2019-ին Շիրակի մարզում 749 արտակարգ դեպք է գրանցվել

Շիրակի մարզում 2019 թվականին գրանցվել է 749 արտակարգ դեպք, իսկ ճգնաժամային կառավարման կենտրոնը ստացել է 76 հազար զանգ: Սրանք ամփոփ տվյալներն են, որոնք ներկայացրել են արտակարգ իրավիճակների նախարարության ենթակայության Շիրակի մարզային կառույցները:

2018-ի համեմատ ավելացել են հրդեհների, կարկտահարությունների ու շմոլ գազից թունավորումների դեպքերը, ինչպես նաև ճանապարհատրանսպորտային պատահարները, Սպիտակի օջախային գոտում գրանցվել են ուժեղ ցնցումներ: Պատահարներն ավելացել են, ավելացել է նաև փրկարարական ու սեյսմիկ ծառայությունների հագեցվածությունը: Սեյսմիկ կայաններ են տեղադրվել, հրշեջ-փրկարարական ջոկատների շենքերը վերանորոգվել են ու նոր տեխնիկա են ստացել:

Շիրակի մարզային ճգնաժամային կառավարման կենտրոնում, Գյումրիի, Արթիկի, Անիի, Ախուրյանի ու Աշոցքի հրշեջ-փրկարարական ջոկատներում հերթապահներն իրենց տեղում են , մյուսների համար հանդիպման վայրը մարզպետարանն էր: Ամփոփում էին անցած 2019 թվականը, որի ընթացքում մարզային փրկարարական վարչությունն աշխատել է ծանրաբեռնված գրաֆիկով: Պատահարները տարբեր բնույթի ու շատ են եղել: Թվերը համեմատում են 2018-ի հետ: Պատահարների ու տուժողների թիվն ավելացել է:

«Շիրակի մարզում գրանցվել է 749 արտակարգ դեպք, զոհվել է 25 մարդ: 2018-ին զոհերի թիվը եղել է 23: Վիրավորվել է 499 մարդ, 2018-ին՝ 429: 2019 թվականին, 2018-ի համեմատ, գրանցված արտակարգ դեպքերի թիվն աճել է 168-ով, զոհերի թիվը՝ 2-ով, իսկ վիրավորների թիվը՝ 70-ով»,- ասել է Շիրակի մարզային փրկարարական վարչության պետ Ալեքսան Գյոզալյանը:

373 հրդեհ է մարզում գրանցվել: Դրանց արձագանքումն ավելի արագ ու ավելի ժամանակակից տեխնիկայով են հրշեջներն ապահովել: Փրկարարական վարչությունը 2019-ին մեքենաներ է ստացել, այս տարի տեխնիկայով համալրումը շարունակվելու է: Բնական աղետներից Շիրակի մարզին ամենաշատը վնասներ է հասցրել կարկտահարությունը: 15 անգամ ցանքերը կարկտահարվել են, վնասը 4 մլրդ դրամից ավելին է:

Արտակարգ իրավիճակների նախարարության գլխավոր քարտուղարին ուղղված առաջին հարցը հակակարկտային համակարգի բարելավմանն էր վերաբերում: Շիրակի մարզում ռադիոլոկացիոն կայանի անհրաժեշտություն կա: Հակակարկտայինների սպասարկումը շրջակա միջավայրի նախարարությանն է փոխանցվել, արտակարգ իրավիճակների նախարարությունն էլ բանակցություններ է սկսել գազապաստարանների վերանորոգման համար: Հանրապետությունում եղածները վաղուց շարքից դուրս են եկել: Վերանորոգման երկու տարբերակ է նախարարությունը քննարկում:

«Բանակցություններ են գնում կառավարության հետ գումարներ հատկացնելու համար, և առաջարկվում է 2 տարբերակ: Մեկը, որ գումար հատկացնեն, բերենք գազապաստարանները համապատասխան վիճակի, երկրորդը, որ մասնավոր կազմակերպությունների հետ վարենք բանակցություններ, պայմանագրային հիմունքներով տանք մասնավորին: Ինքը կահավորի մեր մասով, մյուս մասն օգտագործի իր համար, հարկ եղած դեպքում օգտագործվի նախարարության կարիքների համար, բնակչությանը պատսպարելու համար»,- ասել է ԱԻՆ գլխավոր քարտուղար Վահագն Օհանյանը:

Երկրաշարժերը ստույգ գրանցելու և տվյալները վերլուծելու համար Սեյսմիկ պաշտպանության հյուսիսային ծառայությունը կայաններով ու սարքերով համալրված է: Ուշադրության կենտրոնում են պահում Սպիտակի օջախային գոտին, որտեղ ուժեղ ցնցումներ 2019-ի սեպտեմբերին գրանցվեցին:

«Սա սովորական  գործընթաց է: Սպիտակի երկրաշարժի հետցնցումների պրոցեսը չի ավարտվել: Գիտության մեջ վեճեր կան, որ 2-3 տարի է տևում հետցնցումների պրոցեսը: Մենք ապացուցում ենք, որ 30 տարին անցել է, և չունենք 6 ամիս ժամանակահատված, որ Սպիտակի օջախային գոտում ցնցումներ չլինեն: Մենք համարձակությամբ ասացինք, որ ավելի ուժեղ ցնցումների հավանականությունը զրո է»,- նշել է Սեյսմիկ պաշտպանության հյուսիսային ծառայության տնօրենի խորհրդական Սերգեյ Նազարեթյանը:

Փոքր-ինչ մեծացել է տեղումների հավանականությունը: Օդերևութաբանները ձյան տեղումներ այսօրվանից են կանխատեսում: Ձյուն կտեղա, բայց քիչ: Շիրակի մարզում ձյան ծածկույթը, ըստ մասնագետների, հազիվ 5 սմ կկազմի: Երաշտը սկսվել է անցած ամռանը ու շարունակվում է մինչև հիմա: Տեղումների բացակայությունը փրկարարներին ապահովագրել են ձնաբքերից: Իրենց ծառայությունում աչքի ընկած փրկարարները պարգևատրվեցին արտակարգ իրավիճակների նախարարության և Շիրակի մարզպետի պատվոգրերով: