Արարատի մարզում որոշ ձեռնարկություններ կսկսեն գործել. մարզպետը մանրամասներ է հայտնել SHANTNEWS-ին

Արարատի մարզպետ Գարիկ Սարգսյանն է այսօր SHANTNEWS-ին որոշ պարզաբանումներ տվել մարզում նոր կորոնավիրուսի մասով տիրող իրավիճակի, զարգացումների, ցուցանիշների և ձեռնարկվող քայլերի մասին:

«Այս պահի դրությամբ մարզում ունենք մոտ 200 վարակակիր և 600 ինքնամեկուսացած: Նախորդ շաբաթ ունեինք ավելի մեծ թվով ինքնամեկուսացածներ, որոնցից 400-500-ը մեկուսացումից արդեն դուրս է եկել, որովհետև նրանց մոտ սիմպտոմ չի գրանցվել»,- ասել է մարզպետը:

Ինչ վերաբերում է հանգամանքին, ըստ որի՝ տնտեսական գործունեության որոշ տեսակների նկատմամբ գործող սահմանափակումները հանվել են, որքանով դա կմեծացնի վարակի տարածման վտանգը, նկատել է.

«Այս պահի դրությամբ հիմնականում շինարարության մասով են արգելքները հանված և այն կազմակերպությունների մասով, որոնք շինարարության ոլորտում արտադրանք են տալիս, մասնավորապես՝ ցեմենտի, գաջի արտադրությունը: Մենք ունենք ոսկու գործարան, որը, իհարկե, շինարարության հետ կապ չունի, բայց նրանք նույնպես աշխատում են՝ պահելով բոլոր կանոնները: Գիտեք, մեր մարզում ծխախոտի մեծ գործարան կան, նրանց գործունեությունն ամենասկզբից էլ արգելված չէր, նրանք շարունակում են բնականոն աշխատել:

Մենք ունենք նաև շատ գինու, կոնյակի, օղու արտադրությամբ զբաղվող ձեռնարկություններ, որոնք այս պահին աշխատանքներ չունեն տանելու՝ մթերման սեզոն չէ, նրանց գործունեությունն այս պահին դադարեցված է: Վարակակիրների հետ շփված մեր քաղաքացիների շրջանակը մեզ համար պարզ է: Վերահսկողության տակ են վերցված, մեկուսացած են թե՛ տներում, թե՛ հյուրանոցային համալիրներում, որևէ ռիսկ հետագա տարածման, անկանխատեսելի օջախների, ի հայտ գալու, այս պահին չունենք: Բայց դա մեզ չպետք է հույս տա, որ դուրս գանք մեր տներից, սա շատ ավելի պետք է օգնի, որ տարածող չդառնանք»,- ասել է Գարիկ Սարգսյանը՝ հավելելով, որ, օրինակ՝ Արարատի ցեմենտի գործարանում վարակի խնդիր չի եղել, ավելին, Արարատի շրջանը նոր կորոնավիրուսից ավելի քիչ է տուժել՝ Արտաշատի և Մասիսի շրջանների համեմատությամբ:

Ի դեպ, ըստ մարզպետի, Արարատի մարզում գործում են 8 հսկիչ-անցագրային կետեր:

Գարիկ Սարգսյանի հավաստմամբ՝ գյուղատնտեսական աշխատանքների ընթացքը իրավիճակից չի տուժել:  Ամբողջությամբ ավարտված են ջրատարների և առուների մաքրման աշխատանքները: Մարզը պատրաստ է ոռոգման: Գյուղացիական տնտեսությունների համար խոչընդոտներ չկան: Ցրտահարության հավանականությունն էր մտավախություն առաջացնում, դա էլ թե՛ նախկինում, թե՛ այս գիշեր խնդրահարույց չի եղել:

Ինչ վերաբերում է հանգամանքին, թե որտեղ են բուժում ստանում վարակակիրները: Արտաշատի ԲԿ-ն վերածվել է ինֆեկցիոն կենտրոնի: Ապրիլի մեկից մարզի հիվանդները բուժում են ստանում հենց Արտաշատի հիվանդանոցում:

Մանրամասները՝ հեռախոսազրույցում: