Վրաստանում նախագահական ընտրապայքարը մտել է եզրափակիչ փուլ

Վրաստանում 2018թ. նոյեմբերի 28-ին սպասվող նախագահի ընտրության երկրորդ փուլից առաջ այդ երկրում երկու մրցակցող ուժերի միջև լարվածությունն ավելի է մեծանում:

Միասնական ընդդիմության և իշխանության թեկնածուները միմյանց մեղադրում են տարբեր մեղքերի համար, որոշ վայրերում էլ փոխադարձ մեղադրանքները վերածվում են ֆիզիկական հաշվեհարդարների: Այդպիսի դեպքեր եղան նաև Ջավախքում, որտեղ երկու կողմերի համակիրները միմյանց ծեծեցին հոկտեմբերի 30-ին՝ առաջին փուլի ավարտից անմիջապես հետո:

Թե ինչ է այժմ կատարվում Վրաստանում, SHANTENWS.am-ը զրուցեց Վրաստանի մի շարք քաղաքական վերլուծաբանների, ինչպես նաև երկու կողմերի շահերը ներկայացնող գործիչների հետ:

Գելա Վասաձե. քաղաքագետ, Թբիլիսի

Ընդդիմադիր հայացքներով Վրաստանում հայտնի վերլուծաբան Գելա Վասաձեն հայտնեց, որ նախընտրական քարոզարշավը բավական լարված է, ինչը թույլ չի տալիս, որպեսզի գաղափարների և նախընտրական խոստումների պայքար ընթանա:

«Հոգեբանական առավելություն այս պահին ընդդիմությունն ունի, բայց իշխանությունը փորձում է և առաջիկա օրերին էլ կփորձի ամեն գնով պահպանել նախագահի աթոռը, քանի որ չնայած լիազորությունների սահմանափակմանը, նախագահը համարվում է շատ կարևոր գործոն»,- ասաց Գելա Վասաձեն՝ չթաքցնելով, որ Վրաստանի իշխանությունը կփորձի օգտագործել բոլոր վարչական ռեսուրսները՝ ընդդիմության միասնական թեկնածու Գրիգոլ Վաշաձեի հնարավոր հաջողությունը կասեցնելու համար:

Վրաստանի իշխող «Վրացական երազանք» կուսակցության աջակից, վերլուծաբան և խորհրդարանի պատգամավոր Գիա Ջորջոլիանին SHANTENWS.am-ի հետ զրույցում այլ տեսակետ հայտնեց՝ նշելով, որ ընդդիմությունը այդպես էլ չկարողացավ վեր կանգնել բացասական հավակնություններից և ջանք չի խնայում սադրանքների միջոցով երկիրը ապակայունացնելու համար:

Գիա Ջորջոլիանի. քաղաքագետ, խորհրդարանի պատգամավոր, Թբիլիսի

«Նախընտրական պայքարը բավական դաժան է: Բայց դա դեռ ոչինչ, բնական երևույթ է: Սալոմե Զուրաբիշվիլիի հակառակորդները ավելի շատ չարության, վարկաբեկելու, սադրանքների ձևաչափն են ընտրել: Հիմա Վրաստանում ընթանում է ոչ թե գաղափարների, այլ մեղադրանքների պայքար, որտեղ երևում են նախկին նախագահ Միխեիլ Սաակաշվիլիի ականջները»,- հեռախոսազրույցում ասաց Գիա Ջորջոլիանին:

Վրաստանում վերլուծաբանները նշում են, որ քարոզչությունը շարունակում է ընթանալ մեղադրանքների վրա և գրեթե բացակայում են խոստումները: Յուրաքանչյուր կողմից մեկ-երկու կոնկրետ խոստում կա: Մասնավորապես, իշխանության թեկնածու Սալոմե Զուրաբիշվիլին խոստացել է ջավախահայերին երկքաղաքացիության հնարավորություն տալ, որով նրանք կկարողանան մեկնել Ռուսաստան և փող աշխատել: Ընդդիմության միասնական թեկնածու Գրիգոլ Վաշաձեն խոստացել է ընտրվելու դեպքում ներում շնորհել բանտերում գտնվող այն գործիչներին, որոնք աշխատել են նախկին նախագահ Միխեիլ Սաակաշվիլիի օրոք և դատապարտվել կոռուպցիոն գործարքների մեջ ներքաշված լինելու մեղադրանքով, նաև երկիր վերադարձնել Սաակաշվիլիին:

Խոստումներից զատ, սակայն, Վրաստանի նախագահի երկու թեկնածուները չեն տեղեկացնում իրենց ընտրողներին, որ խորհրդարանական երկիր դարձած Վրաստանում նախագահն այսուհետ ունենալու է շատ փոքր լիազորություն, իրավասու չէ առանց խորհրդարանի համաձայնության որևէ առանցքային գործողություն անել, հետևաբար, և՛ երկքաղաքացիություն տալու հարցը, և՛ Միխեիլ Սաակաշվիլիին կամ կոռուպցիայի համար դատապարտված պաշտոնյաների ներում շնորհելը նախագահի լիազորությունների շրջանակում չեն: