Գյումրիում դիակիզարաններն անհրաժեշտություն են, բայց նոր արարողակարգի ներմուծումը՝ բնակչության համար առայժմ անընդունելի

Մինչև տարեվերջ Երևանում շահագործման կհանձնվի 2 դիակիզարան: Դրանց կառուցմամբ հուղարկավորման նոր արարողակարգ մուտք կգործի մեր իրականություն: Եկեղեցին դեմ չէ այս նորամուծությանը, բայց շահագրգռված էլ չէ հուղարկավորման այս եղանակին: Իսկ ինչու դիակիզարանները անհրաժեշտություն դարձան: Պատճառը միայն մեկն է, հուղարկավորություն կատարելու համար ազատ հողատարածքներ չկան:

«Երկխոսությունների Մեդիա» կենտրոնում այսօր խնդրի քննարկմանը, քահանայից բացի, մասնակցել են նաև Մարմաշենի համայնքապետարանի աշխատակիցներն ու «Հավերժ հիշատակ» ընկերության պատասխանատուն:

Շիրակ գերեզմանատան տարածքի ընդլայնումը Գյումրիի քաղաքապետարանի, Մարմաշեն խոշորացված համայնքի ղեկավարության միջև դատական վեճի թեմա է արդեն 2 տարի: Շիրակ, Ջաջուռ, Լեռնուտ գյուղերի վարչական տարածքներից մոտ 20 հեկտարը Մարմաշենի համայնքապետարանը պնդում է, որ հուղարկավորման նպատակով ապօրինի զավթվել են, Գյումրիի քաղաքապետարանի պատասխանատուն հերքում է այն՝ բերելով իր փաստարկները:

Շիրակի թեմի Սուրբ Գրիգոր Լուսավորիչ եկեղեցու հոգևոր հովիվ տեր Փավստոս քահանա Սարգսյանը դժվարանում է ասել, թե դիակիզման միջոցով արդյո՞ք քրիստոնյա մարդկանց կրոնական մոտեցումները դեպի օտարացում չեն գնա, բայց, այդուհանդերձ, ննջեցյալի հարազատները պետք է այս պրոցեսի մեջ տեսնեն հուղարկավորման միտում:

Մարմաշենի համայնքապետարանի իրավաբան Մամեդ Սալոյանը համոզված է, որ մեր ժողովուրդը դեռ պատրաստ չէ դիակիզման, դա անսովոր բան է մեզ համար: Նրա խոսքերով՝ Եվրոպայում 25 տարի հուղարկավորվելուց հետո, երբ ննջեցյալի հարազատները չեն կարողանում համապատասխան մուծումները կատարել, այդ դեպքում նոր դիակիզում է տեղի ունենում: Բացի դրանից՝ մենք ունենք հողեր հուղարկավորման համար, ուղղակի դրանք օրինականացնել է պետք: Խոսքը Շիրակ գերեզմանատան ընդլայնման մասին է:

Ըստ քահանայի՝ մեր մոտ գերեզմանաշինությունն է շատ անշնորհք տարբերակով, և դրա համար էլ կրկնակի և եռակի անգամ հողեր են զավթվում՝ ելնելով մրցակցությունից կամ ցուցադրությունից: Նրա խոսքերով՝ եթե այս հարցը ժամանակին ճիշտ լուծված լիներ, ապա գուցե դիակիզման խնդրի առաջ այսօր չկանգնեինք:

«Հավերժ հիշատակ» ընկերության տնօրենի ժամանակավոր պաշտոնակատար Արտյոմ Դավթյանը չի հերքում, որ ապօրինություններ կատարվել են, հիմա փորձում են դրանք կանոնակարգել: Քաղաքի առաջին և 2-րդ գերեզմանատները մասնակի փակ են, 3-րդ՝ Շիրակ գերեզմանատան տարածքն էլ Մարմաշեն համայնքի ղեկավարությունը պահանջում է օրինականացնել: Գյումրու քաղաքապետարանի հետ դատական վեճը դեռ շարունակվում է:

Շիրակ գյուղի վարչական ղեկավար Համլետ Ասատրյանն էլ նշում է, որ գյուղի բնակիչներից մեկը գերեզմանատան հարևանությամբ 2011 թվականից հողատարածք է վարձակալել, որը չի կարողանում օգտագործել, քանի որ գերեզմանատան պարիսպը վաղուց քանդվել է, թաղումներն էլ ճանապարհի վրա են կատարվել ու ժամանակ առ ժամանակ դրանք արդեն մտել են վարձակալած տարածք:

Թե ինչքանով խնդիրը կկարգավորվի դիակիզման եղանակով թաղումների դեպքում, ներկաները այնքան էլ վստահ չեն, քանի որ քահանայի խոսքերով, եղել են, որ արտերկրից սափորներ են բերվել, դրանք թաղել են գերեզմանատներում, փոքր փոսիկներում, բայց որպես գերեզման, դրանք հետո կառուցվել են մեծ չափերով:

Ըստ Արտյոմ Դավթյանի՝ օրենքը թույլ է տալիս թաղումից 15 տարի անց վերահուղարկավորում կատարել, այսինքն՝ այլ հուղարկավորություն անել, բայց մեր մենթալիտետը դա թույլ չի տալիս: