«Ժողովրդի ծառան»՝ երկրի նախագահ

Ըստ Ուկրաինայի ԿԸՀ-ի նախնական տվյալների՝  Վլադիմիր Զելենսկին 73․2 % ձայներով դարձել է Ուկրաինայի նախագահ: Գործող ղեկավար Պյոտր Պորոշենկոյին ձայն է տվել ընտրողների 24․46 %-ը։ Զելենսկին առաջատար է բոլոր մարզերում` բացի Լվովից, որտեղ Պորոշենկոյին աջակցություն է հայտնել ընտրողների 64%-ը, Զելենսկուն՝ 33%-ը։ Ընտրությունների ընդհանուր արդյունքը Ուկրաինայի պատմության մեջ աննախադեպ է համարվում. դեռևս ոչ մի նախագահ այսպիսի վստահության չի արժանացել։

Վլադիմիր Զելենսկի՝ շոումեն, կատակերգու, սցենարիստ, պրոդյուսեր, իսկ այսօր արդեն` Ուկրաինայի նախագահ: Զելենսկին ծնվել է Ուկրաինայի Կրիվոյ Ռոգ քաղաքում: Մանկության տարիները նա ծնողների հետ ապրել է Մոնղոլիայում, ուր գործուղված է եղել նրա հայրը,  որը տեխնիկական գիտությունների դոկտոր է, ծրագրավորող, ներկայումս Կրիվոյ Ռոգի տնտեսագիտական ինստիտուտի կիբերնետիկայի ֆակուլտետի դեկանն է:

Մայրը ինժեներ է, ներկայումս՝ տնային տնտեսուհի: Ի դեպ, Զելենսկիների ընտանիքը համարվում է հրեական ընտանիք: Ըստ որոշ տվյալների՝ հրեա է միայն մայրը, որոշ լրատվամիջոցներ էլ հայտնում են նաև նրա հոր՝ հրեա լինելու մասին: Սա, իհարկե, չէր կարող թեժ քննարկումների առիթ չլինել:  Բայց շատ վերլուծաբաններ Զելենսկու հրեական ծագումը հենց դրական բնութագրիչ են համարում, այն տրամաբանությամբ, թե Ուկրաինան այս բարդ իրավիճակից դուրս բերելու համար հրեական ինտելեկտ ու բնավորություն է պետք:

Այնուամենայնիվ, Զելենսկու ֆենոմենն իր ազգության և արմատների խորքում չէ թաքնված: Հիմա արդեն Զելենսկու ֆենոմեն արտահայտությունը կապվում է նաև Պյոտր Պորոշենկոյի անվան հետ: Այդ ֆենոմենը Պորոշենկոյի գործունեության արդյունքն է, այն Պորոշենկոյի, որ 5 տարիների ընթացքում չկարողացավ կատարել իր խոստումներն ու երկխոսության մեջ մտնել Ուկրաինայի ժողովրդի հետ:

Պորոշենկոյի պաշտոնավարման տարիներին էլ ստեղծվեց «Ժողովրդի ծառան» սերիալը: Իրական նախագահի վարկանիշի նվազմանը զուգահեռ աճում էր սերիալի և սերիալում գլխավոր հերոսի՝ նախագահի վարկանիշը:

«Այդ որտե՞ղ եք տեսել, որ ծառաներն իրենց տերերից ավելի լավ ապրեն: Գուցե դուք ուղղակի շփոթել եք և ծառայում եք ոչ այն տերերին: Ժողովրդին ծառայելու փոխարեն դուք ծառայում եք օլիգարխներին: Մի՞թե դուք ոչ մի լավ բան չեք ուզում անել այս երկրի համար»,- հատված «Ժողովրդի ծառան» սերիալից։

«Ժողովրդի ծառան» ֆիլմը մի կողմից սովորական պոպուլիզմ է, մյուս կողմից էլ կեսկատակ- կեսլուրջ վերլուծաբանները գրեցին, որ հասարակ ուկրաինացիները կարող են գոնե կինոյում լավ  նախագահ ունենալ: Իրականում այդ սովորական պոպուլիզմը նաև շատ դեպքերում արդյունավետ է եղել և Զելենսկին առաջինը չէ, որ այս ճանապարհով դարձավ երկրի ղեկավար: Օրինակ՝  Ջիմի Մորալեսը  կատակերգուից միանգամից հայտնվեց Գվատեմալայի նախագահի աթոռին:

Իսկ նախկինում դեռ КВН-ից հայտնի Զելենսկին միայն դերասան ու կատակերգու չէր, նա նաև իրավաբանի փայլուն կրթություն էր ստացել․

«Ես ունեմ իրավաբանական կրթություն, և դա առավելություն է: Բայց ես չունեմ քաղաքական գործչի փորձ: Իսկ դա ավելի մեծ առավելություն է»:

Զելենսկուն հաջողվում էր թերությունները որպես առավելություններ ներկայացնել: Սովորական հանդիսատեսի մոտ կասկած չէին  հարուցում  Զելենսկու անկեղծ գուցեև ազնիվ մղումները: Դեռ նախընտրական շրջանից առաջ նա իր բոլոր շոուների ժամանակ  նախագահական թեման կարողանում էր դարձնել  ծայրաստիճան հասարակ  ու կենցաղային:

Հարցին՝ կարելի՞ է դառնալ նախագահ և չգողանալ․ «Առայժմ ոչ ոք չի փորձել»,- պատասխանել է Զելենսկին։

Մեկ այլ հարցի՝ կարելի՞ է գողանալ այնպես, որ ոչ ոք չնկատի, Զելենսկին պատասխանել է․ «Բոլորը փորձել են, ոչ մեկի մոտ չի ստացվել»։

Զելենսկու մոտ ամենաթույլ տեղն ու միևնույն ժամանակ, ըստ որոշ վերլուծաբանների, ամենաուժեղ գործոնը Կոլոմոյսկու անվան հետ էր կապված: Ի դեպ, ազգությամբ դարձյալ հրեա Կոլոմոյսկուն շատերը համարում էին Զելենսկու շարժիչ ուժը, մյուսները՝ խիստ քննադատները, Զելենսկուն համարում էին, շախմատային լեզվով ասած,Կոլոմոյսկու զինվորն ու խամաճիկը: Ասում էին նաև՝ 2.5 միլիոն ուկրաինական գրիվնայի նախընտրական գրավը Զելենսկու համար ևս Կոլոմոյսկին է տալու: Կոլոմոյսկու թեմայից Զելենսկին չէր խուսափում երբեք:

Այնուամենայնիվ, ապրիլի 19-ին կայացած պատմական բանավեճի ժամանակ, որոշ վերլուծաբանների կարծիքով, միակ հարցը, որտեղ Զելենսկին զիջեց Պորոշենկոյին այն էր, որ կապված էր Կոլոմոյսկու հետ:

«Նույնիսկ եթե Կոլոմոյսկին լինի մեղավոր, ապա կհայտնվի ճաղերի հետևում»,- պատասխանել էր Զելենսկին կոռուպցիայի վերաբերյալ հարցին:

Բայց նա շատ ավելի ուժեղ հարցադրումներ էր ուղղել Պորոշենկոյին․

«Պարո ՛ն նախագահ, ես 2014-ին քվեարկել եմ Ձեր օգտին, բայց այսօր կանգնած եմ այստեղ: Ես Ձեր սխալն եմ»:

Զելենսկու այս խոսքերի մի մասն արդեն իրականություն է: Նա եկել է և արդեն նախագահ է, որը մրցակցին հաղթել է եռակի անգամ շատ քվեներով: Ի դեպ, Ուկրաինայի նոր առաջնորդն աշխարհի ամենաերիտասարդ նախագահներից մեկն է: Վլադիմիր Զելենսկին ծնվել է 1978 թվականին և ընդամենը 42 տարեկան է: