Երևանի ավագանու արտահերթ ընտրությունների անցկացման կարգը ըստ ԿԸՀ սահմանած ժամանակացույցի

Ըստ Կենտրոնական ընտրական հանձնաժողովի սահմանած ժամանակացույցի` այսօր՝ սեպտեմբերի 22-ին, մինչև ժամը 24.00-ն տեղամասային ընտրական հանձնաժողովներում պետք է ավարտվի քվեարկության սենյակների կահավորման գործընթացը, իսկ տարածքային ընտրական հանձնաժողովները տեղամասային ընտրական հանձնաժողովների նախագահներին պետք է հանձնեն քվեաթերթիկները, քվեարկության ծրարները, ինքնասոսնձվող դրոշմանիշները, հանձնաժողովների կնիքները և տեխնիկական սարքավորումները:

Հիշեցնենք, որ Երևանի ավագանու արտահերթ ընտրություններին մասնակցության հայտ են ներկայացրել 4 դաշինք և 8 կուսակցություն:

Կենտրոնական ընտրական հանձնաժողովի սահմանած ժամանակացույցով` սեպտեմբերի 23-ին առավոտյան ժամը 7-ին տեղամասային ընտրական բոլոր հանձնաժողովները նիստեր կգումարեն:

Ժամը 08.00-ին կբացվեն տեղամասային ընտրական հանձնաժողովի դռները ու կտրվի քվեարկության մեկնարկը: Քվեարկության ավարտի ժամ է սահմանվում ժ. 20.00-ն:

Տեղամասային ընտրական հանձնաժողովները փակվելուց և քվեարկության ավարտ հայտարարելուց հետո հանձնաժողովները 12 ժամվա ընթացքում, այսինքն՝ մինչև սեպտեմբերի 24-ի առավոտյան ժամը 8.00-ն պետք է կազմեն ու հրապարակեն քվեարկության արդյունքների վերաբերյալ արձանագրությունները, իսկ մինչև ժամը 10.00-ն տարածքային ընտրական հանձնաժողովներին ներկայացնեն ընտրական փաստաթղթերի մեկանգամյա օգտագործման պարկը, ընտրողների ցուցակների փաթեթը, չօգտագործված քվեաթերթիկներն ու ծրարները, արդյունքների արձանագրման 2-րդ օրինակը՝ գրանցամատյանը, կնիքներն ու տեխնիկական սարքավորումները:

Սեպտեմբերի 24-ին՝ մինչև ժամը 16.00-ն, Տարածքային ընտրական հանձնաժողովները պետք է ավարտեն քվեարկության արդյունքների արձանագրությունների տվյալները համակարգիչ մուտքագրելու գործընթացը: Նույն օրը՝ մինչև ժամը 20.00-ն, Կենտրոնական ընտրական հանձնաժողովը պետք է ամփոփի քվեարկության նախնական արդյունքները, վավերացնի այն արձանագրությամբ, ավարտի քվեարկության նախնական արդյունքների աղյուսակավորումը և այդ ամենը տեղադրի իր պաշտոնական կայքում՝ ներբեռնելու հնարավորությամբ:

Կուսակցությունները, դաշինքները թեկնածուները, վստահված անձինք, ընտրական հանձնաժողովների անդամները ընտրական տեղամասում քվեարկության արդյունքներն անվավեր ճանաչելու վերաբերյալ դիմում տարածքային հանձնաժողովներին կարող են ներկայացնել՝ սեպտեմբերի 24-ին՝ ժամը 12.00-ից մինչև 18.00-ն կամ սեպտեմբերի 25-ին՝ ժամը 9.00-ից մինչև ժամը 11.00-ն: Նույն սուբյեկտները, ինչպես նաև քվեարկությանը չմասնակցած ընտրողը այլ անձի փոխարեն քվեարկելու մասին դիմում կարող են ներկայացնել համապատասխան տարածքային ընտրական հանձնաժողով սեպտեմբերի 24-ին՝ ժամը 12.00-ից սկսած, մինչև սեպտեմբերի 26-ի առավոտյան ժամը 11-ը: Թեկնածուն, վստահված անձը, հանձնաժողովի անդամը՝սեպտեմբերի 24-ի՝ ժամը 12-ից մինչև 18.00-ն, ինչպես նաև սեպտեմբերի 25-ին առավոտյան 9-ից մինչև ժամը 11.00-ն տարածքային ընտրական հանձնաժողովներին ընտրատեղամասում քվեարկության արդյունքների վերահաշվարկի դիմում ներկայացնելու իրավասություն ունեն:

Եթե վերահաշվարկի վերաբերյալ դիմումներ կան, ապա Տարածքային ընտրական հանձնաժողովներում այդ գործընթացը սկսվում է սեպտեմբերի 25-ից՝ ժամը 14.00-ից մինչև սեպտեմբերի 28-ի ժամը 14.00-ն:

Սեպտեմբերի 28-ի մինչև ժամը 18.00-ն կուսակցություններն ու կուսակցությունների դաշինքները ԿԸՀ կարող են ներկայացնել ընտրությունների արդյունքներն անվավեր ճանաչելու մասին դիմում: Քվեարկության ավարտից 7 օր անց, այսինքն՝ սեպտեմբերի 30-ին, Կենտրոնական ընտրական հանձնաժողովը պետք է ամփոփի ընտրությունների վերջնական արդյունքները, քվեարկության արդյունքների աղյուսակավորումը տեղադրի կայքում, ու վերջնական որոշում կայացնի՝ ընտրությունների կայացման կամ դրանք անվավեր ճանաչելու վերաբերյալ:

Նորընտիր ավագանու առաջին նիստը «Երևան քաղաքում տեղական ինքնակառավարման մասին» օրենքի պահանջի համաձայն գումարվում է ավագանու անդամների ընտրվելու վերաբերյալ որոշման պաշտոնական հրապարակումից հետո՝ հաջորդ երկուշաբթի օրը, այսինքն տեսականորեն դա լինելու է հոկտեմբերի 1-ին: