ՇՊՀ ռեկտոր Սահակ Մինասյանը հրաժարականի դիմում է գրել

ՀՀ ԿԳ նախարար Արայիկ Հարությունյանն այսօր հանդիպել է Շիրակի պետական համալսարանի (ՇՊՀ) ռեկտոր Սահակ Մինասյանի, ուսանողների ու դասախոսների հետ, պատասխանել  լրագրողների հարցերին: Նախարարը բուհում էր՝ այնտեղ զարգացող իրադարձությունների հանգուցալուծման համար:

Հիշեցնենք՝ բուհի դասախոսական կոլեկտիվը, ուսանողները պահանջում էին ռեկտոր Սահակ Մինասյանի հրաժարականը: Ռեկտորն այսօր հրաժարականի դիմում է ներկայացրել: Նախարար Արայիկ Հարությունյանը նշել է, որ շուտով այնտեղ տեղի կունենան ռեկտորի նոր ընտրություններ: 

Լրագրողների հետ հանդիպման ժամանակ նախարարն ասել է, որ մինչև ռեկտորի նոր ընտրությունները բուհը կղեկավարի պրոռեկտոր Երվանդ Սերոբյանը:

«Պարոն Մինասյանը շատ լուրջ քայլի է դիմել, սա փոխզիջումային ողջունելի քայլ է առկա իրավիճակը հանդարտեցնելու և ակադեմիական գործընթացը վերականգնելու համար: Ես պրոֆեսորադասախոսական կազմին խորհուրդ եմ տալիս չսրել իրավիճակը: Սա լուծում է, որը թույլ կտա դուրս գալ ստեղծված իրավիճակից: ԿԳ նախարարությունը ելնելու է բացառապես ոլորտի շահերից և որևէ մեկին առավելություն չի տրվելու: Ես հաջորդ շաբաթ կրկին կգամ Գյումրի, կհանդիպեմ դասախոսների և ուսանողների հետ»,- ասել է Արայիկ Հարությունյանը:

Սահակ Մինասյանը վստահեցրեց, որ ժամանակավորապես պաշտոնը լքելու որոշումը կապ չունի բուհի կառավարման խորհրդի նախագահ Ֆելիքս Ցոլակյանի հրաժարականի հետ:

«Ամեն ինչ չկապենք դրա հետ: Մեզ մոտ ինստիտուցիոնալ խնդիրներ կան, և եթե չլինեին այդ խնդիրները, ամեն ինչ իրավական դաշտ կտեղափոխվեր»,- նշեց Սահակ Մինասյանը՝ փաստելով, որ Ֆելիքս Ցոլակյանի հրաժարականից հետո անհրաժեշտ է բուհի նոր կառավարման խորհրդի կազմ ձևավորել:

Կմասնակցի՞, թե՞ ոչ ռեկտորի ընտրություններին, Սահակ Մինասյանը պատասխանեց.

«Հետո-ի մասին կասեմ հետո»: 

«Կարծում եմ, որ բոլոր մնացած բուհերում և ուսումնական հաստատություններում խնդիրները պետք է այսպես լուծվեն՝ բանակցությունների ու փոխզիջումների միջոցով: Պետք է հաշվի առնենք, որ Հայաստանում իրավիճակ է փոխվել, պետք է հաշվի առնեք, որ Հայաստանում ունենք նոր իրողություններ, բայց այդ իրողությունները չպետք է մեզ հանեն օրենքի ու օրինականության դաշտից: ՀՀ ԿԳ նախարարությունն ամբողջությամբ շահագրգիռ կողմերի տրամադրության տակ է: Մենք կողմնապահություն չենք դրսևորում, ԿԳ նախարարությունը ելնում է ոլորտի շահերից, և  որևէ  մեկին առավելություն չենք տալու: Ինձ համար անընդունելի էր բուհում ոչ ակադեմիական մթնոլորտը, երբ փոխադարձ վիրավորանքների պայմաններում լուծվում էր Հայաստանի բուհերից մեկի՝ Շիրակի համալսարանի հարցը»,- ավելացրեց Արայիկ Հարությունյանը: