Գյումրիում դպրոցներն անցել են հեռավար ուսուցման

Հանրապետությունում հայտարարված արտակարգ դրության ընթացքում փակ կլինեն հանրակրթական, նախադպրոցական, սպորտային, մշակութային կառույցները և բուհերը: Կորոնավիրուսի դեմ պայքարի ժամանակահատվածը կրթության, գիտության, մշակույթի և սպորտի նախարարությունը որոշել է օգտագործել հեռավար ուսուցման համակարգը փորձարկելու համար: Կառավարությունը նախատեսում էր հեռավար ուսուցում ներդնել 2021 թվականի դեկտեմբերին: Համավարակով պայմանավորված հարկադիր պարապուրդն արագացրեց այդ ծրագրերի կիրառումը: Շատ դպրոցներ մինչև նախարարության հրահանգներն ու ցուցումները մարտի 17-ից էին սկսել հեռավար դասերը:

Աշակերտը դասասենյակում, դպրոցական նստարանին, իսկ ուսուցիչը մտնում է դասարան ճիշտ ժամին՝ զանգը հնչելուն պես: Սա դասապրոցեսի դասական մոդելն է, որն առնվազն մինչև ապրիլի 14-ը Հայաստանում կիրառելի չէ: Իսկ ինչ են անելու աշակերտներն ու ուսուցիչները մեկամսյա հարկադիր պարապուրդում: Կրթության, գիտության, մշակույթի ու սպորտի նախարարությունը որոշել է արտակարգ դրության ընթացքում աշակերտների ու ուսուցիչների պարապ ժամանակը լրացնել հեռավար կրթությամբ: Փորձնական ծրագիրը ենթադրում է կրթական ծրագրերի մատուցում հեռուստատեսային ու համացանցային տարբերակով: Այս հնարավորությունն ամբողջ աշխարհի դպրոցներին ընձեռում են հատուկ կրթական հարթակները: Այս մասին երեկ նախարարը հայտարարեց:

Նախարարությունը հեռավար կրթության փորձնական ծրագրի կիրառման ժամկետները արտակարգ դրությունը փոխեց, բայց նախարարն ինքն էլ արձանագրեց, որ որոշ դպրոցներ չեն սպասել իրենց հրահանգներին ու արդեն հեռավար կրթության են անցել: Օրինակ՝ Գյումրիի թիվ 1 ավագ դպրոցը:

Գյումրիի թիվ 1 ավագ դպրոցը տեղափոխվել է տուն: Այս սկզբունքով են ամեն օր աշխատում ուսուցիչներն ու աշակերտները: Ոչինչ չի խանգարում տանը նստած ուսուցչին մատուցել նոր դասը, աշակերտին էլ այն յուրացնել, հարցեր տալ, դասը պատասխանել ու գնահատական ստանալ: Հեռավար ուսում ստացողների հետ մեր շփումն էլ հեռավար էր:

«Դասարանում երևի 1-2 հոգի է լինում բացակա: Սա շատ լավ է, ու բոլորը ոգևորությամբ մասնակցում են: Նույնիսկ կարծիք են հայտնում, որ տարբերություն էլ չտեսան թե իրական շփում կար, թե էկրանից են իրար տեսնում: Նույնիսկ ծիծաղելով ասում են, թե որ այսպես լավ ստացվեց, երեխաները էլ դպրոց չեն գա: Մենք տարբերակ ենք գտել կրթության անընդհատությունն ապահովելու համար»,- SHANTNEWS-ի հետ զրույցում ասել է Գյումրիի թիվ 1 ավագ դպրոցի մանկավարժ Գայանե Ավետիսյանը:

Մաթեմատիկա, քիմիա, ֆիզիկա, բնագիտական առարկաների շարքն է, որոնց ուսուցումը հեռավար կարգով փոքր-ինչ դժվար է: Փորձերը կազմակերպելու մեջ է բարդությունը: Թիվ 1 դպրոցում անգամ ֆիզկուլտուրայի դասերն են հեռավար անցկացնում: Աշակերտների մեծ մասը հեռավար դասապրոցեսին մասնակցում է, թեև ուսուցիչներն են նշում՝ պարտադրել ոչ մեկին էլ չեն կարող:

Հեռավոր գյուղերում տեխնիկական հասանելիության խնդիր կա, նաև նոր տեխնոլոգիաների հետ ավագ սերնդի ուսուցիչների աշխատանքն է ոչ այնքան վարժ: Նախարարությունն ուսուցիչների համար էլի հեռավար վերապատրաստումներ է նախատեսում անցկացնել: Նշում են՝ փորձնական ծրագրով ուսումնական պլանը մասամբ կլրացնեն, բայց ուսումնական տարվա ավարտին միասնական ու ավարտական քննությունների ժամկետները երկարաձգելն անխուսափելի կլինի:

«Մտածում եմ, որ ինչ-որ ժամանակով միասնական ու ավարտական քննությունները կհետաձգվեն, որովհետև ոչ բոլոր աշակերտներն են մասնակցում հեռավար ուսուցմանը: Պատճառները տարբեր են՝ և՛ բոլորին հասանելի չէ, և՛ տեխնիկական հագեցվածությունն է պատճառը: Երիտասարդ ուսուցիչները շատ լավ են տիրապետում հեռավար ուսուցման գործիքներին, իսկ ավագ սերնդի ուսուցիչների հետ, իհարկե, խնդիր կա, բայց  համագործակցելով, իրար հարցնելով կազմակերպում ենք հեռավար ուսուցումը»,- SHANTNEWS-ին ասել է Գյումրիի թիվ 1 ավագ դպրոցի տնօրեն Նաիրա Թադևոսյանը:

Հեռավար դասերը դպրոցներում շարունակվելու են մինչև արտակարգ դրության ավարտը: Իսկ թե ինչքան լրացուցիչ պարապմունքներ են լինելու կամ լինելու են արդյոք և երբ են կազմակերպելու քննությունները, կախված է լինելու հեռավար կրթության արդյունավետությունից: