Քաղաք, որտեղ բոլորը բոլորին բարևում են, բոլորը բոլորին զիջում են, բայց չեն սպասարկում` ահա ջուրը, ահա տոպրակը՝ վերցրու ինքդ դիր տոպրակի մեջ. Հռոմը՝ հավերժական քաղաքը

Հայկական Հռոմը

Հռոմը եվրոպական առաջին քաղաքն էր, որ ես տեսա: Իսկ դա նշանակում է, որ եվրոպական որ քաղաքն էլ այսուհետ տեսնեմ` առաջինը Հռոմի հետ եմ համեմատելու:

Հռոմի հետ առաջին ծանոթությունս սկսվեց, բնականաբար, օդանավակայանում: Վայրէջքից հետո 1:45 ժամ հերթ և հետո` կորած իրեր: Հերթը հայկական հերթերին նման չէր` հերթ առաջ գցողներ չկային, բայց կորած իրերը գտնելու հարցում` օդանավակայանի աշխատակիցներն ու ոստիկանությունը մեկը մյուսի վրա էին գցում: Դա Հռոմի և հայկականի առաջին նմանությունն էր: Մյուս նմանությունը խցանումներն էին. մոտ 30 կմ ճանապարհն անցանք մոտ 2 ժամում: Հայկական էին նաև Հռոմի փողոցների գծանշաններն, ու ասֆալտն էր հայկական: Այստեղ ու այսքանով հայկական Հռոմն ավարտվում է ու սկսվում է ՍՊԻՏԱԿ ԳՈՒՅՆԻ ՔԱՂԱՔԸ:

ՍՊԻՏԱԿ ԳՈՒՅՆԻ ՔԱՂԱՔԸ

Քաղաք, որտեղ փողոցները նեղ են ու մարդաշատ, բայց չկա ո՛չ մեքենայի ազդանշան, ո՛չ վթարված մեքենա:

Փոքր մեքենաների ու մեծ ճամպրուկների քաղաք, որտեղ քայլելիս ոչ թե ոտքերի տակ, այլ կողքերն է պետք նայել:

Դանդաղ քայլելու և արագ կողմնորոշվելու քաղաք, որտեղ պետք չէ գնալ ֆոտոխցիկով․ ֆոտոխցիկ պետք է դարձնել աչքերը` նկարելու, արժանին ամեն քայլափոխին է, իսկ նկարներում այն չի ստացվում, ինչ տեսնում են աչքերը: Քաղաք, որտեղ ոտքիդ տակ չես զգում անցնող կիլոմետրերը. շտապողներ չկան, համբուրվողներ՝ ինչքան ասես:

Քաղաք, որտեղ մուրացկաններն արձանի տեսքով են` միայն:  4 օր, 30 կմ ձգվող զբոսանք կենտրոնում, հարյուրավոր զբոսաշրջիկներ, առևտրականներ, բայց ոչ մի մուրացկան, ճիշտ այնպես, ինչպես ոչ մի թափառող կենդանի:

Քաղաք, որտեղ բոլորը բոլորին բարևում են, բոլորը բոլորին ժպտում են, բոլորը բոլորին զիջում են, բայց չեն սպասարկում` ահա ջուրը, ահա տոպրակը՝ վերցրու ինքդ դիր տոպրակի մեջ:

Քաղաք, որտեղ սրճարանում անձեռոցիկը պիտի խնդրես, որ բերեն, 2 հատ ուզելու դեպքում` 2 անգամ է պետք խնդրել: Դանդաղ, բարձր և երկար խոսացող մարդկանց քաղաք, որտեղ ժամանակի զգացողությունը ամենաթույլն է զարգացած:

Քիչ տաքսիների ու մեծ ավտոբուսների քաղաք, ծխող աղջիկների ու կոստյումով տղաների քաղաք: Քաղաք, որտեղ երբեք չես գտնի քո արտացոլանքը շենքերի մեջ՝ ապակյա երկնաքերներ Հռոմում փնտրել պետք չէ:

Քաղաք, որտեղ տեսարժան վայրեր էլ փնտրել պետք չէ, որ նրբանցքով էլ թեքվես, որ փողոցն էլ հատես, միևնույն է, տեսարժան է:

Քաղաք, որտեղ կիսաքանդ հին շենքերը ոչ թե վերակառուցվում են, այլ վերականգնվում, եթե չեն էլ վերականգնվում ՝ պահպանվում են՝ այնպես, ինչպես կան: Ու հենց այսպես էլ՝ էլի գրավում են զբոսաշրջիկներին:

Քաղաք, որտեղ ականջիդ մեջ հատվում են տասնյակ լեզուներ, որտեղ ժեստերի լեզուն ամենահաճախ հանդիպողն է:

Քաղաք, որտեղ աղբը շատ է, աղբահոտ չկա, աղբամաններն էլ ո՛չ մայթն են նեղացնում, ո՛չ փողոցը:

Քաղաք, որտեղ ռեստորան է մայթին տեղադրած 2 սեղան 8 աթոռն էլ. համն է կարևորը:

Կանաչի ու ծաղկի քաղաք, որտեղ ծառերը նույնիսկ չեն ստվերում անցյալը:

Կոլիզեում

Հռոմի հնագույն արմատներն ապացուցող ու խորհրդանիշ դարձած տեսարժան վայրերից մեկը ՝ ամֆիթատրոնը՝ աշխարհին հայտնի Կոլիզեումը, որի պատմությունը սկսվում է մ․թ. 68թ․-ին: Այն  աշխարհի 7 հրաշալիքների շարքում է, որտեղ հին ժամանակներում իրականացվող մարտերի ընթացքում մոտ 50.000 այցելու էր տեղավորվում:

Դարեր հաղթահարած Կոլիզեումն ավելի քան 10 000 կենդանու և մոտ կես միլիոն մարդու մահվան վկան է դարձել: Դարերի ընթացքում այն վերապրել է մեծ հրդեհներ, երկրաշարժեր, բարբարոսների արշավանքներ, անգամ դարձել է շինանյութի նոր աղբյուր ՝ նոր շինությունների կառուցման համար: Անտիկ Կոլիզեումը պահպանելու ու վերագնահատելու փորձեր են արվել Հռոմի Պապերի կողմից….

Ժամանակի ճիրաններից փրկված Կոլիզեումն այսօր համաշխարհաին զբոսաշրջության կենտրոն է: Այն վերածվել է անտիկ համերգասրահի, որտեղ օպերաների ու համերգների տոմսերն ամենաարագն են սպառվում: Ի դեպ,  Փոլ ՄաքՔարթնին առաջին ռոք երաժիշտն էր, որ արժանացել է Կոլիզեումում համերգ տալու պատվին:

Կոստանդինոսի հաղթակամար

Հաղթանակի հուշարձանը, որ կառուցվել է ոչ թե արտաքին, այլ ներքին թշնամու դեմ տարած հաղթանակի պատվին:
Հռչակավոր Կոլիզեումի մոտ գտնվող ազդեցիկ հաղթակամարի ստեղծման պատմությունը նույնքան ազդեցիկ ու խորհրդավոր է: Ճակատամարտի նախորդ օրը Կոստանդինոսին ու զորքին երևում է երկնքում ուրվագծվող լուսեղեն խաչի նշան, իսկ այդ գիշերը Կոստանդիանոս Մեծի երազում հայտնվում է Հիսուս Քրիստոսը՝ նույն նշանով, և պատվիրում, որ նա խաչի պատկերը զետեղի դրոշների ու զինվորների զրահների վրա՝ իբրև հաղթության և զորութան խորհրդանիշ:

Հետևելով խորհրդավոր հրամանին՝  Կոստանդիանոսի սակավաթիվ բանակը թշնամու հանդեպ լիակատար հաղթանակ է տանում: Հենց այդ հաղթանակի պատվին է Կոստանդինոս Մեծը 315-ին Հռոմում կառուցում հսկայական հաղթակամար, որը կանգուն է մինչև այսօր: Քիստոնեությունը դավանող առաջին կայսեր՝ Կոստանդինոս Մեծի հաղթակամարն ունի 21մ բարձրություն և մոտ 30մ լայնություն, զարդարված է պատմական կարևոր դրվագներ պատկերող քանդակներով:

Տրևի շատրվան

Բարձրությունը 26.3 մ է, իսկ լայնությունը` 49.15 մ: Հռոմի ամենախոշոր և աշխարհի ամենահայտնի շատրվաններից մեկը։

Ոճը՝ բարոկկո, ճարտարապետը՝  Նիկոլո Սալվին, ստեղծման թվականները՝  1732-1762 թթ․։

Եթե ձեր սիրելիի հետ եք այցելել Հռոմ, ապա ամեն դեպքում զգուշացեք Տրևի շատրվանի ծորակներից միաժամանակ ջուր խմել: Լեգենդը պատմում է, որ ովքեր այդպես վարվեն, նրանց սերը կմարի, երբ ծորակները ցամաքեն: Ի դեպ  ծորակներն առատ են  ու միշտ հոսուն 1730-ականներից:

Զբոսաշրջիկները նաև հավատում են, որ եթե ջրավազանի մեջ մետաղադրամ նետեն, մի օր անպայման վերադառնալու են Իտալիա: Օրական ավելի քան 3000 եվրո է հավաքվում այստեղ:

Բոլոր ճանապարհները տանում են Հռոմ

Քաղաք, որն ունի 2500 տարվա պատմություն և այդ պատմությանը ծանոթանում ես քաղաքում քայլելով և ոչ թե գրադարաններում պատմության գրքերը կարդալով: Համաշխարհային քաղաք, որը 2014 թվականին համարվել է 14-րդ ամենահաճախ այցելվող քաղաքն աշխարհում, երրորդ ամենաշատ այցելվողը Եվրոպական Միությունում և ամենահանրաճանաչ տուրիստական վայրը Իտալիայում։ Դրա պատմական կենտրոնը ՅՈՒՆԵՍԿՈ-ի կողմից ճանաչվել է Համաշխարհային մշակութային ժառանգություն։

Քաղաք, որտեղ հանդիպում ես ուրիշ դարերի, որտեղ քեզ զգում ես ուրիշ դարերում՝  հռոմեական բանակների, առևտրականների քարավանների, մեծ մտածողների կողքին:

Տեսնել Հռոմը, նշանակում է տեսնել անցյալը։

Քաղաք, որը քեզ ստիպում է ավելի հաճախ վերև նայել՝ բառի բուն իմաստով: Այս քաղաքում վերևից ներքև հսկողներ կան: