Երջանկության կարևորագույն բաղադրիչն աշխատանքն է. Նիկոլ Փաշինյան

ԱԺ «Բարգավաճ Հայաստան» խմբակցության անդամ Իվետա Տոնոյանը խորհրդարանում կառավարության ծրագրի հաշվետվության ժամանակ երջանիկ քաղաքացի ունենալու թեզին անդրադարձավ, որը տեղ է գտել թե՛ կառավարության ծրագրում, թե՛ կատարողականում: Նա նշեց՝ երջանիկ քաղաքացի ունենալու մասին պարբերության մեջ երեք կետ է նշված, ըստ որի՝ ունենալու ենք ազատ, արժանապատիվ և երջանիկ քաղաքացի, և թվարկված է, որ բացվել են ԱԺ, Բաղրամյան 26-ի դարպասները, չկան քաղբանտարկյալներ, ու կառավարության նիստերն այլևս դռնփակ չեն անցկացվում:

«Արդյո՞ք սրանք երջանիկ քաղաքացի ունենալու համար բավարար են, նաև կխնդրեի նշել այն երեք առաջնահերթությունները, որ պետք է անի կառավարությունը 2019-ին՝ երջանիկ քաղաքացի ունենալու համար»,- հարց ուղղեց նա:

ՀՀ վարչապետ Նիկոլ Փաշինյանը նշեց, որ ՀՀ քաղաքացիները թավշյա հեղափոխությունից հետո պարում էին, խորոված անում, դա երջանկության արտահայտություն էր:

«Ինչո՞ւ էին երջանիկ, որևէ մեկն ավտոմեքենա՞ էր նվիրել, բնակարա՞ն, խո՞լ: Ոչ, նրանք հասկացել էին, որ բարձրագույն իշխանություն, որոշող ուժ են իրենց երկրում, ունեն հնարավորություն՝ ազդելու իշխանության որոշումների և ամենակարևորը՝ իշխանություն ձևավորելու հարցում: Երջանկության ձևավորման անկյունաքարը սա է: 2018 թ. երջանկության համաթվում Հայաստանը 13 կետով բարելավել է դիրքերը, եթե տեսնեք՝ այդ համաթվում որ երկրներն են առաջնային դիրք զբաղեցնում, դրանք այն երկրներն են, որ ունեն քաղաքացիական ազատությունների, Մարդու իրավունքների պաշտպանության և բարեկեցության որոշակի մակարդակ: Այո, այն, որ ԱԺ և Բաղրամյան 26-ի դռները բացվել են, ի՞նչ կապ ունի, դա ՀՀ քաղաքացու հաղթանակի սիմվոլն է, իսկ հաղթած մարդը նաև երջանիկ է զգում իրեն»,- ասաց Փաշինյանը:

Նա կրկին հիշեցրեց՝ մի փուլում ՀՀ քաղաքացին հաղթել է քաղաքական գործընթացում, հիմա տնտեսական հեղափոխության գործընթացն է: Փաշինյանը նշեց՝ կառավարությունը երջանկության իր մոդելն է առաջարկում՝ մարդը պետք է լինի ազատ, իրավունքները՝ պաշտպանված, նաև հավելեց՝ չի պատկերացնում մարդ, որ երջանիկ է առանց աշխատանքի, քանի որ երջանկության կարևորագույն բաղադրիչն աշխատանքն է, այն բարձրացնում է մարդու ինքնագնահատականը և հարգանքը: Որպես երջանկության կարևոր բաղադրիչ՝ Փաշինյանն առանձնացրեց նաև ազատությունը, կրթության, անվտանգության հնարավորությունը:

«Այդ ամենը մենք անում ենք հանուն երջանկության, հիմա երջանկությունը շատ ավելի բարձր նպատակ է քաղաքացու համար, քան պարզապես իրավունքների պաշտպանությունը»,- ասաց նա: