Գյումրիի Մուշ 2-2 թաղամասում 5 բնակարան ենթակա է վերաբաշխման

2010 թվականին Մուշ 2-2 թաղամասում շահագործված բնակարաններից դեռ ոչ բոլորն են բաշխված: Դատարկ են մնացել այն բնակարանները, որոնք հատկացվել էին միայնակ ծերերին, չեն հասցրել սեփականաշնորհել, նրանց մահից հետո էլ վերաբաշխում տեղի չի ունեցել: Նման 5 բնակարան կա: Դրանք տնօրինելու որոշում կայացվել է երկու տարի առաջ: Կառավարության որոշմամբ՝ բնակարանները հատկացվել են պաշտպանության նախարարությանը: Դատարկ բնակարաններն արդեն մեկ այլ բնակապահովման ծրագրի շրջանակներում են վերաբաշխվելու: Պաշտպանության նախարարության զոհված և հաշմանդամ ազատամարտիկների բնակապահովման ծրագրում Շիրակի մարզի 187 ընտանիք է հաշվառված:

2010 թվականին Մուշ 2-2 թաղամասում բնակարանաշինության առաջին փուլով 1056 բնակարան կառուցվեց: Մեկ սենյականոցների շահառուները հիմնականում միայնակ ծերերն էին: Իսկ սեփականաշնորհումը ֆինանսավորվում էր պետբյուջեից: Միայնակ շատ ծերեր չհասցրին սեփականաշնորհել բնակարանները: Դրանք մնացին այն ժամանակ քաղաքաշինության նախարարության հաշվեկշռում: Բնակարանները ժառանգներին հատկացնելու դատական հայցերն էլ մերժվեցին, բնակարանները մինչ օրս դատարկ են:

Դատարկ մնացած 5 բնակարանները 2018-ին է կառավարությունը հատկացրել պաշտպանության նախարարությանը: Դրանց վերաբաշխման հարցն առայժմ չի քննարկվել: Պաշտպանության նախարարությանը բնակարաններ 2012-ին էլ են հատկացվել Մուշ 2-2 թաղամասում:

«2012 թվականին, որպես բացառություն, նոր կառուցվող Մուշ թաղամասում 8 բնակարան հատկացրին ազատամարտիկներին և զոհվածների ընտանիքներին: Դրանից հետո հատկացումն արդեն բնակարանի գնման վկայագրի տեսքով է եղել: 2019 թվականին 18 շահառուի տվել են ԲԳՎ, 5 հոգու մերժել են, մնացածի գործերը գտնվում են քննարկման փուլում: Մուշ թաղամասում ծերերը չեն կարողացել սեփականաշնորհել, նրանց մահից հետո փոխանցվել  է համայնքին: ՊՆ-ին եթե տվել են, ուրեմն համայնքը համաձայնություն է տվել: Սեփականաշնորհման գործընթացը էսպես է, որ համայնքը վերցնում է իրեն, հետո տալիս է շահառուներին: Այդ օղակը մի քիչ բարդ է ասել, թե ով ում է տվել, և ինչ պիտի անի»,- SHANTNEWS-ին ասել է Շիրակի մարզպետարանի բնակարանային և ենթակառուցվածքների բաժնի ավագ մասնագետ Սարգիս Մելոյանը:

Զոհված և հաշմանդամ ազատամարտիկների բնակարանային ապահովման ծրագրով 2019-ին Շիրակի մարզում 18 ընտանիք է փոխհատուցում ստացել: Ընդհանուր մարզի շահառուների թիվը 187-ն է: Ում են այս անգամ հատկացնելու դատարկ 5 բնակարանները, որոշում դեռ չկա: Համատիրության նախագահը նշում է, որ պաշտպանության նախարարության ներկայացուցիչները եկել են, ուսումնասիրել ու հաշվառել, թե որ բնակարանն ինչ վիճակում է։

«Բնակարաններ կան, որ նորմալ վիճակում են, կարելի է բնակեցնել: Կան, որ ջեռուցման համակարգերը նախկին տերերը վաճառել են, մարտկոցները չկան, հատակը չկա: Բոլորը ՊՆ ներկայացուցիչները գրեցին, փաստերով հաշվառեցին, թե բնակարաններում ինչ է անհրաժեշտ ու գնացին»,- SHANTNEWS-ին ասել է «Կարին» համատիրության նախագահ Սենիկ Եսայանը:

Մարզպետարանի պատասխանատուն վստահ է, որ բնակարաններն ազատամարտիկների բնակապահովման ծրագրի շրջանակներում են վերաբաշխվելու: Առավել ևս, որ հերթացուցակում հաշվառվածները մեկ սենյականոցների շահառուներ են: Վերաբաշխման ժամկետներ դեռ չկան:

Պաշտպանության նախարարությունը հիմա չի հաշվառում նաև երրորդ կարգի հաշմանդամ ազատամարտիկներին: Հերթացուցակում ճշգրտումներ են կատարում: Ըստ մարզպետարանի պատասխանատուի՝ եղել են նաև իրականությանը չհամապատասխանող տվյալներ ներկայացրածներ, որոնց բնակարանային բարելավում հատկացնելու հարցը մերժվել է: Մուշ 2-2 թաղամասում դատարակ բնակարաններ շատ կան, որոնք ի տարբերություն 5 բնակարանների, տերեր ունեն: Թաղամասի բնակեցումը թերի է շահագործման օրվանից:

Այսինքն` բնակարանները հատկացվել են ընտանիքների, որոնք ունեցել են անօթևանի կարգավիճակ, միևնույն ժամանակ բնակարանային այլընտրանք ունեն: Գյումրիում վերաբաշխման ենթակա բնակֆոնդ, բացառությամբ 5 բնակարանների, փաստացի, չկա: Համայնքապատկան, բայց ոչ թե վերաբաշխման, այլ բաշխելու ենթակա են սոցիալական 6 բնակարաններ, որոնք որոշվել է վիճակահանությամբ հատկացնել կանաչ գոտիներում տեղադրված տնակների բնակիչներին: