Գյումրիի թանգարանների մուտքավճարները փոխվել են

2019-ին Գյումրիի թանգարանները գրանցեցին այցելուների ռեկորդային թիվ: Թանգարանների պահանջարկը, դրանց նկատմամբ հետաքրքրությունը հանգեցրել է մշակութային այս կառույցների վերահսկողության խստացման:

Քաղաքապետարանը թանգարաններում տեսախցիկներ է տեղադրել այցելուների հստակ թիվ ունենալու համար: Իսկ դեկտեմբերին ավագանին որոշում ընդունեց նաև մուտքավճարների փոփոխության մասին: Մուտքավճարները 100 դրամով ավելացել են, իսկ էքսկուրսիաները` էժանացել:

Թանգարանների տնօրենները հաշվարկներ են կատարում, թե այցելուների թվով պայմանավորված, ինչպես ու որքան կփոխվի իրենց ֆինանսավորումը:

Ախուրյանի թիվ 1 դպրոցի աշակերտները գրականության դասն այս անգամ Շիրազի հուշատուն-թանգարանում են անցկացնում: Դպրոցական թեման Շիրազի ստեղծագործություններն են: 23 աշակերտները թանգարանի այն այցելուներն են, որոնք զեղչերից են օգտվում:

Գյումրիի ավագանին անցած տարեվերջին սահմանեց թանգարանների մուտքավճարների նոր գնացուցակը և զեղչերից օգտվողների ցանկը: Ըստ այդմ` մուտքավճարը նախկին 300 դրամի փոխարեն դարձել է 400 դրամ, իսկ 7-16 տարեկանների համար գործող 50 տոկոսանոց զեղչը նորից գործում է:

Թանգարաններում հաշվել են ու եկել այն եզրակացության, որ նոր գնացուցակով թանգարանի մուտքն ավելի էժան է դարձել փոքր խմբերով այցելուների համար և հակառակը` եթե մեծ մեծ խմբերով են գալիս, ավելի շատ են վճարում: Հայերենով անցկացվող էքսկուրսիաները էժանացել են` նախկին 1500 դրամի փոխարեն 1000 դրամ է սահմանվել: Անփոփոխ է մնացել օտարալեզու էքսկուրսիաների գինը՝ 2000 դրամ, թեև որոշ թանգարաններում օտար լեզվով աշխատող էքսկուրսավարի հաստիք, որպես այդպիսին, չկա:

«Դա էլ է կուրյոզ, երբ գրում են, որ օտարալեզու էքսկուրսիան արժի 2000 դրամ, բայց մենք հաստիքով 1 էքսկուրսավար ունենք, որը հայերենով էքսկուրսիա է անում,  էքսկուրսավարի երկրորդ հաստիքը չունենք: Բայց ֆրանսալեզու, անգլալեզու այցելուներին սպասարկում ենք: Էքսկուրսիաներն անցկացնում է մեր միակ էքսկուրսավարը, նաև գիտաշխատող ունենք, ցուցանմուշների պատասխանատու ունենք, որոնք անում են էքսկուրսիաներ»,- SHANTNEWS.am-ի հետ զրույցում հայտնել է Հովհ. Շիրազի հուշատուն-թանգարանի տնօրեն Արա Պապանյանը:

Զեղչերից օգտվողների ցանկը հստակ է, իսկ թե ինչ կարգով են նրանց հետ աշխատելու, թանգարանների տնօրեններին առայժմ պարզ չէ: Զեղչերից օգտվողներին, այսպես ասած, պետք է ապացուցեն, որ իրենք տվյալ խմբին են պատկանում:

«Եթե թոշակառու է, անպայման պետք է թոշակի գրքույկ պահանջենք, անգամ եթե տեսնում ենք, որ այդ տարիքում է գտնվում: Սա ինչ-որ տեղ վիրավորական է կամ, եթե իմ տուն հյուր է եկել, պետք է հարցնեմ, թե արդյոք թոշակի գրքույկը վերցրել է իր հետ, որ գա թանգարաններ ու անվճար օգտվի: Նման հարցեր կան: Ստացվում է, որ անցյալ տարվա գնացուցակի համեմատ գներն ավելի նվազել են, որովհետև էքսկուրսիաները 1500-ից դարձել են 1000 դրամ, իսկ մուտքավճարը` 300-ից 400 դրամ»,- SHANTNEWS.am-ին ասել է Ավ. Իսահակյանի տուն-թանգարանի տնօրեն Կարինե Վիրաբյանը:

Իսկ թե օրական քանի մարդ է թանգարաններ այցելում, վերահսկում են տեսախցիկները: Թանգարանների մուտքերին ու դրամարկղերի մոտ տեսախցիկներ են տեղադրված, որոնք միացված են քաղաքապետարանի մշակույթի բաժնի համակարգիչներին: Այցելուների հստակ թվի հաշվարկը բացառում է թանգարաններում ստվերային շրջանառությունը:

««Ստվեր» ասվածը վիրավորական է ցանկացած մշակութային կառույցի համար: Թանգարաններում դա կարելի է անվանել փոքր գողություն: Մենք ուրախ ենք, որ քաղաքապետարանը վերահսկում է, թող տեսնեն, թե երբ ինչքան մարդ է մտնում, ինչ քանակի այցելուներ կան ու ինչ տարիքի»,- մեզ հետ զրույցում ասել է Մհեր Մկրտչյանի հուշատուն-թանգարանի էքսկուրսավար Ալեքսանդր Այվազյանը:

Մարիամ և Երանուհի Ասլամազյան քույրերի պատկերասրահում տեսախցիկների առկայությունից դժգոհ չեն: Քաղաքապետարանը այցելուների թիվը ու դրամական շարժն է հսկում, թանգարանի տնօրինությունն էլ տեսախցիկների օգնությամբ բնօրինակ կտավներն է հսկողության տակ պահում:

2019-ին առաջին անգամ մեծ թվով այցելուներ են ունեցել ու ըստ այդմ` ֆինանսական անհամեմատ մեծ մուտքեր են կատարել քաղաքային բյուջե:

Համաձայն կարգի` թանգարանների մուտքավճարները փոխանցվում են բյուջե, հետո արդեն տարբեր մեծ ու փոքր աշխատանքների համար տնօրենները դիմում են քաղաքապետարանին` նույն գումարից հատկացումներ կատարելու խնդրանքով:

Համայնքապատկան թանգարաններից յուրաքանչյուրը 2019 թվականին 1 ու կես մլն դրամից ավելի գումար է փոխանցել քաղաքապետարան: