Կառավարության ծրագրի զեկույցի բացերն ու պատգամավորներին ամենաշատը հետաքրքրող զբոսաշրջության զարգացման ճանապարհները

«Լուսավոր Հայաստան» խմբակցության պատգամավոր Արկադի Խաչատրյանը տնտեսական զարգացման և ներդրումների նախարար Տիգրան Խաչատրյանի՝ կառավարության ծրագրի ներկայացնելուց հետո դիտարկում արեց.

«Ճիշտ կլիներ, որ զեկույցում արձանագրված լիներ կամ արդյունքները, կամ առաջընթացը, որ արձանագրել ենք նախորդ տարվա համեմատ կամ միջոցառումները, որ արվել են տվյալ ուղղությամբ»:

Հավելեց, որ զեկույցից իր դուրս գրած տվյալների համաձայն՝ ստացվել են այսպիսի ցուցանիշներ.

«Ես հանեցի նաև վիճակագրություն 2018թ. ներմուծման աճը՝ 21.1 տոկոս, արտահանմանը՝ 7.8, աճերի տարբերությունը բերել է առևտրային հաշվեկշռի դեֆիցիտի խորացման, և որևէ օգուտ չի բերում տնտեսությանը»:

Նախարարն արձագանքեց.

«Ես նայում էի նախադասությունը, որ կարդում էիք, կոնտեքստից հանված թիվը ցույց չի տալիս, թե ինչու է եղել 866, եթե ամբողջությամբ կարդաք, կտեսնեք, որ 866 եղել է ընդհանուր ներմուծման աճը, որի մի մասը եղել է կապիտալ ներմուծման աճը, այսինքն՝ որակյալ աճ է, ներմուծում է իրականացվել, ներդրվել է կապիտալ, որը բերելու է տնտեսության նոր ճյուղերի աճի»:

Պատգամավոր Արթուր Դալլաքյանը, ի թիվս այլ պատգամավորների, հետաքրքրվեց զբոսաշրջության ուղղություններով, նրան մասնավորապես հուզում էր ճանապարհաշինությունը, որը իշխանության հայտարարած ուղղության զարգացման ճյուղերից է, այնինչ, ինքը նկատառումներ ունի, հատկապես հետաքրքրվեց Նոյեմբերյանի ճանապարհահատվածով, որտեղ վերջերս նկատել է, թե քանդման ինչ աշխատանքներ են կատարվում: Նրա հարցին պատասխանեց տրանսպորտի, կապի և ՏՏ նախարար Հակոբ Արշակյանը:

«Այդ ճանապարհի համար չի վճարվել, խախտումների մասին ասվել է, կվերանորոգի կամ նորը կկառուցի, եթե ոչ, չի ընդունվի, ու  այս տարվա մասին է խոսքը, Ոսկեպարի ճանապարհի մասին է խոսքը»,- պարզաբանեց նա:

Պատգամավոր Հրանտ Մադաթյանը ևս խոսեց զբոսաշրջությունից՝ հարցնելով.

«Գերակա ուղղություններից է հայտարարվել զբոսաշրջությունը: Ի՞նչ աշխատանքներ են տարվում էդ գումարների մեծ մասը երկրում պահելու համար, Նոր տարվա միջոցառումների մեծ մասն անցկացվում է հարևան երկրում, մենք հնարավորություններ ունենանք զարգացնել  մարզերում հյուրանոցային տնտեսությունները, պահել գումարների մեծ մասը»:

Նախարար Տիգրան Խաչատրյանն ասաց.

«Մենք շատ ենք խոսում ներգնա զբոսաշրջության մասին, բայց քիչ ենք խոսում ներքին զբոսաշրջության մասին:  Վստահաբար ունենք ուղղություններ, որոնք Հայաստանի քաղաքացու համար զարգանալու են` և՛ Գյումրին, և՛ Սյունիքը, Ղարաբաղը պետք է դարձնենք ավելի ճանաչելի և հասանելի: Ծառայությունների որակի ու ենթակառուցվածքների զարգացման վրա ուշադրություն պետք է դարձնել: Եթե որոշում են գնալ Վրաստան, բնականորեն շարունակվելու է, որովհետև բնական պայմաններն այնտեղ այնպիսին են, որ մարդկանց որոշակի քանակ ցանկանում է անցկացնել ծովում»: