Փտած հենասյուները վտանգ են ներկայացնում Գյումրիի Ալավերդյան փողոցի տներին

Երբ մաշված մալուխներով ու փտած հենասյուներով էներգամատակարարման կազմակերպումը դարձել է վտանգավոր…

Վիճակն այսպիսին է Գյումրիի Ալավերդյան փողոցում: Տասնյակ տարիների վաղեմություն ունեցող հենասյուները փտել են, թեքվել դեպի տները: Անգամ հենասյուների հրդեհման դեպքեր են եղել, որի հետևանքով դրանց շրջվելու հավանականությունը մեծ է, իսկ էլեկտրական ցանցերի ներդրումային ծրագրերը երկրորդական փողոց չեն հասնում:

Ալավերդյան փողոցը քաղաքի ծայրամասում է: Միայն սեփական բնակֆոնդ է այստեղ: Ամեն տան արանքում հենասյուն է տեղադրված: Դրանցից ոչ մեկը նախնական դիրքում չէ, հիմքերը փտել են, հենասյուները ծռվել ու թեքվել են: Իսկ վտանգը կից տներինն է: Բնակիչները մի քանի անգամ իրենց թաղը սպասարկող մասնագետին դիմել են: Իսկ ահազանգերի արդյունքը ցույց են տալիս խիստ վթարային երկու հենասյուների համար կիրառված  տարբերակով՝ հնի կողքին նոր հենասյուն են տեղադրել, բայց դրանք ծառայում են որպես հենարան:

«Դա ժամանակավոր լուծում է, որպեսզի հին հենասյուները շուռ չգան: Պարզապես ստեղծել ենք այնպիսի մի իրավիճակ, որ անվտանգությունը ապահովենք: Հենասյուները կանգնեցրել ենք, որ հաղորդալարերը տեղափոխենք նորի վրա: Դրա համար մի հատ նորից կնայենք այդ տարածքը, գույքագրենք, հասկանանք մեր անելիքը, որ կարողանանք առաջ գնալ»,- SHANTNEWS-ին ասել է ՀԷՑ «Ղարս» մասնաճյուղի գլխավոր ճարտարագետ Գրիշա Մարտիրոսյանը:

«Հայաստանի էլեկտրական ցանցեր» ընկերության Ղարս մասնաճյուղի գլխավոր ճարտարագետը նշում է՝ նոր հենասյուները տեղադրել են մալուխային ցանցը դրանց վրա տեղափոխելու համար: Բայց ընթացիկ շահագործման համար հատկացված գումարներով կարողացել են միայն հենասյուները տեղադրել: Ու ժամանակավոր լուծում են գտել, որով հին հենասյուները ապահովագրել են շրջվելուց: Ալավերդյան փողոցում հենասյուները ապահովագրել են ընկնելուց, բայց տարածքում նոր գույքագրում են կատարելու, հասկանալու համար , թե քանի հենասյան փոխարինումն է առաջնային ու ֆինանսական ինչպիսի միջոցներ կպահանջվեն: «Ղարս» մասնաճյուղն այս տարվա ներդրումային ծրագրերով ենթակայանների, մալուխների ու հենասյուների նորացման ցանկը կազմել է: Այդ ցանկում Ալավերդյան փողոցը չկա:

«Ավելի առաջ էլ կային ներդրումներ, բայց վերջին 4-5 տարիների ընթացքում դրանք աննախադեպ են: Տասնյակ անգամ ավելի շատ են: Յուրաքանչյուր տարի, կարելի է ասել, մենք հարյուրավոր հենասյուներ ենք փոխում: Աշխատանքների ծավալը և ներդրումային ծրագրերն այնքան շատ են, որ այդ փողոցը դուրս է մնացել հարցից: Կուսումնասիրենք, եթե հնարավոր լինի մեր միջոցներով փոքր ծավալով աշխատանքներ անել, կանենք, իսկ եթե գլոբալ եղավ, անհրաժեշտ եղավ ենթակայանի, մալուխների փոխարինում, անպայման կմտցնենք ներդրումային ծրագիր: Այս տարի ներդրումային ծրագիրն արդեն հաստատված է: Ցավոք, այդ Ալավերդյան փողոցը չկա ցանկում»,- ասել է Գրիշա Մարտիրոսյանը:

ՀԷՑ-ի ներդրումային ծրագրերը վերջին 3 տարիներին վերաբերում են հիմնականում փողոցաշինական ծրագրին: Նորոգվող փողոցներում մալուխային ցանցն ամբողջությամբ փոխվել է, դարձել ստորգետնյա: Զուգահեռ, այս տարի նաև մի քանի թաղամասերում, որտեղ ենթակայանները հին են, մալուխներն էլ խճճված, նորացման աշխատանքներ են կատարելու:

Մասնագետը չի թաքցնում՝ այդուհանդերձ, անելիքները շատ են, ներդրումային ծրագրերը ոչ բոլոր փողոցներին են հասնում: Ալավերդյան փողոցում խոստանում են առաջիկա օրերին մասնագիտական ուսումնասիրություններ կատարել և ընթացիկ շահագործման ծրագրերով անվտանգություն ապահովել: