Ինչո՞ւ են իշխանության պատգամավորները դարձյալ դեմ ընդդիմության առաջարկած նախագծին

ԱԺ պետաիրավական հանձնաժողովում այսօր նիստ է՝ հագեցած օրակարգով: Կքննարկվի 8 հարց, այդ թվում` այնպիսիք, որոնք ներկայացրել են ընդդիմադիրները ու ստացել բացասական եզրակացություն կառավարության կողմից:

Դրանցից մեկը «Բարգավաճ Հայաստան» խմբակցության պատգամավոր Գևորգ Պետրոսյանի ներկայացրած նախագիծն է, որով առաջարկում է վարչական պատասխանատվություն կիրառել տեղական ինքնակառավարման մարմինների կամ պետական այլ մարմինների այն պաշտոնյաների նկատմամբ, ովքեր սահմանված ժամկետում չեն պատասխանի պատգամավորների հարցումներին ու դրանով կխոչընդոտեն նրանց աշխատանքը: Իշխանության ներկայացուցիչները դեմ են՝ պատճառաբանելով, որ դրա համար գործում է կարգապահական տույժի մեխանիզմը, հետևաբար վարչական տույժ կիրառելն անարդյունավետ են համարում:

«Իմ քայլը» խմբակցության անդամ Նիկոլայ Բաղդասարյանը հետևյալ կարծիքը հայտնեց.

«Պետական մարմնում աշխատողը աշխատանքային պայմանագրի հարաբերության մեջ մտնելիս, եթե մյուս պետական մարմնին, ԱԺ պատգամավորին չի տրամադրում նյութը, և դատական կարգով դու ստանում ես, տվյալ աշխատակիցը պետք է ենթարկվի կարգապահական պատասխանատվության հիմնարկի ղեկավարի կողմից, անիմաստ է վարչական իրավախախտման մակարդակի բարձրացնել, այնուհետ բեռ դնել մեկի վրա, որ դիմի դատարան, մինչև դատարանը եռաստիճան քննարկի, ինձ թվում է՝ պատգամավորի ձեր լիազորությունը կավարտվեն, բայց դատը դեռ չի ավարտվի, անարդյունավետ է մեթոդը, արդյունավետ է կարգապահական պատասխանատվության ենթարկելը, որն այս պահին կա, բայց ինչպես դուք եք ասում, գոյություն չունի»:

Արձագանքելով հանձնաժողովի անդամին՝ Գևորգ Պետրոսյանը արձագանքեց.

«Եթե մենք հղում ենք անում մեկս մյուսի խոսքին, ուրիշ բաներ չվկայակոչենք, ասում եք՝ ասել է  կարգապահական պատասխանատվություն գոյություն չունի, ես այդպիսի բա՞ն եմ ասել, այդպիսի բան չեմ ասել, կարգապահական պատասխանատվությունը բոլորին այլ ինստիտուտ է, գործատուի իրավունքն է և չեմ կարող պատգամավորական գործառույթները ծառայեցնել որևէ մեկին իր իրավունքները կատարելու և երկրորդ` ՏԻՄ ղեկավարին ո՞վ է հարկադրելու կարգապահական պատասխանատվության ենթարկել: Խոսքը վերաբերում է վարչական պատասխանատվության: Խոսքն այլ բանի մասին է, նրա մասին, որ եթե դուք` որպես պատգամավոր , ձեր գործառույթն իրականացնում եք, մի հոգի էլ էնտեղ նստած ինքնախաբեության հետ գրկախառնված, թե ինքը էս կյանքում պրոբլեմ չունի, բանի տեղ չի դնում ձեր հարցադրումներին, օրենք լինի, որ նրան զսպաշապիկ հագցնի»:

Պատգամավոր Սուրեն Գրիգորյանը նշեց, որ իր կարծիքը ևս բացասական է նախագծի շուրջ, կառավարության ներկայացուցիչը՝ Արդարադատության նախարարության իրավաբանական վարչության պետը, հայտնեց, որ իրենք ևս առաջարկել ենք, որ նման փոփոխություններ չկատարվեն և շարունակեն ներգործության միջոցները կիրառել քաղաքական պատասխանատվության մեխանիզմների շնորհիվ:

Գևորգ Պետրոսյանի առաջարկն ընդունելի է համարում «Լուսավոր Հայաստան» խմբակցության ներկայացուցիչ Տարոն Սիմոնյանը, որը նշեց.

«Իրավունքի կարևորագույն գործառույթներից մեկն էլ այն է, որ կանխատեսի հնարավոր հարաբերությունները և կարգավորումներ առաջարկի, և պարտադիր չէ նստենք, սպասենք` ինչքան խոշոր խախտումներ պետք է լինեն ՏԻմ կամ պետական այլ մարմինների կողմից, որ նորից հավաքվենք, առաջարկենք վարչական կամ այլ  պատասխանատվություն: Քանի որ արդեն պարոն Պետրոսյանը ընդգծել է, որ կարիքը կա, և առկա իրավակարգավորումները չեն ապահովում պատշաճ վարքագծի դրսևորում, պարոն Պետրոսյանի առաջարկը ողջամիտ է, և ընդվզելն արդարամիտ չէ»: