2018 թ. ունեցել ենք տարօրինակ իրավիճակ, մայիս-դեկտեմբերին Հայաստանում հայտնվել է 37 հազար նոր աշխատատեղ. Փաշինյան

ԱԺ «Բարգավաճ Հայաստան» խմբակցության անդամ Միքայել Մելքումյանը խորհրդարանում ՀՀ վարչապետին դիմելով, իր իսկ ձևակերպմամբ, «առանց ինտրիգների» հետաքրքրվեց՝ ներդրողը որ գալիս է, վարչապետին չի հանդիպում, կամ երկրորդ-երրորդ դեմքերին չի հանդիպում, ո՞ւր է գնում, որ իր ներդրումը երաշխավորված լինի:

«240 մլն դոլարի մեքենա-սարքավորումներ են եկել վերջին 10 ամսվա ընթացքում, ամիսը՝ 24 մլն, դա բավական ցածր ցուցանիշ է, այն էլ, եթե մի քանի ուղղությամբ են գնացել, տեխնոլոգիական բեկում չեն կարող ապահովել»,- ասաց նա:

Մելքումյանը նաև հետաքրքրվեց՝ 2018 թ. ո՞ր ոլորտներում և որքա՞ն աշխատատեղ է ստեղծվել:

ՀՀ վարչապետ Նիկոլ Փաշինյանը նախ թարմ տվյալ հրապարակեց, հայտնեց, որ 2018 թ. ընթացքում Հնդկաստանի՝ Հայաստան ժամանած և այստեղ մնացած քաղաքացիների թիվը 2964 է, մի մասն ուսանողներ են, գործարարներ, ներդրողներ, կան նաև քաղաքացիներ:

«Կառավարությունը գործնականում եթե ոչ ամեն նիստի, անընդհատ գերակա ճյուղերի ներդրումային ոլորտում ԱԱՀ-ն հետաձգելու, մաքսատուրքերը զիջելու մասին որոշումներ է կայացնում, մոտ 500 մլն դոլարի ներդրում է իրականացվում կառավարության կայացրած որոշումների շրջանակում, մոտ 4 000 աշխատատեղի մասին է խոսքը: Մենք 2018 թ. ունեցել ենք տարօրինակ իրավիճակ. մայիս-դեկտեմբեր ամիսների ընթացքում Հայաստանում հայտնվել է 37 հազար նոր աշխատատեղ: Մեր կանխավարկածը հետևյալն է՝ առնվազն 30 հազարը ստվերում եղած աշխատատեղերն են, որոնք սկսել են գրանցվել, այստեղ համենայնդեպս, բավական թվով ստեղծվող աշխատատեղեր կան, այս փուլում, դեռ անցյալ տարի եմ ասել, կլինեն փակվող աշխատատեղեր, բացվող աշխատատեղեր, սա տնտեսական տրանսֆորմացիայի մի փուլ է»,- ասաց նա:

Փաշինյանի համոզմամբ՝ տնտեսությունը պետք է վերակազմակերպվի, իսկ կարևորը բալանսն է՝ որքան աշխատատեղեր են փակվում և բացվում: Վարչապետը նշեց՝ կառավարությունն առաջնորդվում է այն տրամաբանությամբ, որ բացվեն անհամեմատ ավելի շատ աշխատատեղեր, քան փակվում են: Կառավարության ղեկավարն ընդգծեց՝ ԵԱՏՄ շրջանակում ոչ քաղաքական, ոչ տնտեսական հեղափոխություն արտահանելու խնդիր չկա, կա հեղափոխության արդյունքում ստեղծված ապրանքներ ու ծառայություններ արտահանելու խնդիր: Նա նշեց՝ ԵԱՏՄ-ն Հայաստանի առանցքային գործընկերներից է, հիշեցրեց՝ Հայաստանը ԵԱՏՄ նախագահող երկիր է:

Մելքումյանն արձագանքեց՝ հիշեցնելով ՊԵԿ նախագահի խոսքերն այն մասին, որ եթե ամբողջապես ստվերը չեզոքացնենք, մեր պետական բյուջեն ընդամենը 130 մլրդ դրամի լրացուցիչ մուտք է բերելու, այսինքն՝ կարելի է ծրագրավորել, որ եթե ակտիվ պայքարեն ստվերի դեմ, ինչ-որ պահի այսքան մուտք է լինելու պետբյուջե, սակայն դա բավարար չէ:

«Ձեր և մյուս տնտեսագետների հետ իմ ունեցած որոշակի դիսոնանսի պատճառն ի՞նչ է, որ մենք կարծես քննարկում ենք, բայց նույն ալիքի վրա չենք: Դուք ասում եք՝ էսքան դրամ, էսքան սարքավորում, ներդրում, միշտ անտեսվում է կոնկրետ այս պահին որևէ գյուղում գտնվող այն քաղաքացու գործոնը, որ մեզ լսում է ու դրա արդյունքում որոշելու է՝ ինչ անի: Մենք փողի խնդիր չունենք, ունենք այդ փողը ճիշտ ինստիտուցիոնալ զարգացման վրա ծախսելու խնդիր: Տնտեսական հեղափոխությունն այն չէ, որ մեկը մեքենա բերեց ու նոր աշխատատեղ ստեղծեց, այլ այն, որ ինչ-որ մարդ վեր կացավ ու քայլ արեց դեպի տնտեսական հեղափոխություն, իսկ այդ մեքենաներն իրենք իրենց կգան»,- ասաց Փաշինյանը: