Գյումրիի Մուշ 2/2 թաղամասի հրապարակի շինարարության վերջնաժամկետը դարձյալ հետաձգվել է

Մուշ 2/2 թաղամասում շուրջ երեք հեկտար տարածքի վրա կառուցվող հրապարակի շինարարությունը մեկուկես տարի անց դեռ անավարտ է: Շինարարը՝ «Վահրադյան» շինընկերությունը, խախտել է պայմանագրի ժամկետները, աշխատանքները կատարել է թերություններով, ինչի պատճառով պատվիրատուն՝ Գյումրիի քաղաքապետարանը, որոշել է ոչ թե լուծարել շինընկերության հետ կնքած պայմանագիրը, այլ հետագա շինարարությունը վստահել է ենթակապալառու կազմակերպության` սա հիմնավորելով կրկնակի մրցույթ չհայտարարելու և ժամանակ խնայելու բացատրությամբ:

Պարբերաբար դադարներով ընթացող շինարարությունը հիմա վերսկսվել է: Հրապարակի կառուցումը սուբվենցիոն ծրագրով է` կառավարության և hամայնքի համատեղ ֆինանսավորմամբ: Գումարի 30 տոկոսը հատկացվել է Գյումրիի բյուջեից:

Նոր շինարարը, որը ենթակապալառու ընկերություն է և ըստ էության` համարվում է «Վահրադյան»-ի  ենթակա կազմակերպություն, ինչ մտել է շինհրապարակ, թերություններն է վերացնում: Կիսատ թողածը սկսել են շարունակել, բայց  սալաքարերի շարվածքը չի համապատասխանում, սալիկների դասավորվածությունը խախտվում  է, չի պահպանվում հավասարաչափությունը:

Միայն շարվածքը  չէ, որ թերություն է այս հրապարակի շինարարության մեջ: Սալաքարերը, որոնք շարվել էին աշնանը, գարնանն արդեն պոկվել էին, բազալտե եռագույն քարերն առանց կողմնակի ազդեցության փշրվել են: Շինարարը փոխելու է նաև եզրաքարերը:

Մրցույթը շահած «Վահրադյան» շինընկերությունը շինարարությունը շարունակեց մեկուկես տարի, բայց չհասցրեց` 2018 թվականի դեկտեմբերի 1-ին էր նախատեսված բացել հրապարակը: Մեկ տարի շինընկերությունը ժամկետները խախտելու պատճառ էր նշում նախագծային փոփոխությունները՝ մեղավոր ճանաչելով պատվիրատուին:

Արարատի մարզում գործող շինընկերության տնօրենը հիմա այլ բան է պնդում` ժամկետի խախտումներ թույլ չեն տվել:

«Վահրադյան» շինընկերության խնդրանքը պատվիրատուն չի մերժել: Քաղաքապետարանը շինարարության ավարտի ժամկետները խախտած ընկերության հետ պայմանագիրը չի լուծարել, բայց կիրառել է տույժ ու տուգանք` փոխարենը աշխատանքը վստահելով նույն ընկերության ենթակապալառու հանդիսացող շինկազմակերպության:

«Դա մեր խնդիրը չէ, դա շինարարի խնդիրն է, շինարարը պետք է ամբողջությամբ կառուցի ու հրապարակը հանձնի համայնքին, յուրաքանչյուր թերությունը պետք է վերացնի»,- ասել է Գյումրիի քաղաքապետարանի քաղաքաշինության և ճարտարապետության բաժնի պետ Արթուր Հակոբյանը:

Ենթակապալառու կազմակերպությունը ունի պայմանագիր «Վահրադյան շինի» հետ, որի մասին ընկերության տնօրենը  չխոսեց, իսկ ենթակապալառուի շինարարներն էլ համաձայնել են միայն հրապարակի սալապատումն ավարտել: Թե ովքեր ու երբ են կառուցելու ջրավազանը, պատվիրատուն դեռ պատասխան չունի, բայց մեկ ու կես տարի ձգվող շինարարությունը վերջապես ավարտելու, Մուշի բնակիչներին գեղեցիկ հրապարակ նվիրելու հույսեր ունի:

Աշխատանքների երկարաձգման, շինարարության հաճախակի դադարների այլ պատճառներ էլ են եղել, որի մասին մեկ ու կես տարի չեն խոսել շինարարները: Արդեն նախկին 4 բանվորներից մեկը, որը եկել էր շինհրապարակ, օգոստոս-սեպտեմբեր ամիսների աշխատավարձն էր պահանջում:

Ամբողջ տարին աշխատել են 4 շինարարով, որոնք հիմնականում աշխատավարձերի ուշացումների պատճառով հրաժարվել են աշխատել, թողել-գնացել են, իսկ ինքն էլ հիմա մնացել է անգործ։ Նոր շինարարը` ենթակապալառու ընկերությունը, այս պահին աշխատուժի պակաս չունի: Աշխատում են 20 շինարարով, մի քանի օրից նրանց թիվը կավելանա:

2300 քմ տարածքի սալապատման ու այլ աշխատանքների համար բանվորական ուժի կարիք է զգացվում: