Ձայնագրությունից պարզ է դարձել, որ դատավորն իր անելիքները նախապես համաձայնեցրել է ԱԱԾ տնօրենի հետ. Քոչարյանի պաշտպան

ՀՀ երկրորդ նախագահ Ռոբերտ Քոչարյանի փաստաբաններն այսօր ելույթ են ունեցել՝ կապված ԱԱԾ և ՀՔԾ պետերի հեռախոսազրույցի ձայնագրության հետ:

«Ռոբերտ Քոչարյանի փաստաբանների կողմից մանրակրկիտ ուսումնասիրվել է պարունակող նյութը և այդ նյութին առնչություն ունեցող մեկնաբանությունները բարձրաստիճան անձանց կողմից: Կատարված ուսումնասիրությունները մեզ այժմ հիմք են տալիս պնդելու, որ քրեական գործի քննության շրջանակներում Ռոբերտ Քոչարյանի կալանավորման ընթացքում ոտնահարվել են նրա իրավունքները, որից ելնելով՝ Ռոբերտ Քոչարյանի պաշտպաններն անհրաժեշտ են համարում արձանագրել հետևյալ իրողությունները. ՀՀ ԱԱԾ և ՀՔԾ պետի հեռախոսազրույցի վերաբերյալ նրանց կողմից տրված ասուլիսի բովանդակությունից հստակ երևում է, որ այդ ձայնագրության բովանդակությունն ամբողջությամբ իրական է: Այսինքն՝ կեղծված կամ մոնտաժված չէ: Խոսակցությունների բովանդակությունից պարզ է դառնում, որ կալանավորման հարցը քննող առաջին ատյանի դատավորը նախապես իր անելիքները համաձայնեցրել է ԱԱԾ տնօրենի հետ: Այս մասին է վկայում ԱԱԾ տնօրենի հետևյալ արտահայտությունը. «Ինձ դատավորը զանգեց, դե մի քիչ վախեցած է, ասացի մի հատ նայի սաղ գործը»,- ասել է փաստաբան Հայկ Ալումյանը:

Նա նշել է, որ ԱԱԾ տնօրենի արհամարհական վերաբերմունքն առաջին ատյանի դատավորի հանդեպ դրսևորվել է հետևյալ նախադասության մեջ.

«Մի խոսքով՝ դատավորը, ով որ պիտի կալանքը տա, դրան ասել եմ ՝ դուխո՛վ»: Դատավորն էլ իր հերթին ասել է. «Բա մի հատ հիմքերը նայեմ, պարո՛ն Վանեցյան, զանգեմ զեկուցեմ»»:

«Խոսակցությունների բովանդակությունից նաև պարզ է դառնում, որ ՀՀ ԱԱԾ տնօրենն անձի կալանավորման վերաբերյալ ուղղակի ցուցում է տվել առաջին ատյանի դատավորին: Այդ մասին է վկայում Արթուր Վանեցյանի հետևյալ արտահայտությունը. «Ասի նայի հիմքերը, կզանգես, բայց կալանքը ուզես, չուզես, պիտի տաս»: Ուշադրության է արժանի նաև խոսակցության հետևյալ հատվածը. «Գնա՛ վարչապետի հետ խոսա, որովհետև ես խնդրել եմ, որ տանեն կալանքի»:  Ասվածից երևում է, որ վարչապետն ուղղակիորեն մասնակցել է այս հարցի քննարկմանը: Պարզ է դառնում, որ կալանավորումը կիրառվում է ոչ թե օրինական նպատակով՝ անձի փախուստ կամ հանցանք կատարելը կանխելու համար, այլ այն նպատակով, որպեսզի անձին ստիպել ցուցմունք տալ կամ ինքն իր կամ այլ գործող անձի դեմ, այդ մասին է վկայում ՀՔԾ պետի հետևյալ արտահայտությունը. «Հա՛, հա՛, ընկե՛ր, էս կալանքը, որ տանք, տան նորմալ սաղ կսկսեն գրել, ընկե՛ր»,- ասել է փաստաբան Հայկ Ալումյանը:

Փաստաբանի խոսքերով՝ վարչապետի ելույթով հաստատվում են փաստեր, որոնցից երևում է, որ դատավորը նախքան որոշումը կայացնելն իր գործողությունները համաձայնեցրել է քրեական մարմինների ղեկավարների հետ:

«Նախքան կալանավորման որոշում կայացնելը, առաջին ատյանի դատավորը զգուշացրած է եղել  քրեական մարմինների ղեկավարներին և վերջիններիս միջոցով վարչապետին, որ քրեական գործը հիմնավոր չէ: Նույնիսկ առաջին ատյանի դատավորը համոզված է եղել, որ մեղադրանքը հիմնավոր չէ, որին ի պատասխան լսել է, որ կալանքը ուզի-չուզի, պիտի տա: Ռոբերտ Քոչարյանի նկատմամբ իրականացվում է ոչ օրինական քրեական հետապնդում, իսկ ՀՀ երկրորդ նախագահի  իրավունքները խախտվել են Մարդու իրավունքների և հիմնարար ազատությունների կոնվենցիայի մի շարք հոդվածներով: Հաստատվել են մեր մտավախությունները սույն գործընթացի ելքը նախապես կանխորոշելու վերաբերյալ: Հանրության մեջ սերմանվում է այն մոտեցումը, որ կան անձինք, ում իրավունքները կարելի է խախտել, իսկ նման անձանց պաշտպանելու գործողությունները դիտարկվում են որպես դավաճանություն, դիվերսիա: Այդ անձինք պիտակավորվում են որպես «սևեր», և նրանց շուրջ ձևավորվում է անհանդուրժողականության մթնոլորտ: Փորձ է արվում ճնշում կատարել դատավորների վրա, իսկ օրինական դատավճիռ իրականացնողներն արժանանում են ժողովրդի ցասմանը: Բարձրագույն դատական խորհուրդը չի փորձում պաշտպանել դատավորների անկախությունը, հենց այս փուլում, երբ դրա դեմ ոտնձգությունները հասել են գագաթնակետին: Անհասկանալի է իրավապաշտպանների լռությունը: Տպավորություն է ստեղծվում, որ մարդու իրավունքները սկսել են կրել անձնավորված բնույթ»,- ասել է Հայկ Ալումյանը: