Տնտեսվարողը կշարունակի՞ գործունեությունը, եթե խափանվի ՀԴՄ սարքը. օրենքի նախագիծ ԱԺ-ում

ԱԺ տնտեսական հարցերի մշտական հանձնաժողովում այսօր քննարկվել է «Հայաստանի Հանրապետության հարկային օրենսգրքում լրացում կատարելու մասին» նախագիծը, որի հեղինակը «Բարգավաճ Հայաստան» խմբակցության պատգամավոր Միքայել Մելքումյանն է:

Նրա առաջարկած փոփոխությունը վերաբերում է ՀԴՄ-ների խափանումների դեպքում ստեղծվող իրավիճակների լուծումներին:

«Առաջարկում եմ ժամային սահմանափակում դնել, երբ խափանվում է կամ տեխնիկական պրոբլեմ ունի, չկա սահմանված կարգով ժամային սահմանափակում, և մեր հետազոտությունները ցույց են տալիս, որ որևէ ռեժիմ չկա, թե ինչքան ժամանակով պետք է տրամադրեն փոխարինողը, օրենքը արգելում է, որ եթե ՀԴՄ-ն շարքից դուրս գա, որևէ գործունեություն ծավալել: Մենք երկու սահմանափակում ենք դնում, առաջին՝ աշխատակիցը, որ աշխատում է մինչև առավելագույնը 3 ժամվա ընթացքում իրավասու ղեկավարին տեղեկացնի, և դրանից հետո, երբ հայտը ստացվում է, 24 ժամվա ընթացքում սպասարկման կենտրոնը կարողանան նորը տրամադրի, 10 ժամվա ընթացքում տրամադրվում է ՀԴՄ, որպեսզի տնտեսվարողն աշխատի և վնասներ չկրի»,- ներկայացրել է Մելքումյանը:

Կառավարության եզրակացության համաձայն՝ ժամային սահմանափակումների հետ կապված խնդիր չկա, բայց հեռավոր համայնքների վերաբերյալ ժամային սահմանափակումը կարող է լինել ոչ թե 24, այլ 48 կամ ավելի ժամ: Մելքումյանը դեմ չէ:

ՀՀ ֆինանսների նախարարի տեղակալ Արման Պողոսյանը հայտնեց, որ նախագծով կարգավորումները կան կառավարության համապատասխան որոշման մեջ, բացառությամբ ժամային սահմանափակումների:

«Այո´, կառավարությունը համաձայն է ժամկետային սահմանափակումներ նախատեսելու սահմանափակումների հետ, սա, մի կողմից, իրավունքների պաշտպանություն է տնտեսվարողների մոտ, մյուս կողմից` կարգապահություն կհաղորդի գործընթացին, սակայն երբ ուսումնասիրում ենք օրենքների տրամաբանությունը, մի սկզբունք կա, որ հիմնական կարգավորումները գրվում են օրենսգրքում, իսկ դրանց կիրառությունն ապահովող շատ մասեր, գրվում են կառավարության որոշման մեջ: Առաջարկում ենք ամրագրել կառավարության որոշման մեջ»,- ասաց Պողոսյանը:

Մելքումյանը հայտարարեց, որ ՀԴՄ սարքերը նախկինում 6-7 կազմակերպություն ներկրում էր, հետո դադարեցվեց, նաև սպասարկումը  փոխվեց:

«Հիմա արձանագրում ենք, որ եթե ժամկետ չկա, եթե սպասարկման կենտրոնը սուբյեկտի հետ ունի պայմանագիր, ենթադրենք` չի սպասարկում, գնա դատարաններ և այլն, ի՞նչ է անելու, մեկ օրվա կամ ժամվա օգուտը չես էլ կարող գնահատել, դա բարդ բան է, ու չի էլ սպասարկում տնտեսվարող սուբյեկտի շահը, մենք գրել ենք ժամային սահմանափակում, կառավարությունը առարկություն չունի, երկրորդ, եթե կառավարության որոշմամբ է, անելիք չունեմ, եթե օրենքով է, ունեմ»,- մտահոգությունների մասին հայտնեց նա:

Պատգամավորները այլ հարցեր ևս բարձրացրին, սակայն ընդհանուր եզրակացության չեկան, նախագծի հեղինակի առաջարկությամբ՝ քվեարկությունը հետաձգվեց երկու ամսով: