Գյումրիի ՀԿ-ները դիտորդներ են հավաքագրում

Կենտրոնական ընտրական հանձնաժողովը սկսել է դիտորդների հավատարմագրումը, որոնք աշխատելու են Սահմանադրական փոփոխությունների հանրաքվեի օրը և դրան նախորդած՝ քարոզարշավի ընթացքում: Հանրաքվեին դիտորդներ կարող են լինել հասարակական, իրավապաշտպան կազմակերպությունները, օտարերկրյա, միջազգային կազմակերպությունները և կուսակցությունները:

Կարճաժամկետ դիտորդական խմբերը ձևավորման փուլում են, իսկ երկարաժամկետ դիտորդներն արդեն սկսել են իրենց աշխատանքը: Դիտարկում են քարոզարշավի ընթացքը: Հիմնականում դիտորդական փորձ ունեցող անձինք են, ովքեր փաստում են, որ հանրաքվեների ընթացքում, ի տարբերություն համապետական ու ՏԻՄ ընտրությունների, քարոզարշավն ու բուն քվեարկության պրոցեսը շատ ավելի հանգիստ են անցնում:

Դիտորդ՝ դիտող, որևէ բանի ուշադիր կերպով հետևող՝ հսկող․ սա դիտորդ բառի բացատրությունն է, որը կարելի է գտնել բառարանում: Ընտրությունների ընթացքում դիտորդների լիազորություններն ու գործառույթներն այս բառին համապատասխան են: Դիտորդները կարող են ներկա գտնվել քվեարկության ամբողջ ընթացքում ու հաշվարկի ժամանակ: Խախտումները միայն արձանագրում են, առանց քվեարկությանը խոչընդոտելու: Սախարովի անվան մարդու իրավունքների պաշտպանության կենտրոնում դիտորդի վարքագծի կանոններ են մշակել, որոնցից գլխավորը՝ ընտրական պրոցեսի մասնակից կողմերից որևէ մեկին կողմնակից չլինելն է:

Արմեն Պետրոսյանը 20 տարի Հայաստանում տեղի ունեցող ընտրություններին Շիրակի մարզում դիտորդների աշխատանքն է համակարգել: Դիտորդների աշխատանքի արդյունքը ներկայացնում է այն խախտումներով, որոնք արձանագրել են տեղամասերում: Խախտումների բնույթը բոլոր ընտրությունների ժամանակ չի փոխվել:

«Մեր արձանագրած դեպքերը ցույց են տվել, որ բավականին շատ են եղել դեպքերը, երբ քաղաքացիները տեղեկացված չեն եղել: Իշխող կուսակցության կողմից անցյալում եղել են շատ խախտումներ: Եղել են դեպքեր նաև ընդդիմադիրների կողմից: Անտեղի աղմուկ են բարձրացրել ոչ մի բանից: Քրեական գործեր են եղել: Մեր դիտորդները արձանագրել են նաև հանձնաժողովի անդամի պարտականությունները ոչ ճիշտ կատարելու դեպքեր: Հիմա հետևելու ենք, թե ինչպես է էլեկտրոնային քարոզչությունը ընթանալու: Ունենք դիտորդներ, որոնք պետք է ուսումնասիրեն, թե տպագիր և էլեկտրոնային տարբերակով ինչպես է ընթանալու քարոզչությունը»,- SHANTNEWS-ին ասել է Արմեն Պետրոսյանը:

Հերմինե Հովհաննիսյանը երկարաժամկետ նաև կարճաժամկետ դիտորդական առաքելություն է կատարել: Նշում է խախտումները, որոնք արձանագրել են համապետական ու ՏԻՄ ընտրությունների ժամանակ, երբ գործող անձինք կոնկրետ թեկնածուներն են եղել: Հանրաքվեների ընթացքում պատկերը ճիշտ հակառակն է: Պնդումը հիմնավորում է 2015-ի Սահմանադրական հանրաքվեի արդյունքներով:

«2015-ի հանրաքվեին «Այո» և «Ոչ»-ի ընտրությունների ընթացքում շատ հանգիստ է անցել, խախտումներ գրեթե չեն եղել, կամ եղել են, որոնք ոչ թե գիտակցված են եղել, այլ չիմացության արդյունք: Մասնակցությունը ցածր է եղել բնակչության»,- SHANTNEWS-ի հետ զրույցում ասել է դիտորդ Հերմինե Հովհաննիսյանը:

Հանրաքվեներին, ի տարբերություն մյուս ընտրությունների, նաև մասնակցությունն է քիչ լինում: Թե՛ ընտրությունների, թե՛ հանրաքվեի ընթացքում նույնն է եղել միջազգային դիտորդների արձագանքը: Հայաստանյան քվեարկությունները, միջազգային դիտորդների աչքերով, միշտ լեգիտիմ ու օրենքի սահմաններում են:

Միայն Սախարովի անվան մարդու իրավունքների պաշտպանության հայկական կենտրոնի Շիրակի մասնաճյուղը հանրաքվեին 50 դիտորդ է ներգրավելու: Դիտորդներ հավաքագրում են նաև այլ կազմակերպություններ: Կենտրոնական ընտրական հանձնաժողովը դիտորդների հավատարմագրում կատարելու է մինչև մարտի 21-ը: