Պետական բյուջեի հաշվին աջակցություն կցուցաբերվի ոռոգման արդիական համակարգերի ներդրման գործընթացին

ՀՀ գյուղատնտեսության նախարարի պարտականություններն իրականացնող Գեղամ Գևորգյանը կառավարության մարտի 7-ի նիստում ներկայացրեց «Ոռոգման արդիական համակարգերի ներդրման համաֆինանսավորման ծրագիրը հաստատելու մասին» կառավարության որոշման նախագիծը: Նա հայտնեց, որ հարցը կաթիլային և անձրևացման համակարգերին է վերաբերում: Գևորգյանը տեղեկացրեց՝ 2018 թ. վարկ է տրամադրվել թվով 8 շահառուների՝ 315 մլն 526 հազար դրամ: Տենդենցը գնահատվում է հետևյալ կերպ՝ հոկտեմբեր-դեկտեմբերին 8 վարկից 5 վարկն է տրամադրվել, որպեսզի ընթացքն ավելի արդյունավետ լինի:

Նախատեսվում է Հայաստանի Հանրապետության պետական բյուջեի հաշվին աջակցություն ցուցաբերել ոռոգման արդիական համակարգերի ներդրման գործընթացին` կիրառելով (ըստ համակարգը ներդնող տնտեսավարողի հայեցողության) ներքոհիշյալ տարբերակներից որևէ մեկը`

1) սուբսիդավորել ոռոգման արդիական համակարգերի ներդրմանն (սխեմայի կազմում, կապիտալ ծախսեր, ներդրման աշխատանքներ) ուղղված վարկերի տոկոսադրույքներն այնպիսի չափաքանակով, որպեսզի վարկերը տրամադրվեն 2 %, իսկ սահմանամերձ համայնքներում (այսուհետ՝ սահմանամերձ համայնքներ) կամ գերնորմատիվային ջրապահանջարկ ունեցող հողատարածքներում ներդրման դեպքում, կամ առնվազն 3 հա հողատարածքում ներդնող՝ գյուղատնտեսական գործունեություն ծավալող կոոպերատիվներին (այսուհետ՝ կոոպերատիվ)` 0 % տոկոսադրույքով, եթե ներդրման աշխատանքներն իրականացվելու են սույն ծրագրի 30-րդ կետի 2-րդ ենթակետի «դ» պարբերությունում նշված մասնագիտացված կազմակերպության կողմից,

2) սուբսիդավորել ոռոգման արդիական համակարգերի ներդրման համար կատարված կապիտալ ծախսերի (մոտեցնող խողովակ, գլխամասային հանգույց, բաշխիչ ցանց) համար տրամադրված վարկերի տոկոսադրույքներն այնպիսի չափաքանակով, որպեսզի վարկերը տրամադրվեն 2 %, իսկ սահմանամերձ համայնքներում կամ գերնորմատիվային ջրապահանջարկ ունեցող հողատարածքներում ներդրման դեպքում, կամ առնվազն 3 հա հողատարածքում ներդնող կոոպերատիվներին` 0 % տոկոսադրույքով, եթե ներդրման աշխատանքներն իրականացվելու են առանց սույն կետի 1-ին ենթակետում նշված մասնագիտացված կազմակերպության,

3) փոխհատուցել ոռոգման արդիական համակարգեր ներդնող տնտեսավարողների կողմից կատարված ծախսերի (սխեմայի կազմում, կապիտալ ծախսեր, ներդրման աշխատանքներ) 16 %-ը, իսկ սահմանամերձ համայնքներում կամ գերնորմատիվային ջրապահանջարկ ունեցող հողատարածքներում ներդրման դեպքում, կամ առնվազն 3 հա հողատարածքում ներդնող կոոպերատիվներին` 18 %-ը, եթե ներդրման աշխատանքներն իրականացվելու են սույն կետի 1-ին ենթակետում նշված մասնագիտացված կազմակերպության կողմից,

4) փոխհատուցել ոռոգման արդիական համակարգեր ներդնող տնտեսավարողների կողմից կատարված կապիտալ ծախսերի (մոտեցնող խողովակ, գլխամասային հանգույց, բաշխիչ ցանց) 16 %-ը, իսկ սահմանամերձ համայնքներում կամ գերնորմատիվային ջրապահանջարկ ունեցող հողատարածքներում ներդրման դեպքում, կամ առնվազն 3 հա հողատարածքում ներդնող կոոպերատիվներին` 18 %-ը, եթե ներդրման աշխատանքներն իրականացվելու են առանց սույն կետի 1-ին ենթակետում նշված մասնագիտացված կազմակերպության:

ՀՀ վարչապետ Նիկոլ Փաշինյանը նկատեց՝ գաղափարն առաջին հայացքից գրավիչ է, բայց դրա արդյունավետությունը պետք է իսկապես գնահատել: ՀՀ փոխվարչապետ Մհեր Գրիգորյանն առաջարկեց այս ծրագրի արդյունքները նույնպես քննարկման առարկա դարձնել եռամսյակը մեկ: Որոշվեց` կառավարությունում երեք ամիսը մեկ հաշվետվություն կտրվի այս ծրագրի վերաբերյալ: