Դիտորդական առաքելության խմբերը կարևորում են առաքելության իրականացումն Արցախի ՏԻՄ ընտրություններում

Արցախում 2019թ. սեպտեմբերի 8-ին տեղի կունենան տեղական ինքնակառավարման մարմինների ընտրություններ, որի ժամանակ դիտորդական առաքելություն իրականացնելու նպատակով կառավարությունը պահուստային ֆոնդից գումար կհատկացնի: Արցախում կայանալիք ՏԻՄ ընտրություններին դիտորդական առաքելություն իրականացնելու համար ցանկություն են հայտնել «Իրազեկ քաղաքացիների միավորում» հասարակական կազմակերպությունը և «Թրանսփարենսի ինթերնեշնլ» հակակոռուպցիոն կենտրոնը: Այդ կենտրոնների ներկայացուցիչներն այսօր կայացած ասուլիսի ընթացքում կարևորեցին դիտորդական առաքելության իրականացումն Արցախում՝ արդար, թափանցիկ ընտրությունների անցկացման առումով:

«Խնդիրն այն է, որ քաղհասարակության կառույցների ֆինանսավորման լուրջ պակասի պատճառով Արցախում քաղաքացիական հասարակության կառույցները բավականին թույլ մակարդակի վրա են: Դա մենք դիտարկում ենք որպես Արցախում կարևորագույն խնդիրներից մեկը, որի կարողությունների զարգացման մի կարևոր բաղադրիչ հանդիսանում է նաև ընտրությունների դիտորդական առաքելության իրականացումը»,- ասաց «Թրանսփարենսի ինթերնեշնլ» հակակոռուպցիոն կենտրոնի ընտրական ծրագրերի համակարգող Ալեքսեյ Պետրոսյանը:

Դրամաշնորհի գումարները, որոնք շահարկումների տեղիք տվեցին, ծախսվելու է բացառապես Արցախում՝ սկսած տարածքների վարձակալությունից, վերջացրած դիտորդների վճարումով և այլ գործարքների իրականացմամբ, լրագրողներին վստահեցրեց «Իրազեկ քաղաքացիների միավորման Ստեփանակերտի գրասենյակ»-ի գործադիր տնօրեն Վահրամ Թոքմաջյանը` նշելով, որ բոլոր այն գումարները, որոնք չեն ծախսվի, կոպեկ առ կոպեկ հետ կվերադարձվեն բյուջե: Վահրամ Թոքմաջյանը նշեց, որ իրենք բաց են և մտահոգները կարող են դիմել աուդիտ իրականացնող կազմակերպություններին:

«Շվեդիայում ընտրակեղծիքներ չեն լինում շատ վաղուց, բայց Շվեդիայում կան դիտորդական առաքելություններ: Դիտորդական առաքելությունները ընտրական մշակույթի մի մասն են, որոնք էլ ավելի են լեգիտիմացնում ընտրական գործընթացը և շատ ավելի լավ է, որ այս գործընթացում ներգրավված են հայաստանյան կազմակերպություններ և շատ ավելի լավ է, որ հայաստանյան կազմակերպություններն ունեն արդեն մասնաճյուղեր Արցախում և արցախցիներն են ներառված վերահսկողական մեխանիզմերի մեջ»,- ասաց Թոքմաջյանը՝ անդրադառնալով հնչած քննադատություններին, որ սա Հայաստանի կողմից միջամտություն է Արցախի գործերին:

«Թրանսփարենսի ինթերնեշնլ» հակակոռուպցիոն կենտրոնը նախատեսում է ունենալ 50 դիտորդ Արցախից, 50 դիտորդ Հայաստանից: Կլինեն նաև 10 շրջիկ խմբեր Արցախի տարբեր շրջաններում: Դիտորդությունը կիրականացվի զույգերով՝ 1-ը Արցախից, մյուսը՝ Հայաստանից, ինչը, ըստ Ալեքսեյ Պետրոսյանի, նաև փորձի փոխանակման լավ առիթ է Արցախի քաղաքացիական ակտիվիստների կարողությունների զարգացման առումով: