Բաքվում գաղտնի բանակցել են Իսրայելի և Թուրքիայի առաջնորդները

Ադրբեջան պաշտոնական այց կատարած Իսրայելի պաշտպանության նախարար Ավիգդոր Լիբերմանը սեպտեմբերի 13-17-ը՝ 5 օրվա ընթացքում հասցրել է հանդիպել այդ երկրի գրեթե բոլոր առանցքային պաշտոնյաների հետ, քննարկել ոչ միայն ռազմական նշանակության, այլև կրթության և տնտեսության ոլորտի համագործակցության հարցեր:

Ադրբեջանական ԶԼՄ-ները գրում են՝ գաղտնիք չէ, որ Ավիգդոր Լիբերմանը Իսրայելի վարչապետի ամենավստահելի պաշտոնյաներից մեկն է, առավել ևս, որ սերտ բիզնես կապեր ունի Ադրբեջանում, հետևաբար Լիբերմանի այցը Ադրբեջան և պաշտոնական այցի համար այդքան երկար՝ 5 օր մնալը, համարում են բնական և արդարացված:

Իսրայելի պաշտպանության նախարարի և Ադրբեջանի նախագահի հանդիպման ժամանակ քննարկվել է ադրբեջանցի սպաների ուսուցման հարցը՝ պատերազմական պայմաններում առավել արդյունավետ գործելու համատեքստում: Միևնույն ժամանակ, Ավիգդոր Լիբերմանը խոստացել է նոր սպառազինություն տրամադրել Ադրբեջանին՝ տարածաշրջանի պայմաններին համապատասխան մարտեր մղելու համար:

Իսրայելի պաշտպանության նախարարի այցը Ադրբեջան, սակայն, կարևորվել է ոչ միայն երկկողմ ռազմաքաղաքական գործակցության տեսանկյունից:

Նույն օրերին Բաքու մեկնեց նաև Թուրքիայի նախագահ Ռեջեփ Էրդողանը՝ մասնակցելու «Բաքվի ազատագրության 100-ամյակին» նվիրված ռազմական շքերթին: Շքերթին Իսրայելի պաշտպանության նախարարը չի մասնակցել, սակայն միջոցառումից հետո տեղի է ունեցել Ավիգդոր Լիբերմանի և Ռեջեփ Էրդողանի փակ հանդիպումը: Իսրայելական «Էդիոտ ախրոնոտ» պարբերականը գրում է, որ Բաքվում տեղի ունեցած հանդիպման առանցքում եղել է Իսրայելի և Թուրքիայի դիվանագիտական հարաբերությունների վերականգնումը, ինչպես նաև Թուրքիայի ու ԱՄՆ-Իսրայել կապերի ամրապնդումը:

Թուրքիան, ըստ իսրայելական պարբերականի, գիտակցում է, որ ռուսական ուղեծիրը իր համար չի կարող ապագա լինել, մանավանդ որ ամերիկյան մեղմ պատժամիջոցների հետևանքով Թուրքիայում տեղի է ունենում արժույթի անկում՝ բացասական ազդեցություն ունենալով տնտեսության վրա: Այդ համատեքստում անհրաժեշտ է, որպեսզի թուրքական քաղաքականությունը պաշտոնապես հանդուրժող դառնա Իսրայելի տարածաշրջանային քաղաքականության նկատմամբ, ինչը ստանում է ԱՄՆ-ի բացահայտ աջակցությունը:

«Գաղտնիք չէ, որ Երուսաղեմը Իսրայելի մայրաքաղաք ճանաչելուց հետո Թուրքիան հետ կանչեց իր դեսպաններին ԱՄՆ-ից և Իսրայելից, վտարեց Իսրայելի դեսպանին Թուրքիայից: Չնայած դրան՝ թուրք-իսրայելական տնտեսական կապերը չկտրվեցին, ինչը վկայում է, որ երկու երկրները միմյանց պետք են»,- գրում է իսրայելական պարբերականը՝ շեշտելով, որ Թուրքիան և Իսրայելն ունեն ընդհանուր մրցակից և թշնամի՝ Իրանը:

Թե ինչ են Բաքվում քննարկել Թուրքիայի նախագահն ու Իսրայելի պաշտպանության նախարարը, չի հրապարակվում, նույնիսկ հանդիպման մասին պաշտոնական հայտարարություն չկա, սակայն ադրբեջանական, իսրայելական և թուրքական լրատվամիջոցները գրում են, որ Բաքվի հանդիպման թիրախում առաջին հերթին Իրանն է: Ադրբեջանը և Թուրքիան խոստացել են Իսրայելին շարունակել քաղաքական առումով շրջափակել Իրանը, իսկ առաջիկայում նաև տնտեսական ճանապարհների առումով խնդիրներ ստեղծել այդ երկրի համար, ինչը ֆինանսական հսկայական կարուստներ կպատճառի Իրանին, սոցիալական լարվածություն կստեղծի՝ կրկին փողոց դուրս բերելով հանրությանը:

Սա իսրայելական քաղաքականության հիմնական թիրախներից մեկն է, որին անթաքույց աջակցում են Իրանի երկու հարևանները՝ Ադրբեջանն ու Թուրքիան: