Մորատորիում՝ չեղարկման դիմաց. ֆրանսիական իշխանությունների առաջարկով Փարիզը կրկին «դեղնեց»

Վերջին 1 տարվա ընթացքում Ֆրանսիայում դիզվառելիքը թանկացել է մոտ 23 տոկոսով: 1 լիտրի արժեքը կազմում է 1.51 եվրո: Վերջին 18 տարիների ընթացքում Ֆրանսիայում բենզինն այդքան թանկ չէր եղել: Դա բավական չէր, կառավարությունը դիզվառելիքի հարկերի ավելացման նախագիծ ներկայացրեց: Դրա համաձայն՝ հունվարի 1-ից Ֆրանսիայում բենզինի գները պետք է աճեն 2.9 եվրոյով, դիզելային վառելիքի մեկ լիտրն էլ` 6.5 եվրոյով:

Բենզինի գնի թանկացումը և վառելիքի հարկերի ավելացումը Ֆրանսիայի նախագահ Էմանուել Մակրոնը մեկնաբանում է որպես էկոլոգիապես մաքուր վառելիքի ստեղծմանը միտված քայլ: Նրա կարծիքով՝ այսկերպ կնվազեցվի երկրի կախվածությունը նավթից:

Գործադիրի ղեկավար Էդուարդ Ֆիլիպն էլ ավելի վաղ՝ լրագրողների հետ զրույցում, ընդգծել էր ջերմոցային գազերի արտանետումների դեմ պայքարի անհրաժեշտությունը:

«Սա բարդ որոշում է, բայց այլ տարբերակ չկա: Ես դժգոհություններ եմ լսում, բնակիչների զայրույթն ավելանում է, բայց ես ասում եմ այն, ինչ միշտ եմ ասել՝ կլիմայական փոփոխությունների խնդրին կախարդական լուծում չկա: Պետք է համոզենք մեր համաքաղաքացիներին փոխել այն ապրելակերպը, որը խնդրահարույց է շրջակա միջավայրի հավասարակշռության տեսանկյունից»,- lefigaro.fr-ի փոխանցմամբ՝ ասել է Ֆրանսիայի վարչապետը:

Բնակիչների զայրույթն ավելանալ, իհարկե, վարչապետը կանխատեսում էր, բայց այն, ինչ տեղի ունեցավ փարիզյան փողոցներում, աննախադեպ էր վերջին տասնամյակների համար:

Դեղին բաճկոնններ հագած բազմաթիվ քաղաքացիներ դուրս եկան փողոցներ և իրենց դժգոհությունն արտահայտեցին նոր նախագծի վերաբերյալ: Իրավիճակն այնքան սրվեց, որ Փարիզը հիշեցրեց պատերազող երկրի՝ ամենուր ծուխ, ավերակներ ու բարիկադներ: Սկսվեց «դեղին բաճկոններ»-ի բողոքի շարժումը: Ցուցարարների պահանջն էր չեղարկել աղմկահարույց նախագիծը:

Ցույցերին միացողների թիվն ավելանում էր: Մարդկանց մի մասը դժգոհում էր հարկային փոփոխություններից, մյուս մասը՝ Էմանուել Մակրոնի քաղաքականությունից: Ըստ տարբեր գնահատականների՝ Մակրոնի վարկանիշը ընդամենը 23 տոկոս է:

Բողոքի ակցիաների ընթացքում զոհվել է 4 մարդ: Հարյուրավոր մարդիկ ձերբակալվել են, բազմաթիվ ոստիկաններ վնասվածքներ են ստացել։

Դեկտեմբերի 4-ին Ֆրանսիայի իշխանությունները պաշտոնապես բենզինի և դիզվառելիքի գների աճի մորատորիում սահմանեցին վեց ամսով:

Ֆրանսիայի նախագահ Էմանուել Մակրոնը հաջորդ շաբաթ հանդես կգա երկրի իրադրության վերաբերյալ հայտարարությամբ, որտեղ նոյեմբերի կեսերից տեղի են ունենում «դեղին բաճկոնների» շարժման բողոքի զանգվածային ակցիաներ: Այս մասին հայտնել Է Ֆրանսիայի Ազգային ժողովի նախագահ Ռիշար Ֆեռանը:

Բայց այս ամենը չգոհացրեց ցուցարարներին, նրանք սպասում են նախագծի վերջնական չեղարկմանը:

Այսօրվա գործողությունները «խոստանում են» վերահսկողությունից դուրս գալ: Ֆրանսիական մամուլը գրում է, որ իշխանությունն անդառնալի հետևանքներ է կանխատեսում: Ավելի քան 3 շաբաթ շարունակվող բողոքի գործողություններն այսօր նոր թափ կստանան:

Ֆեյսբուքյան հարթակն օգտագործելով՝ դեկտեմբերի 8-ի աննախադեպ բողոքի ակցիայի կոչեր է անում ցույցի կազմակերպիչներից մեկը՝ Էրիկ Դրուեն: Չնայած դրան՝ նա իրեն չի համարում «դեղին բաճկոններ»- լիդեր, այլ պարզապես խոսնակ:

«Լիդերներ չկան, միայն մամուլի խոսնակներ են: Ոչ մի որոշում չի կայացվի առանց «դեղին բաճկոններ»-ի միասնական տեսակետի»,- ասել է նա:

Առավոտյան ցուցարարները հավաքվել են Փարիզի Հաղթական կամարի մոտ՝ շարժվելով դեպի Ելիսեյան պալատ: Մետրոյի մի շարք կայարանների աշխատանքը խաթարված է:

Ցուցացարարները «Որտե՞ղ ես, Մակրո՛ն, մենք գալիս ենք քո հետևից» և տարբեր այլ պաստառներով բողոքի ակցիա են իրականացնում:

«Այսօր բռնություններ չեն լինի: Մենք կոչ ենք անում Մակրոնին իրեն շրջապատել ավելի բանիմաց մարդկանցով»,- ասել է ցուցարարներից մեկը: