Ապօրինի ծառահատումներ Գյումրիի թիվ 20 դպրոցի տարածքում

Գյումրիի Ջորջ Բայրոնի անվան թիվ 20 դպրոցի տարածքում 11 հաստաբուն ծառ է հատվել։ Ծառերը կտրելու հանձնարարությունը տվել է դպրոցի տնօրինությունը: Տնտեսական գծով տնօրենի տեղակալը պարզաբանել է, որ ծառերը հատվել են, քանի որ դրանք թեքված են եղել տանիքի վրա, փակել են դասասենյակների լուսավորությունը, իսկ արմատներն այնքան խորն են եղել, որ վնասել են դպրոցի ցանկապատը։

Առանց թույլտվության կատարված ծառահատումը ոստիկանությունը որակել է ապօրինի և հարուցել քրեական գործ։

Դպրոցի տարածքում հիմա միայն այս խոշոր ծառաբներն են հիշեցնում երբեմնի ծառապատ տեղանքի մասին։ Ծառահատումները մեկ կամ երկու օրվա պատմություն չունեն, մի երկու շաբաթ առաջ են կատարվել:

Ծառերը կտրել դպրոցն է որոշել` ըստ փոխտնօրենի, ունենալով սեփական պատճառներն ու հիմնավորումները: Փոխտնօրեն Սամվել Հովհաննիսյանի խոսքով` դպրոցի տարածքը դարձել էր  թաղի տղաների հավաքատեղի, գալիս էին, հավաքվում, խանգարում դասապրոցեսը, իսկ անցած տարի սեպտեմբերին տարածքում դանակահարություն էր եղել, և այդ պատճառով էլ որոշել են մաքրել տարածքը տեսադաշտը փակող ծառերից, որոնք այլ վտանգներ էլ են ունեցել` թեքվել էին տանիքի վրա, խանգարում էին լուսավորությանը, իսկ արմատները խորացել ու վնասել էին ցանկապատը:

Երկու տարի առաջ, այս խնդիրները հաշվի առնելով, դիմել էին քաղաքապետարանին՝ էտը կազմակերպելու համար, ստացել էին պատասխան, որ դպրոցի սեփական տարածքն է և հարցի լուծումն էլ իրենցն է: Սեփական տարածքի գույքի հետ էլ դպրոցն այս կերպ էր վարվել` մտածելով, որ որևէ մեկից թույլտվություն ստանալու անհրաժեշտություն չկա: Բայց սխալվել էին ու դրա պատճառով հիմա ստիպված են 388․500 դրամ վնասի փոխհատուցում վճարել։

ՀՀ բնապահպանության և ընդերքի տեսչական մարմնի Շիրակի տարածքային բաժնի պետ Լևոն Գասպարյանի խոսքերով` սովորաբար, մինչ ծառերը հատելը, իրենք պետք է հիմնավորեին այդ ամենը, իսկ հիմա ծառերը հատել-վերջացրել են, նոր են ասում, որ ծառերը խանգարել են ու քանի որ հիմքեր չեն ներկայացրել, ծառահատումները որակվում են ապօրինի։ Ու, քանի որ դպրոցը մարզպետարանի ենթակայության կառույց է, ապա, ըստ տեսչական մարմնի պատասխանատուի, կարող էին նաև մարզպետարան դիմել` խորհուրդ ստանալու համար։

Առանց թույլտվության կատարված ծառահատումն էլ, փոխտնօրենը վստահեցնում է, որ վերաբերել է ծառաբնի ճյուղերին, այլ ոչ ամբողջական ծառերին, բայց սա հիմա ապացուցել չեն կարող, չեն լուսանկարել: Այժմ հատված ծառերը ոստիկանությունը առգրավել է ու պահում է դպրոցի բակում:

Սա, օրինակ` 5 ծառի փայտ է, ինչը, ըստ դպրոցի փոխտնօրենի, բավական քիչ է մեծ ծառերի համար ու հիմնականում մանր ճյուղեր են։

Դրանք թեղի ծառատեսակ են ու հիմնականում 20-58 սմ կոճղի տրամագծով, ասում է Լևոն Գասպարյանն ու ավելացնում, որ իրենք ծառաբնի հաստությունն են առաջնահերթ չափում ու չեն էլ հետաքրքրվում, թե այն ինչ բարձրության ծառ էր։ Իրավախախտման հետևանքով հասցված վնասի չափը թեղիների դեպքում ամենաքիչն է սահմանված:

Ըստ տեսչական մարմնի մարզային պատասխանատուի, եթե կտրվում են ոչ թե կանաչ, այլ կիսաչոր ծառեր, տուգանքի չափը կիսվում է, իսկ կտրված ծառերը կանաչ էին։

Դեպքի առնչությամբ քրեական գործ է հարուցվել, քանի որ բնությանը հասցված վնասի չափը գերազանցում է 200․000 դրամը։ Դպրոցի տարածքում մեկ տարի առաջ էլ ծառեր էին հատվել, այդ ժամանակ թաղի բնակիչներն էին արել ու վարչական պատասխանատվության ենթարկվել։ Ծառերի հատումից բացի, մի երկու ամիս առաջ էլ դպրոցի մուտքի մոտից գողացել էին Ջորջ Բայրոնի կիսանդրին։

Տնօրենը հայտնեց, որ դեպքից մի քանի օր անց անհայտ անձինք վերադարձրել էին գողոնը, բայց կիսանդրին դեռ տեղ չի հասել, ոստիկանությունում է, քննություն է ընթանում: