5 ամենաօգտակար նախաճաշերը դպրոցականների համար

Նախաճաշից հրաժարվելը բացասական ազդեցություն է ունենում օրգանիզմի վրա: Նախաճաշը՝ հատկապես  դպրոցականների համար պետք է հարուստ լինի կալորիաներով, պնդում են սննդաբանները: Այն պետք է լինի սննդարար, որ երեխան օրվա սկզբին էներգիա ստանա: Այդպիսի սնունդը բարձրացնում է մտավոր ունակությունները, աշխատունակությունը, ֆիզիկական դիմադրողականությունը, կարգավորում է մարսողական համակարգը:

 Չոր նախաճաշ

Դրանք քաղցրահամ գնդիկներն են, փաթիլները, որոնք երբեմն երեխաներն այդպես են ուտում, լավագույն դեպքում՝ փափկեցնում կաթով: Դրանց հիմնական թերությունն այն է, որ  մեծ քանակի շաքար են պարունակում, միանգամից բարձրանում է արյան մեջ շաքարի պարունակությունը և սկսում է ակտիվորեն  ինսուլին արտադրվել: Այդպիսի նախաճաշով սնվելու դեպքում կարող են առաջանալ շաքարային դիաբետ, ճարպակալում, ալերգիկ ռեակցիաներ և ստամոքսի խանգարում: Այդ պատճառով չոր նախաճաշ կարելի է թույլ տալ ոչ հաճախ, քան շաբաթը մեկ անգամ:

Շիլաներ՝ նրբերշիկի փոխարեն

Եթե քնած եք մնացել և ուշանում եք, փոքրիկին կարելի է կերակրել արագ եփվող շիլաներով: Դրանցում քիչ ածխաջրեր կան, որոնք, ի դեպ, վերածվում են գլյուկոզայի, և համեմատաբար շատ բջջանյութ կա, քան չոր նախաճաշերում:  Բայց այդ շուտ եփվող կամ ընդհանրապես եփելու կարիք չունեցող շիլաներն էլ այդքան օգտակար չեն: Բանն այն է, որ շուտ եփվող վարսակի փաթիլները ուշ եփվողից տարբերվում են նրանով, որ առաջիններից հեռացված է կեղևը: Դրա  հետ նաև՝ օգտակար նյութերի մեծ մասը, հենց կեղևի բացակայության հաշվին էլ փաթիլները շուտ են եփվում:

 Հիշեք աքսիոման՝ որքան շուտ եփվող է շիլան, այնքան նրանում օգտակար նյութերը քիչ են: Դա նշանակում է՝ երեխան 1-1.5 ժամ հետո սոված կլինի, քանի որ բջջանյութը քիչ է: Մինչդեռ ամբողջական հատիկների փաթիլներից եփած շիլան կուշտ է պահում մոտ 5 ժամ: 

Պետք չէ  չարաշահել նաև երշիկներն ու նրբերշիկները: Դրանցում էլ  չափազանց մեծ քանակությամբ աղ և ճարպ կա, ինչը վնաս է  երեխաների օրգանիզմին: Չէ՞  որ դուք չեք  ցանկանում, որ փոքրիկը  հոդերի և անոթների խնդիրներ ունենա:

5 ամենաօգտակար նախաճաշերը

Հացահատիկ, ձու, կաթնամթերք՝ սրանք դպրոցականների նախաճաշի  հինգ ամենակարևոր բաղկացուցիչներն են, քանի որ պարունակում են դանդաղ ներծծվող ածխաջրատներ և սպիտակուց:

1. Շիլա 

Լավ կլինի ամեն օր տարբեր շիլաներ պատրաստեք: Հնդկաձավարի, վարսակի, եգիպտացորենի, գարու շիլաները պարունակում են բազմաթիվ կարևոր վիտամիններ ու հանքանյութեր: Մինչդեռ սպիտակաձավարի շիլան այնքան էլ օգտակար չէ՝ դրանում բջջանյութ գրեթե չկա:

Երեխաների համար ցանկալի է շիլան պատրաստել կաթով։ Առողջապահության միջազգային կազմակերպության խորհրդով երեխան օրական պետք է ստանա  նվազագույնը երկու բաժին կաթնամթերք՝ ասենք 250 գր կաթ, 30 գր պանիր: Բացի այդ, կաթի հետ հացահատիկային բոլոր վիտամինները լավ են յուրացվում:  Մանկական շիլային կարելի է ավելացնել մի փոքր կարագ, չամիչ, մեղր կամ քունջութ: Իսկ մրգեր՝  չարժե: Միրգը պետք է ուտել սնվելուց մոտ 2 ժամ առաջ կամ 2 ժամ անց:

2. Կարագ, պանիր ու հաց  

Կարագը միակ կենդանական սպիտակուցն է, որը ներառված է բոլոր դիետիկ սննդակարգերում: Բանն այն է, որ դրանում մեծ քանակի հեշտ յուրացվող վիտամիններ կան՝ A, E,D, K: Բացի այդ, կարագը պարունակում է  հագեցած ճարպաթթու և լիարժեք  սպիտակուց: Այնպես որ, շաբաթը երկու անգամ ՝ հացով կարագ և պանիր՝ փոքրիկի համար:

3. Կաթաշոռների տեսականի

Որպեսզի երեխան շիլաներից չձանձրանա կարելի է դրանք երբեմն փոխարինել կաթնաշոռային թխվածքներով կամ սմուզիներով: Հարեք 5.5 տոկոս յուղայնությամբ կաթնաշոռը մրգերով կամ հատապտուղներով՝ և՛ համեղ է, և՛ անչափ օգտակար ու հագեցնող: Կարելի է նաև փոքրիկ թխվածքաբլիթներ պատրաստել կաթնաշոռով: Դրանք արագ են պատրաստվում և օգտակար են:

4. Ձվածեղ, օմլետ 

Ձվով պատրաստվող նախաճաշով կարելի է երեխային կերակրել շաբաթը 2-3 անգամ:  Ձվածեղն ու օմլետը կարելի է պատրաստել կանաչիներով, բանջարեղենով, հավի կամ հնդկահավի մսով: Կամ պատրաստեք ձվով բրդուճ, չմոռանաք հացին քսել նաև կարագ:

5. Նրբաբլիթներ 

Նրբաբլիթներ վարսակի կամ հնդկաձավարի ալյուրով, դդումով, խնձորով, բանանով: Դրանք նույնպես օգտակար են, համեղ ու հագեցնող:

 Ի դեպ՝

Մակարոնը նույնպես վատ տարբերակ  չէ: Այդպիսի ածխաջրատային նախաճաշը կարելի է պատրաստել ցանկացած բանջարեղենով՝ բրոկոլի, բուլղարական պղպեղ, սմբուկ, կարելի է ավելացնել նաև խաշած թռչնամիս, համեմել զեյթունի ձեթով և քերած պանրով՝ ահա այն ամբողջ վիտամինային «փունջը», որը  դպրոցականին կուշտ և աշխույժ կպահի մինչև կեսօր: