Ո՞ր իրավախախտումների պարագայում վարորդները կենթարկվեն քրեական պատասխանատվության. ՃՈ պետի տեղակալի պարզաբանումը

ՃՈ պետի տեղակալ Արման Չիլինգարյանն այսօր ներկայացրել է հունվարի 1-ից ուժի մեջ մտնող տուգանային միավորների համակարգը, որն այլ կերպ անվանում են Բալային համակարգ:

Այսպիսով, վարորդն ամբողջ տարվա համար ունենալու է 9 բալ ու տարբեր խախտումների ժամանակ տարբեր բալեր է կորցնելու: Մեկ տարվա ընթացքում 9 բալը սպառելու պարագայում վարորդի՝ տրանսպորտային միջոց վարելու իրավունքը կասեցվում է  6 ամսով: 3 ամիս անց նա կարող է հանձնել տեսական քննություն և վերականգնել վարելու իրավունքը, եթե չի հանձնում քննություն, ապա 6 ամիս անց առանց քննության է վերականգնվում այդ իրավունքը: Մեկ տարվա ընթացքում երկրորդ անգամ 9 միավորը սպառելու պարագայում վարորդը զրկվում է տրանսպորտային միջոցներ վարելու իրավունքից՝ մեկ տարի ժամկետով: Այս դեպքում նա միայն մեկ տարի հետո ու ամբողջական քննություն հանձնելու պարագայում կարող է վերականգնել վարելու իրավունքը: Խախտումներն առայժմ արձանագրվելու են միայն տեսանկարահանող սարքերի միջոցով: 2020 թվականի սեպտեմբերից բալային համակարգով վարորդների հետ կաշխատեն նաև ոստիկանական խմբերը:

Ինչ վերաբերում է խախտումներին, որոնց դեպքում վարորդները քրեական պատասխանատվության կենթարկվեն

«Ներկայումս գործող՝ զրկված վիճակում տրանսպորտային միջոց վարելուն ավելացվել է նաև իրավունքը կասեցված վիճակում տրանսպորտային միջոց վարելը, այսինքն` եթե անձը սպառել է միավորները և նրա նկատմամբ կայացվել է վարորդական իրավունքի կասեցման որոշում, այդ կասեցումից հետո, եթե նա վարի տրանսպորտային միջոց, նախատեսված է քրեական պատասխանատվություն:

Քրեական պատասխանատվություն է նախատեսված նաև տրանսպորտային միջոց վարելու իրավունք չունեցող անձի կողմից մեկ տարվա ընթացքում երկրորդ անգամ նմանատիպ արարք կատարելու պարագայում: Այսինքն՝ եթե անձը չունի տրանսպորտային միջոց վարելու իրավունք, վարել է, առաջին անգամ կենթարկվի վարչական պատասխանատվության, եթե վարչական պատասխանատվության ենթարկվելուց հետո մեկ տարվա ընթացքում կրկին կկատարի այդպիսի արարք, ապա այդ դեպքում արդեն նախատեսվում է քրեական պատասխանատվություն»,- ասել է Չիլինգարյանը:

Ինչ վերաբերում է «Տեսանկարահանող սարքերին վերաբերող օրենքում» կատարված փոփոխություններին ու հետախուզում հայտարարելու դեպքերին

«Նախատեսվում է ընթացակարգ հետախուզում հայտարարելու այն դեպքերի համար, երբ տրանսպորտային միջոցի սեփականատերը չունի վարելու իրավունքի վկայական և կատարել է 3 կամ ավելի իրավախախտում, որով նախատեսվում է տուգանային միավոր, այսինքն՝  տեսանկարահանող սարքերն արձանագրել են 3 և ավելի խախտում, բայց նրա նկատմամբ չի կարող բալ կիրառվել, քանի որ վկայական չունի, գրանցված չէ որպես վարորդ: Որպեսզի մենք կարողանանք կիրառել այդ տուգանային միավորը և հայտնաբերել այն վարորդին, ով վարում է տրանսպորտային միջոցը և ունի վարորդական վկայական, հայտարարվում է հետախուզում, մինչև տրանսպորտային միջոցը հայտնաբերելը և այն շահագործող անձի տվյալները ստանալը: Եթե տրանսպորտայի միջոցի տերը կհայտնի այդ անձի տվյալները, հետախուզումն այդ պահից կդադարեցվի»,- հավելել է ՃՈ պետը:

Այն անձինք, ովքեր 2020 թվականի հունվարի 1-ից հետո կգրանցեն տրանսպորտային միջոց, բայց չեն ունենա վարորդական վկայական, գրանցման ժամանակ պարտավոր են ներկայացնել նաև տրանսպորտային միջոցը շահագործողի տվյալները, որի նկատմամբ էլ կգործի տուգանային միավորների համակարգը:

«Սեփականատերերը կարող են ցանկացած պահի առցանց հարթակում փոխել շահագործող անձի տվյալները: Այդ հարթակում գրանցումներն իրավական կհամարվեն հունվարի 1-ից, պետք է տվյալները մուտքագրել հունվարի 1-ից»,- հավելել է Չիլինգարյանը: