Ժողովո՛ւրդ ջան, դուք որևէ քաղաքական ուժից վախենալու բան չունեք, իրենք պիտի վախենան, ձեր ցավը տանեմ. Փաշինյանը` ընտրողներին

«Իմ քայլը» դաշինքի ընտրական ցուցակը գլխավորող Նիկոլ Փաշինյանը Սպիտակում ընտրողների հետ հանդիպմանը շեշտեց, որ քարոզարշավի մեկնարկից ի վեր անցնում են նույն ճանապարհով, որով անցել են մարտի 31-ին սկսված քայլարշավի ընթացքում: Փաշինյանն ասաց, որ Սպիտակում ընտրողների հետ հանդիպումը նախատեսված ժամից ուշ սկսվեց, քանի որ ճանապարհին կանգնել է, զրուցել մարդկանց հետ, ու նրանք անկեղծացել են, որ վախենում են:

«Մարդիկ վախենում են… ումի՞ց, ինչի՞ց, պատկերացնո՞ւմ եք` Հանրապետականից: Եթե նկատի ունեն Հանրապետականի պաստառները, որ գիշերվա սատանայի նման ճանապարհին երևում են սևով, ես դա կհասկանամ, բայց, ժողովո՛ւրդ ջան, ի՞նչ է տեղի ունեցել, ապրիլին տեղի է ունեցել հեղափոխություն, դեկտեմբերի 9-ին արտահերթ ընտրություններ են տեղի ունենալու, մենք այս ողջ պրոցեսի ընթացքում իրար հետ կատարած գործողություններով իշխանությունը վերադարձրել ենք ձեզ: Դուք որևէ քաղաքական ուժից վախենալու բան չունեք, իրենք պիտի ձեզնից վախենան, ձեր ցավը տանեմ, էս ինչի՞ մասին եք խոսում»,- ասաց նա:

Փաշինյանը շեշտեց՝ այսօր Հայաստանում իշխանությունը հարյուր տոկոսով վերադարձված է ժողովրդին, և հենց ժողովուրդն է որոշում` ով լինի ապագա խորհրդարանում: Նա նշեց, որ սիրո և համերաշխության մասին իրենց խոսքերից ոմանք «առիթավորվում են»: Նրա խոսքերով` այս ընտրություններում կա պատմական կոնկրետ առաքելություն, այն է` «թալանող բրիգադը պետք է ուղարկվի պատմության աղբանոցը»:

«Ասում են` եթե մտահոգված ես, ձայն տուր Հանրապետականին, ես էլ ասում եմ` եթե ազատ, արժանապատիվ քաղաքացի ես, ձայն չտաս Հանրապետականին, ձայն չտաք էն ուժերին, որոնք թեկուզ մի անգամ փորձել են ընտրակաշառքով հաղթել, ովքեր սպառնալիք են կիրառել սեփական ժողովրդի նկատմամբ, այն ուժերին, որ որոշում և մտածում են, թե Հայաստանում զենքով ու բռնությամբ կարելի է հարց լուծել: Սա այսօրվա իմ ամենամեծ շոկն է, որ այսօր Հայաստանում կա քաղաքացի, որը կարող է ասել, որ ինքը վախենում է կոռումպացված Հանրապետական իշխանությունից»,- նշեց Փաշինյանը:

Նա ասաց, որ իրենք աղքատության հաղթահարումը բրինձ, մուրաբա կամ փող բաժանելով չեն պատկերացնում, այլ աշխատանքի, ներդրումների, նոր աշխատատեղերի, գործարանների միջոցով: Փաշինյանը հայտնեց, որ քարոզարշավի այս օրերին իրեն մոտենում էին գործարարներ, որ ասում էին` պատրաստ են ներդրումներ անել, գործարաններ ստեղծել: Նա նաև տեղեկացրեց, որ իրենք 500 մլն դոլարի և ավելի ներդրումային ծրագրեր են քննարկում կառավարության հետ, ու դրանց թիվը մեծանալու է: Փաշինյանը դիմեց նաև բոլոր այն Հանրապետական համայնքապետերին, որոնք կփորձեն վախեցնել իրենց քաղաքացիներին:

«Այս երկրում մարդ կա՞, որը համարձակվում է քաղաքացուն վախեցնել: Բոլորիդ կպառկեցնենք ասֆալտներին, էս ովքե՞ր են սրանք, ի՞նչ Հանրապետական, ի՞նչ օլիգարխ, ի՞նչ հաստավիզ… Վախեցնել քաղաքացուն, գլուխներդ պատովն եք տվել, ովքե՞ր եք դուք… »,- ասաց նա:

Փաշինյանը, դիմելով այդ համայնքապետերին, նախազգուշացրեց` չփորձեն որևէ քաղաքացու ասել, թե նա ում պիտի ընտրի, քանի որ քաղաքացին գիտի` ում պիտի ընտրի:

Սպիտակում ընտրողների հետ հանդիպումը Փաշինյանը եզրափակեց Սիլվա Կապուտիկյանի «Ապստամբություն» բանաստեղծության ասմունքով, ապա նշեց` Կապուտիկյանի ասած «դատաստան»-ը եկել է, և դա դեկտեմբերի 9-ի քվեարկությունն է: