Շիրակի մարզի Ջրաձոր գյուղը կվերաբնակեցվի

Կապսի ջրամբարի շինարարությունը սոցիալական, բնակարանաշինական ու բնապահպանական խնդիրներ է առաջացնում հարակից գյուղերի համար… Սա են վկայում ուսումնասիրությունները, որոնք կատարել են ծրագրի փորձագետները: Մասնավորապես, ջրամբարի շինարարությամբ պայմանավորված, Ջրաձոր գյուղը վերաբնակեցվելու է, իսկ Արեգնադեմ, Բյուրակն ու Գտաշեն գյուղերի վարելահողերի մի մասը մնալու է ջրի տակ: Ինչպես է լինելու փոխհատուցման կարգը բնակիչների համար և որոնք են Կապսի ջրամբարի շինարարության դրական ու բացասական հետևանքները… այս մասին Ամասիա խոշորացված համայնքի ներկայացուցիչների հետ հանրային քննարկում են անցկացրել ծրագրի փորձագետները:

Դիմակներով, ձեռնոցներով, ախտահանիչ նյութերով ու իրարից առնվազն մեկուկես մետր հեռավորության վրա…

Կապսի ջրամբարի շինարարության ծրագրի ներկայացուցիչները հանրային քննարկում անցկացնելուց առաջ նախ անվտանգության կանոնների մասին էին մտածել: Ամասիա խոշորացված համայնքի բնակավայրերից ընդհանուր մասնակիցների թիվը չէր գերազանցում 15-ը: Հրավիրել էին այն գյուղերի վարչական ներկայացուցիչներին, որոնց բնակավայրերը Կապսի ջրամբարի շինարարության հետևանքով հողեր ու ենթակառուցվածքներ են կորցնելու:

Ջրաձորը Կապսի ջրամբարին ամենամոտն է: Ջրամբարն առաջին փուլով կառուցվելու է 25 մլն խորանարդ մետր, իսկ գյուղ տանող ճանապարհն ու հողերը կմնան ջրի տակ: Երկրորդ փուլով թողունակությունը նախատեսվում է 60 մլն խորանարդ մետր դարձնել, ինչը նշանակում է, որ գյուղի տարածքն ամբողջությամբ ջրածածկ կլինի: 40 հեկտար տարածք են հատկացրել նոր գյուղ կառուցելու համար: Կառավարությունը Ջրաձորում 28 տուն կառուցելու համար ֆինանսական հատկացում է կատարել: Այն ընտանիքներն են, որոնք համարվում են անօթևան: Գյուղի մյուս բնակիչների վերաբնակեցման հարցը լուծվելու է Կապսի ջրամբարաշինության ծրագրով:

«Ըստ էության, երկու ծրագիր է: 28 տուն անօթևանների բնակարանային ապահովման ծրագրով է, իսկ մյուսներին Կապսի ջրամբարի շինարարությամբ պայմանավորված են փոխհատուցելու: Մենք դիմել ենք կառավարություն, որ այդ երկու ծրագրերը միացնեն, դառնա մեկ ծրագիր, և մեկ ծրագրով կառուցվի գյուղը»,- SHANTNEWS-ին ասել է Ամասիա խոշորացված համայնքի ղեկավար Ջեմմա Հարությունյանը:

Դիմել են կառավարություն երկու ծրագիրը միացնելու և գյուղի վերաբնակեցումը կազմակերպելու համար: Կապսի ջրամբարի շինարարության փորձագետի խոսքեչով՝ այս հարցում տարածքային կառավարման նախարարության հետ համաձայնության են եկել: Համաձայնության են եկել նաև ժամկետների հարցում՝ երկու ծրագրով Ջրաձորում բնակարանաշինությունը համատեղ է սկսվելու: Կապսի ջրամբարի շինարարության տևողությունը հայտնի է, բայց մեկնարկի ժամկետը՝ ոչ:

«Առաջին փուլի շինաշխատանքները գնահատված են մոտավորապես 3 տարի և նախատեսում ենք, որ շինաշխատանքների մեկնարկը կլինի շուտ, այսինքն՝ փորձաքննությունների եզրակացություն ստանալուց հետո սկսվելու է շինմրցույթի գործընթացը: Տեղի է ունեցել քննարկում տարածքային կառավարման նախարարության հետ Ջրաձորում 28 տուն կառուցելու պահով: 28 տների ծրագիրը ներկայացնում է զուտ տների կառուցում, չի նախատեսում գյուղի, ենթակառուցվածքների կառուցում: Մենք արդեն իսկ ձեռք ենք բերել համաձայնություն, որ այս երկու ծրագրերը իրար փոխլրացնեն, չխանգարելով մեկը մյուսին: Թե՛ այս ծրագրով, թե՛ մյուս ծրագրով տները լինեն նույն տիպարային լուծումներով, փոխհատուցումը լինի նույն գումարի սահմաններում»,- ասել է բնապահպանական և սոցիալական ազդեցության գնահատման թիմի ղեկավարի տեղակալ Քրիստինե Սահակյանը:

Այս ընթացքում բնապահպանական ու պատմական հուշարձանների ուսումնասիրություններ են կատարվել ջրամբարի տարածքում: Պարզել են, որ այստեղ ապրում է Կարմիր գրքում գրանցված մեկ կաթնասուն և երկու թռչնատեսակ, ինչպես նաև պատմամշակութային հուշարձան հանդիսացող քարանձավներ կան, որոնց տարածքում փորձագետներն առաջարկում են պեղումներ կատարել, ֆիքսել եղածը։ Հուշարձանները հետո մնալու են ջրի տակ: