Երեկ կորոնավիրուսից մահացած 64-ամյա կինը գյումրեցի էր

Շիրակի մարզում այսօր հաստատվել է կորոնավիրուսով վարակման ևս 6 դեպք: Ինֆեկցիոն հիվանդանոցում այս պահի դրությամբ բուժում է ստանում 76 քաղաքացի, նրանցից 70-ը Շիրակի մարզի բնակիչներ են: Թվերի աճը, ըստ Շիրակի մարզպետարանի առողջապահության բաժնի պետ Լեյլի Ասլանյանի, պայմանավորված է նաև որոշ սահմանափակումների արգելքների վերացմամբ, ինչի արդյունքում մարդկանց շփումները նախորդ օրերի համեմատ ավելացել են:

«Սահմանափակումները հանվեցին, մենք  սպասում ենք վարակման ու կոնտակտայինների շատ դեպքերի: Մարզում վիճակը վերահսկելի է, դեպքը գրանցվում է, պարզվում են շփման շրջանակները, կոնտակտավորները մեկուսացվում են հյուրանոցում, իսկ  դրական դեպքերը տեղափոխվում և բուժում են ստանում ինֆեկցիոն հիվանդանոցում»,- նշել է Շիրակի մարզպետարանի առողջապահության բաժնի պետ Լեյլի Ասլանյանը:

Ըստ բաժնի պետի` մարզում մինչ օրս առողջացել է 21 քաղաքացի, կրկնակի վարակման դեպքեր չկան, իսկ մեկուսացվածների և բուժում ստացողների մեջ կան և՛ երեխաներ, և՛ երիտասարդներ, բայց գերակշռող են միջին և բարծր տարիքի մարդիկ:

«Մենք մարզում ունենք երկու խոշոր օջախ, մեկը Անիի տարածաշրջանն է, մյուսը՝ Գյումրին։ Արթիկում հաստատված դեպքը, բարեբախտաբար, շարունակություն չունեցավ: Երկու օջախներն էլ վերջնականապես լոկալիզացված չեն, օրինակ՝ երեկ վարակման երկու դրական դեպք ենք ունեցել Անիի տարածաշրջանի Ջրափի և Շիրակավան գյուղերից, իսկ Գյումրիի ամենախոշոր օջախը դա դեղատներից մեկն է, որտեղից շփման շրջանակներից դեռ կոնտակտավորներ են հայտնաբերվում, իսկ եկեղեցու մոմավաճառի  թեստի դրական պատասխանից հետո այլ վարակակիրներ չեն հայտնաբերվել»,- SHANTNEWS.am-ի հետ զրույցում նշել է Լեյլի Ասլանյանը:

Շիրակի մարզպետարանի առողջապահության բաժնի պետի փոխանցմամբ՝ հիմա հյուրանոցում մեկուսացված քաղաքացիների  թեստավորման գործընթացը կատարվում է ավելի հաճախակի և այլ ընթացակարգով, որպեսզի մինչ 14-օրյա մեկուսացման ժամկետի ավարտը հայտնաբերվեն ու  առանձնացվեն դրական դեպքերը:

«Կոնտակտավորների հետ շփված և մեկուսացված քաղաքացիներին հիմա թեստավորում են այլ կերպ: Ճիշտ է, դա կատարում են Հիվանդությունների վերահսկման և կանխարգելման ազգային կենտրոնի Շիրակի մասնաճյուղի աշխատակիցները, և դա ավելի մասնագիտական գործընթաց է, բայց որքան տեղյակ եմ, թեստավորում անցկացնում է երեք օրը մեկ ընդմիջումներով: Սա ավելի արդյունավետ է համարվում և մինչև 14-օրյա ժամկետի ավարտն արդեն դրական դեպքերն առանձնացվում են, և կանխում ենք մյուսների վարակումը»,- ասաց Շիրակի մարզպետարանի առողջապահության բաժնի պետը:

Շիրակի մարզից Ծաղկաձոր տեղափոխված քաղաքացիներ ևս կան, մինչ օրս տեղափոխվել է 23  քաղաքացի, նրանք գտնվում են Ծաղկաձորի հյուրանոցներից մեկում` բուժանձնակազմի հատուկ հսկողության տակ:

«Անախտանիշ ընթացքով 23 հոգի տեղփոխվեցին Ծաղկաձոր, այսինքն՝ նրանք այն քաղաքացիներն են, որոնց թեստավորման պատասխանները եղել են դրական, բայց հիվանդությանը բնորոշ ախտանշաններ չունեն: Այնտեղ նրանց ջերմաչափում են ու հետևում հիվանդության ընթացքին, այդպես մենք նաև բեռնաթափեցինք մեր ինֆեկցիոն հիվանդանոցը՝ տեղ ազատելով միջին և բարդ ընթացք ունեցողների համար»,- նշեց Լեյլի Ասլանյանը:

Գյումրիի ինֆեկցիոն հիվանդանոցը դեռ գերբեռնված չի աշխատում, բայց վարակման դեպքերի թվի աճ եթե լինի, կան նաև մշակված այլ սցենարներ: Շիրակի մարզպետարանի առողջապահության բաժնի պետը նշել է, որ առողջապահության նախարարն ու փոխնախարարը եղել են մարզում, շրջել մի քանի բուժհաստատություններով ու շինություններով, քննարկել հետագա քայլերն ու կառույցները վարակակիրների համար մեկուսարաններ դարձնելու տարբերակները: Քանի որ Գյումրիի ինֆեկցիոն հիվանդանոցը վերակենդանացման բաժանմունք չունի, բոլոր ծանր ընթացքով հիվանդները տեղափոխվում են Երևան:

«19 քաղաքացիներ գտնվում են մայրաքաղաքում, ևս մեկին պատրաստվում ենք այսօր տեղափոխել: Երևանում հատուկ մասնագետներ կան, նրանց հետ քննարկում ենք, որից հետո միայն կազմակերպում ծանր ընթացքով քաղաքացիների տեղափոխումը»,-  SHANTNEWS.am-ի հետ զրույցում նշել է Շիրակի մարզպետարանի առողջապահության բաժնի պետը:

Շիրակի մարզում կորոնավիրուսից մահվան դեպքերը 4-ն են, մահացած չորրորդ քաղաքացին`64-ամյա կինը գյումրեցի էր, նրա աղջիկն այս  պահին բուժում է ստանում ինֆեկցիոն հիվանդանոցում: Շիրակի մարզում մեկուսացման և ինքնամեկուսացման ցուցում ունի 315 քաղաքացի։