Մարալիկի ծննդատան փակման հարցը քննարկվել է Շիրակի մարզպետարանում․ վերջնական որոշումը կկայացվի մի քանի օրից

Այսօր Մարալիկում անցկացված բողոքի ակցիայից հետո Առողջապահության նախարարության աշխատանքային խմբի անդամներն այցելել են Շիրակի մարզպետարան ու ծննդաբերական բաժանմունքի փակման հարցի շուրջ քննարկում ունեցել մարզպետ Տիգրան Պետրոսյանի հետ:

Մոտ կես ժամ տևած փակ քննարկումից հետո Առողջապահության նախարարության Մոր և մանկան առողջության պահպանման վարչության պետի ժամանակավոր պաշտոնակատար Նունե Փաշայանը SHANTNEWS.am-ի հետ ունեցած հարցազրույցի ընթացքում քննարկման մանրամասներն ու  հարցի լուծման տարբերակները չի նշել, բայց ևս մեկ անգամ հստակեցրել է, որ անկախ խնդրի կարգավորման հետագա ընթացքից, այն միայն ու միայն պետք է ուղղված լինի ծծնդկանների սպասարկման որակի ու մատուցվող ծառայությունների բարձրացման ապահովմանն ու անվտանգությանը:

«Առայժմ ես զերծ կմնամ որևիցե մեկնաբանություն տալ քննարկման արդյունքների վերաբերյալ, որովհետև քննարկումները շարունակվելու են նաև վաղը, մյուս օրը, բայց Մարալիկում գործում է նաև շտապօգնության ծառայություն, երկու մեքենա ունեն  և կարծում եմ, որ անհրաժեշտության դեպքում նաև շտապօգնությունը կարող է ապահովել հղիների տեղափոխման հարցը:

Մենք գտնում ենք, որ ավելի ճիշտ է մինչև ծնունդը սկսվելը տեղափոխումը ապահովվի, քան ծնունդը սկսվելուց հետո մենք բարդություննեի առաջ կանգնենք և չիմանանք՝ ինչ անել»,- նշել է Առողջապահության նախարարության Մոր և մանկան առողջության պահպանման վարչության պետի ժամանակավոր պաշտոնակատար Նունե Փաշայանը:

Ըստ նախարարության ներկայացուցչի՝ բաժանմունքի լուծարման որոշման հիմքում դրված են հստակ չափորոշիչներ, ըստ որոնց՝ յուրաքանչյուր ծննդաբերական բաժանմունք պետք է հագեցած լինի անհրաժեշտ բուժսարքավորումներով ու մասնագետներով, իսկ Մարալիկի բաժանմունքում անգամ անհետաձգելի դեպքերում կեսարյան հատումներ և վերակենդանացում անելու մասնագետներ ու սարքեր չկան, ինչը նման ուղղվածության բաժանմունքների գործունեության առաջին պարտադիր նախապայմաններից է:

Շիրակի մարզպետ Տիգրան Պետրոսյանը, անդրադառնալով մարզպետարանում անցկացված քննարկմանը, նշել է, որ մի կողմից պետք է առաջնորդվել նախարարության չափորոշիչներով, իսկ մյուս կողմից՝ հաշվի առնել նաև խոշորացված համայնքի 17 գյուղական բնակավայրերի բնակիչների՝ դեպի այլ բուժհաստատություններ տեղափոխման դժվարությունները, քանի որ անհարժեշտ ենթակառուցվածքներն ու հասարակական տրանսպորտը հեռավոր գյուղերում բացակայում են:

«Մենք էս ընթացքում ժամանակ ունենք աշխատելու և որոշակի մոտեցումներ քննարկելու: Այսօր Առողջապահության նախարարության ներկայացուցիչների հետ քննարկում էինք որոշակի դետալներ։ Խնդիրները, որոնք այսօր մենք ունենք էդ տարածաշրջաններում, ես ինչքան գիտեմ, նաև Հայաստանի 9 այլ բաժանմունքներին է առնչվում, այսինքն` որոշումը կայացվել է անցած տարվա ավարտին` չֆինանսավորել գործիքակազմերով չափորոշիչներին չհամապատասխանող բաժանմունքները, և հիմնավորումը հիմնականում անվտանգ ծառայություն մատուցելն է, որակը»,- նշել է Տիգրան Պետրոսյանը:

Քննարկման մասնակիցները նշել են, որ  Մարալիկի Առողջության կենտրոնի ծննդաբերական բաժանմունքի փակվել-չփակվելու հարցի վերջնական պատասխանը կտրվի մի քանի օրից, շահագրգիռ կողմերի հետ ունեցած քննարկումների արդյունքներն ամփոփելուց հետո: Եթե բաժանմունքը փակվի, ապա աշխատակիցները կստանան ծանուցագրեր, իսկ հնարավորության դեպքում կապահովեն աշխատանքով: