պարարտանյութ գնի: Խաչատրյանը նշեց, որ կա նաև մեկ այլ մոտեցում, այն է՝ տոկոսադրույքի սուբսիդավորում, որտեղ բազմաթիվ ծրագրեր ունեն, ենթադրենք՝ գյուղատնտեսական մեքենաների լիզինգի ծրագիրը, որով 2 տոկոսով սուբսիդավորում էր պետությունը, վերջնական սպառողի վրա ավելի էժան էր նստում, և նա ձեռք էր բերում այդ մեքենաները:

«Մյուս մոտեցումը, որ կուզեինք օգտագործել, նաև կապիտալի սուբսիդավորումն էր լինելու. տոհմային կենդանիների ներկրումը խրախուսող ծրագիր ենք ներկայացրել, տոհմային կազմն էլ բավական բարեփոխման կարիք ունի, եթե նայենք՝ Հայաստանում կովի միջին տարեկան կաթնատվությունը և համաշխարհային ցուցանիշները՝ կտեսնենք, որ էական աճ ունենք, գենետիկան թույլ չի տալիս ավելի շատ կաթ կթել, իհարկե, նաև սխալ են կերակրում, սակայն որքան էլ ավել կերակրես, կաթնատվությունը ավել չի լինի: Հիմա այս մեխանիզմն ենք առաջարկել, երբ ներկրողը որոշակի սուբսիդիա է ստանում, վերահսկողական գործառույթ էլ պետք է լինի, որ կարուսելի մեխանիզմը չգործի՝ կենդանին չներկրվի, սուբսիդիան ստանան ու հանեն»,- ասաց նա:

Նախարարը խոսեց նաև խորհրդատվական ծառայությունների մասին, նշեց՝ այն խորհրդատվությունը, որ տրամադրում են, այնքան էլ արդյունավետ չէ, ուստի հստակ հանձնարարական կա՝ մշակել նոր հայեցակարգ: Խաչատրյանի գնահատմամբ՝ այդ ծառայությունները պետք է լինեն շտապօգնություն, որ գյուղացին երբ ունենա խնդիր, միանգամից գնա այս կազմակերպություն, հասկանա՝ խնդիրը որն է և ինչ պետք է անել, բայց, ըստ նախարարի, այդ ծառայությունները արձագանքողականից բացի նախաձեռնողական գործառույթ պետք է ունենան, իրենք առաջինը գնան ասեն՝ այստեղ որ ցանում ես կաղամբ, պետք է աճի նաև բրոկոլի, կաղամբից քո եկամտաբերությունը 1 պայմանական միավոր է, բրոկոլիից կլինի 3: Խաչատրյանը նշեց՝ նոր մշակաբույսերից մարդկանց մոտ վախ կա, սակայն պետք է ցույց տալ, աջակցել:

Խաչատրյանը կարևորեց «դեմոնստրացիոն» դաշտերի, ֆերմաների ստեղծումը, որ մարդիկ իրենց աչքերով տեսնեն՝ նոր տեխնոլոգիաների օգատգործմամբ ինչ արդյունքի կարող են հասնել: Երրորդ գործիքն, ըստ նախարարի, հիմնական միջոցների կամ ենթակառուցվածքների ստեղծումն է: