Առևտրի վարչության պետն արձագանքել է քաղաքապետարանի դիմաց բողոքող փողոցային առևտրականներին

Այսօր մի խումբ առևտրականներ դարձյալ բողոքի ակցիա են անցկացրել Երևանի քաղաքապետարանի շենքի դիմաց՝ պահանջելով, որ մինչև իրենց հարցի լուծումը թույլ տան շարունակել փողոցային առևտուրը: Քաղաքային իշխանություններն առաջարկում են տարբեր վարչական շրջաններում գործող շուկաներում արտոնյալ պայմաններով առևտուր իրականացնել, սա նրանք ընդունելի տարբերակ չեն համարում, այլ պահանջում են, որ արագ լուծվի տաղավարների տեղադրման հարցը։

«Թողեն աշխատենք, մինչև իրենց հարցերը լուծեն, տեղ հատկացրել են, ե՞րբ կլինեն տաղավարները: Ասին՝ մենք տեղեր կբացենք, ե՞րբ, կարող է մի տարի տևի: Իսկ շուկաների տեղը մենք լավ գիտենք, շուկաներ մարդ չի մտնում, թող խանութները վերացնեն, շուկա մտնենք: Մեկը գործից տուն է գալիս, կարող է մի կիլո կարտոշկի համար մտնի շուկա, մտեք հըլը Գումի շուկա, տեսեք քանի՞ մարդ է մտնում,- ասաց փողոցային առևտրով զբաղվող Հակոբ Հակոբյանը:

Նա որոշման առաջին իսկ օրից դեմ է եղել, կարծում է, որ անհնար է շուկայում աշխատել, իսկ տաղավարներ տեղադրելու դեպքում պատրաստ են պարտաճանաչորեն հարկեր վճարել:

«Հասկացանք՝ Մաշտոցի պողոտան կենտրոն է, բա Քաջազնունի փողոցն ի՞նչ է, ասում է` տեղ կհատկացնենք, կանենք, ե՞րբ, օր չեն ասում, որ ասեն՝ մի շաբաթ կսպասենք, բայց անորոշ ժամանակով են ասում, մեկը մեկին է պաս տալիս: Քաղաքապետարանը գցել է թաղապետարանի վրա, զանգում ես, ցրում են»,- հավելեց նա:

«Աշխատել եմ «Ռոսիայում», հուշանվեր եմ վաճառել, ամիսուկես է` բողոքում ենք, մեր ձայնը ոչ ոք չի լսում, մարդիկ են կանգնած, կարելի է լսել խեղճ մարդկանց պահանջը: Եթե այսպես շարունակվի, մեզ չդնեն մարդու տեղ, մեզ չդնեն Հայաստանի հպարտ քաղաքացու տեղ, նամակ կգրենք բոլոր դեսպանատներ, որ երկիրն ընդունի, այնտեղ կգնանք»,- ասում է առևտրականներից Հայկուշ Հակոբջանյանը:

Նա կարծում է, որ տաղավարներ տեղադրելու խոստումն իրենց աչքերին թոզ փչելու համար է, իսկ իրականում քաղաքապետարանը պարզապես փորձում է ժամանակ շահել:

«Նորից խաբում են, տաղավարներ կդնեն, սուտ է, ժողովրդին ասում են` սպասեք, ինչքա՞ն սպասենք, իրենց երեխաները կսպասեի՞ն:  Մի փոքր սուվենիր է, մի փոքր արկղ, դրանով ես ո՞ւր գնամ, պարտք անեմ, տեղի փող տա՞մ»,- զայրանում է կինը:

Իսկ քաղաքացիներից Ռաֆայել Մուրադյանը կարծում է, որ անգամ Քաջազնունի փողոցում տաղավարներ տեղադրելով՝ հարցը չի լուծվի: Նշում է.

«Հունվարի 8-ից շարունակ կրկնում են Քաջազնունի: Իմ հաճախորդը Շենգավիթից չի գա Քաջազնունի գնումներ կատարի»:

Կարեն Դադոյանն էլ վստահեցրեց, որ իրենք պատրաստվում են շարունակել ցույցերը, քայլերթ իրականացնել, թեև մասնակիցների թիվը մեծ չէր, ինչպես երեկ էին վստահեցնում: Ինչո՞վ է պայմանավորված, պատասխանեց.

«Շատ են, մարդիկ կան, որ դեռևս տեղյակ չեն, եղանակն էլ է նպաստում, շատերն էլ հույսը կորցրել են, ասում են՝ ով է լսում, որ երկու ամիս գնում-գալիս ենք»:

Նրանց բողոքին արձագանքեց քաղաքապետարանի Առևտրի և սպասարկումների վարչության պետ Հովիկ Սաֆարյանը, որը, զրուցելով քաղաքացիների հետ՝ վստահեցրեց.

«Այս պահին փաստաթղթերը մուտք են եղել քաղաքապետարան, արագացնում ենք պրոցեսը, թեև քաղաքապետարանի գործառույթի մեջ չի մտնում շուկա ստեղծելը, բայց մենք աջակցում ենք, որ  փաստաթղթերի առումով, էսքիզների առումով հնարավորինս շուտ լուծում ստանա»:

Հարցին, թե ի վերջո ե՞րբ լուծում կստանա քաղաքացիների հարցը, քանի որ նրանց համար ամեն օրն է կարևոր, Սաֆարյանը դարձյալ խուսափեց հստակ ժամկետ նշել, միայն ասաց.

«Հնարավորինս սեղմ ժամկետում, այս պահին մենք հասկանում ենք, մարդիկ ամեն օր աշխատում են, որպեսզի պրոցեսը չկանգնի, այս պահին շուկաներում, արտոնյալ պայմաններով, պատասխանն էլ գիտեմ, որ գիտեք` չենք կարող գնալ, տեղավորվել, շուկաներում արտոնյալ պայմաններում տրամադրվել են, և խնդրում եմ, ես ինչ որ ասում եմ, խաբել չկա»: