Հոռոմի եկեղեցին վերակառուցվում է

Արթիկի տարածաշրջանի Հոռոմ գյուղի եկեղեցին վերակառուցվում է: Սուրբ Հռիփսիմեն Հայաստանում ամենամեծ բազիլիկ եկեղեցիներից մեկն է ու առանձնանում է իր ճարտարապետությամբ: Ըստ այդմ էլ որոշվել է գյուղի համար ոչ թե նոր եկեղեցի կառուցել, ինչն ավելի արագ ու էժան կլիներ, այլ հինը վերականգնել նախկին տեսքով: Վերականգնումը փուլային է լինելու: Առաջին փուլի համար հատկացված ֆինանսավորմամբ վերականգնման նախագիծ է կազմվել, սկսվել է եկեղեցու ամրացումը:

Շինարարներն ամրացնում են Հոռոմի եռակամար բազիլիկ եկեղեցու պատերը: Նոր ամրաններ են տեղադրում, դրանք հատուկ ցանցով են պատելու: Սա պատերին լրացուցիչ ամրություն է հաղորդելու, նաև հիմքերի սեյսմակայունությունն են ստուգում: Շինարարների նախնական եզակացությունն այն է, որ  եկեղեցու հիմքերը լավ են պահպանվել: Պատերից սվաղի շերտն են հեռացրել, որի տակ խորհրդային տարիներին թաքցրել են զարդանախշ խաչերը: Իսկ ապամոնտաժված հատվածների քարերը համարակալել են: Դրանք հետո նույն տեղում են տեղադրելու:

Իսկ թե որքան հին է եկեղեցին, ստույգ տվյալներ չկան: Եկեղեցու պատին գտնվող արձանագրության մեջ հիշատակություն կա 1861 թվականի մասին: Բայց նշված չէ, թե այդ տարեթիվը վերաբերում է եկեղեցու կառուցմա՞նը, թե՞ վերակառուցմանը: Ճարտարապետությամբ ու եկեղեցու մասին պահպանված պատմություններով՝ գյուղացիներն այն շատ ավելի հին են համարում:

Հոռոմի եկեղեցու ճարտարապետական առանձնահատկությունները վկայում են շատ ավելի վաղ ժամանակաշրջանի կառուցման մասին: Եկեղեցու հոգևորականների համար կառուցված սենյակը դրա օրինակներից է: Եկեղեցաշինական առանձնահատկություններից մեկն էլ կավե կճուճներն են: Հոռոմի եկեղեցու պատերի մեջ ու տանիքին բազմաթիվ ու տարբեր չափսերի կավե անոթներ են տեղադրված: Ինչ նպատակով են եկեղեցաշինության մեջ օգտագործվել կճուճները, այստեղ երկու վարկած կա:

«Կճուճը կլանում է ձայնը, բուֆերիզացիայի ենթարկում և ավելի հզորացված մատուցում ունկնդիրներին: Կճուճները կարող են ապահովել ձայնային ելևէջների հնչունակությունը, ինչպես նաև ապահովել ջերմամեկուսացում: Շատ կարևոր է, թե պատի որ հատվածում է գտնվում կճուճը»,- SHANTNEWS -ի հետ զրույցում նշել է Հայ Առաքելական եկեղեցու Արթիկի թեմի Հոռոմի հոգևոր հովիվ Տեր Վիգեն քահանա Ղազարյանը:

Այն կճուճները, որոնք պահպանված են, շինարարները հանել են, նախագծով դրանք նորից նույն տեղերում են տեղադրվելու: Կճուճների վերատեղադրումը նախատեսված է եկեղեցու վերականգնման երրորդ փուլով: Մշակույթի նախարարության և հրատապ խնդիրների լուծման ծրագրով անցած տարի հատկացրած գումարներն առայժմ միայն ամրացման համար են բավականացնում:

«Լրիվ ֆինանսավորում այս պահին չկա, ներկա պահին մոտ 25 մլն դրամի աշխատանքներ են ընթանում: Այս գումարի մեջ է մտնում նաև նախագծի կազմումը: Ընթացքում Մշակույթի նախարարության և բարերարների  օգնությամբ կփորձենք եկեղեցու վերականգնումն ավարտին հասցնել»,- ասել է Հոռոմի գյուղապետ Աշոտ Պասկևիչյանը:

Մեկնարկն ապահովում է նաև շարունակականությունը: Համենայնդեպս, այսպես են Մշակույթի նախարարությունում պատասխանել եկեղեցու շինարարության հետագա ֆինանսավորման հարցին: Գյուղում նաև հանգանակություններ են սկսել: