Գրիպի բարդացումներով Շիրակի մարզի բուժհաստատություններ քաղաքացիների դիմելիությունն ակտիվացել է

Շիրակի մարզի հիվանդանոցներում ու պոլիկլինիկաներում դիմելիությունն ակտիվացել է, պատճառը սեզոնային գրիպի վիրուսն է, իսկ դիմած քաղաքացիների մեծ մասի մոտ արդեն բարդացումներ են, իսկ նման դեպքերում առաջնային բուժսպասարկման օղակից՝ պոլիկլինիկաներից ուղղորդումը հիվանդանոցներ անհետաձգելի են: «Գյումրի» բժշկական կետրոնում, Ինֆեկցիոն հակատուբերկուլյոզային ու Մոր և մանկան ավստրիական հիվանդանոցներում բոլոր մահճակալները զբաղված են:

Վերջին 10 օրերին Գյումրիի բուժհաստատություններ այցելողները տարբեր տարիքային խմբերի քաղաքացիներ են, մեծ մասը՝ վերին շնչուղիների վիրուսների գանգատներով: «Գյումրի» բժշկական կենտրոնի ընդունարանում ու միջանցնքներում սպասող հիվանդների թիվը նախորդ օրերի համեմատ ավելացել է, բայց ամենածանրաբեռնվածը հիվանդանոցի թերապևտիկ բաժանմունքն է: Ստացիոնար բուժում ստացող հիվանդների մեծ մասը սուր շնչառական վիրուսային հիվանդությունների բարդություններով են:«Դիմում են բրոնխիտների սրացումներով, թոքերի օքստրուկտիվ հիվանդությունների սրացումներով և դիմում են թոքաբորբերով, ունեցել ենք 1-2 ծանր թոքաբորբերի դեպքեր, հիմնականում դիմում են ցրտահարությամբ»,- նշում է «Գյումրի» ԲԿ-ի թերապևտիկ բաժանմունքի վարիչ Լիլիթ Սարգսյանը։Ցրտահարության հետևանքով վերին կամ ստորին վերջույթների ախտահարումներով հիվանդներ չեն ունեցել, հիմնականում տնակներում ցածր ջերմաստիճանային ռեժիմի պայմաններում ապրող քաղաքացիներն ունեցել են հիվանդության բարդացումներ։Սեզոնային գրիպի ու սուր շնչառական վիրուսային հիվանդությունների բարդություններով հոսպիտալացված հիվանդների թվի աճով պայմանավորված՝ հիմա բաժանմունքն աշխատում է 100 տոկոս ծանրաբեռնվածությամբ: Երբեմն ազատ մահճակալներ չեն ունենում, ստիպված հիվանդներին տեղավորում են այլ բաժանմունքներում:«Այս պահի դրությամբ թերապևտիկ բաժանմունքում առկա 50 մահճակալներից 50-ն էլ զբաղված են, եթե չեմ սխալվում, 1-2 մահճակալ էլ ավելի է»,- ասում է Լիլիթ Սարգսյանը։«Մենք տարբեր տարիքի հիվանդներ ունենք ։ Շատ են հիվանդները նաև մանկահասակների բաժանմունքում։ Մեր մոտ խառն է, ոչ միայն ինֆեկցիոն, սուր ռեսպիրատոր վարակներով են, այլև սուր աղիքային ինֆեկցիաներով»,- Գյումրիի Ինֆեկցիոն հիվանդանոցի հաճախելիության տվյալներն է ներկայացնում ինֆեկցիոն հիվանդանոցի մեծահասակների բաժանմունքի վարիչ Կարինե Հովհաննիսյանը։Գյումրիի ինֆեկցիոն հիվանդանոցի մեծահասակների և  մանկական բաժանմունքներում հունվար ամսվա ընթացքում ստացիոնար բուժում է ստացել 116 քաղաքացի: Բուժում են ստանում միայն սուր շնչառական վիրուսային հիվանդության բարդացած տեսակները, իսկ առաջնային տեղում են հղիները:«Ռիսկի խմբերին պատկանող հղիները մեր մոտ բավականին շատ են, որոնք ջերմությունով, բրոնխիտով, հևոցով են դիմում,իրենք չեն կարող դիմել այլ բուժհաստատություններ, որովհետև սա օդակաթիլային վարակ է»,- ասում է Կարինե Հովհաննիսյանը։Թեև Հայաստան առայժմ կորոնավիրուսը չի թափանցել, բայց առավել զգոնություն ու հսկողություն է սահմանվել առողջապահական հաստատություններում ևս: Գյումրիի ինֆեկցիոն հիվանդանոցում այս ընթացքում ունեցել են միայն էնտերովիրուսային հիվանդացության դեպք, որը ըստ մասնագետի,տվյալ սեզոնին բնորոշ  է համարվում։ Մոր և մանկան ավստրիական հիվանդանոցում վիրուսին բնորոշ ախտանշաններով երեխաների հոսքը սկսվել է դեռ նոյեմբերից: Երեխաների շրջանում սուր շնչառական վիրուսի արագ տարածման հիմնական պատճառը ակտիվ շփումն է մանկապարտեզներում ու դպրոցներում:«Դպրոց  ու մանկապարտեզ հաճախելիս, երբ երեխաները շփվում են մեկը մյուսի հետ, վիրուսները փոխանցվում են մեկից մյուսին, և հիվանդների թիվն ավելի է շատանում»,- նշում է Գյումրիի մոր և մանկան Ավստրիական հիվանդանոցի մանկական բաժանմունքի վարիչ Սուսաննա Տոնոյանը։

Մարզի 164 դպրոցներում ու 50-ից ավելի մանկապարտեզներում ջերմաչափման ամենօրյա մոնիթորինգ է անցկացնում պետական հիգիենիկ և հակահամաճարակային տեսչությունը: Շիրակի մարզի տարածքային կենտրոնի մասնագետները ջերմային ռեժիմի որոշակի խախտումներ հիմնականում արձանագրել են գյուղական 25 դպրոցներում, որոնք դեռևս ջեռուցվում են հեղուկ վառելիքով:Սուր շնչառական վիրուսների սեզոնին բնորոշ ակտիվացում կա, բայց վիճակը վերահսկելի է։ Շիրակ օդանավակայանում ու Բավրայի անցակետում գործում են ջերմաչափման կետեր երկիր մտնող վիրուսակիր հիվանդներին հայտնաբերելու համար: Իսկ մարզում գրիպի բարդացումները կանխելու համար կենտրոնը պատվաստանյութի նոր խմբաքանակ է տրամադրել բուժհաստատություններին:«Պահանջարկը պատվաստանյութի կա, գրիպի պատվաստանյութը մենք ստացել ենք արդեն երկրորդ անգամ․ բաշխել ենք, բոլոր բուժհիմնարկները ապահովված են իրենց իսկ ներկայացրած քանակներով, և այսօր  մենք նորից մեր պլանային պատվաստանյութերի հետ գրիպի վակցինան ուղարկել ենք  բուժհաստատություններ»,- նշում է Պետական հիգիենիկ և հակահամաճարակային տեսչության Շիրակի մարզի տարածքային կենտրոնի տնօրեն Վարդան Ուռուտյանը։Մարզի պոլիկլինիկաներին արդեն մոտ 13 հազար դոզա պատվաստանյութ է տրամադրվել։ Ռիսկային խմբերից բացի, պատվաստանյութից կարող են անվճար օգտվել բոլոր քաղաքացիները: Բայց ամեն դեպքում, վիրուսներից պաշտպանվելու համար բժիշկները խորհուրդ են տալիս շատ հեղուկներ ու թեյ օգտագործել: