Գյումրեցի երիտասարդի պատրաստած փայտե պայուսակների ինքնատիպ մոդելները հետաքրքրել են տեղացի ու օտարազգի գնորդներին

Նորաձևությունը համարձակություն է, ծնվում է մարդու երևակայությունից, դառնում մոդայիկ, թրենդային ու ճաշակ թելադրում: Հենց այդպիսի համարձակ գաղափարով է ներկայանում գյումրեցի Ժորա Մանուկյանը, որ կանանց առաջարկում է թանկարժեք կաշվից ու կտորից իրենց պայուսակները փոխարինել փայտե պայուսակներով:Դրանք նաև էկոլոգիապես մաքուր են, ինչը յուրահատուկ դիզայնով պատրաստվող պայուսակների գլխավոր առանձնահատկությունն է: Ժորայի ցանկությունն է՝ գյումրեցի արհեստավորների հետ համատեղ արտադրանքը ճանաչելի դարձնել նաև միջազգային շուկայում:Առաջին հայացքից թռչնաբույն հիշեցնող փայտե այս արկղիկներն իրականում նախատեսված են պայուսակներ պատրաստելու համար: Կրեատիվ գաղափարը գյումրեցի Ժորա Մանուկյանի մտքում ծնվել է 3 ամիս առաջ, երբ համացանցում տեսել է արտերկրում արտադրվող փայտե պայուսակների լուսանկարները: Փայտե նորաձևությունը Հայաստանում փորձարկելու արդյունքը՝ արտադրանքն է, որը նորույթ է տեղի շուկայում:

Առաջին փորձնական օրինակը Ժորան պատրաստել է կնոջ համար: Փայտե անսովոր առաջին պայուսակը շատ արագ պահանջարկ է ձևավորել: Գնորդները նրանք են, որոնք ուզում են ինքնատիպ երևալ ու կրել ձեռքի աշխատանք պայուսակներ:

«Կօգտագործեն այն մարդիկ, որոնք տարբերվող են, կսիրեն շրջապատից տարբերվել։ Այն նորույթ է, մեր մոտ չկա, շատերը ծանոթ չեն, շատերն առաջին անգամ կտեսնին, նկատել եմ, հետաքրքրվողները միշտ տարբերվող մարդիկ են եղել»,- ասում է կրեատիվ գաղափարի հեղինակ Ժորա Մանուկյանը։Նորաձևության նմուշների համար հումքը գյումրեցի արհեստավորներն են պատրաստում: Ժորա Մանուկյանը դեռ համապատասխան սարքավորումներ չունի: Փայտե պատյանին հետո աստիճանաձև կտրվածքներ է տալիս, փականներ ու կաշվե դետալներ ավելացնում: Փայտանյութի ընտրության հարցում էլ չափորոշիչներ կան: Պայուսակը նախ պետք է թեթև լինի և հարմար դիզայներական լուծումներ ստանալու համար:«Ընտրում ենք չորացած փայտը, որ հետո չդեֆորմացվի ջրից ու խոնավությունից, որակային վնաս չհասնի, ընտրում եմ թեթև փայտի տեսակները, հիմնականում հաճարենիներ, որոնք ունենում են երբեմն նաև բնական երանգավորում ու ոստեր, որոնք գեղեցկացնում են պայուսակները»,- նշում է պայուսակների հեղինակը։Պատրաստի պայուսակներն առավելագույնը կես կիլոգրամ են կշռում։ Ժորան նաև ստեղծել է ապրանքանիշ: Բրենդային անվանումը խորհրդանշում է Գյումրին ու հայկական զարդանախշերը: Փայտե պայուսակները ներկայացվում են մի անվանման տակ, որը օտարերկրացիներին գյումրեցի, ավելի ճիշտ ալեքպոլցի  վարպետների հմուտ աշխատանքը ցույց կտա:«Լոգոն ALEX-POL»-ն է, մտածեցի մեր գյումրվա Ալեքպոլ անունի հետ կապված լոգո էղնի։ Երկար ենք մտածել, վերջնական ստացանք այն, ինչը որ մեր քաղաքի հետ է կապված»,- ասում է հեղինակը։Էկո պայուսակների փոքրիկ արտադրությունն առայժմ նույնքան փոքրիկ տաղավարում է ներկայացված, որտեղ տարբերվող արտադրատեսակի մասին հիշեցնող ցուցանակ անգամ չկա: Բայց կա գործն ընդլայնելու ցանկություն և պայուսակների նոր տեսականիների էսքիզներ:

Ինքնուս դիզայները պայուսակները նախագծում է նորաձևության պահանջներով, բայց իր ուրույն լուծումներով: Արտադրության ընդլայնումը գյումրեցի երիտասարդի ապագայի ծրագրերում է: Ինչպես բոլոր հաջողակ դիզայներների պատմություններում է, ամենամեծ ձեռքբերումը համարում է այն, որ օրերից մի օր փայտե պայուսակները Գյումրիից կհասնեն համաշխարհային նորաձևության կենտրոններ՝ «պատրաստված է Հայաստանում» պիտակով: