Տարածքի ազատման խնդիրը՝ դատական վեճի առարկա Գյումրիի քաղաքապետարանի և սեփականատիրոջ միջև

Գյումրիի Տիգրան Մեծի փողոցում գտնվող տաղավարի տեղափոխման հարցը դարձել է դատական հայցի հիմք: Սեփականատերն ու  քաղաքապետարանը համաձայնության չեն գալիս տարածքի ազատման հարցում: Վիճարկում են այն հողակտորի պատկանելությունը, որի վրա տեղադրված է տաղավարը:

Քաղաքապետարանը համարում է, որ տաղավարը տեղադրված է համայնքապատկան ու ընդհանուր օգտագործման տարածքում՝ մայթի վրա, իսկ սեփականատերը պնդում է, որ տաղավարն ու հողատարածքը միասին աճուրդով 1990-ականներին է գնել ու չի պատրաստվում հեռացնել: Գործի դատական քննությունը հասել է Վերաքննիչ դատարան, որտեղ վճիռը բեկանվել է, ու նոր քննություն է նշանակվել:

Նախկին Լենինի պողոտայի թիվ 11 մթերային խանութն է: Թե երբ է այն այստեղ հայտնվել, ստույգ տարածքի բնակիչներն էլ չգիտեն: Խորհրդային տարիներին մթերային, պտուղ-բանջարեղենի խանութները կառուցվել են մետաղե կոնստրուկցիաներով: 90-ականներին այս շինություններն էլ աճուրդով օտարվեցին: Նախկին Լենինի պողոտայի, այժմ Տիգրան Մեծի փողոցի նախկին խանութը 1995-ին աճուրդով ձեռք է բերել Գյումրիի բնակիչ Արամ Մանուկյանը: Նախ՝ որպես պահեստ, հետո հացի փուռ է ծառայել:

Վերջին տարիներին տարածքը դատարկ է: Բնակիչներն էլ դիմել են քաղաքապետարան ու պահանջել չշահագործվող տաղավարը ապամոնտաժել:

Տարածքն ազատելու պահանջը օրակարգային դարձավ Տիգրան Մեծի փողոցի հիմնանորոգման ժամանակ: Այդ ժամանակ տարածքի սեփականատերը քաղաքապետարանից գրություն է ստացել, որ որտեղ գտնվում է տաղավարը, Հողային օրենսգրքի 60-րդ հոդվածով նախատեսված տարածք է, այսինքն՝ ընդհանուր օգտագործման հողակտոր՝ մայթ ու չի կարող օտարվել, մինչդեռ սեփականատերը համոզված նշում է, որ 1995-ին աճուրդով գնել է տաղավարը հողատարածքի հետ միասին:

«Փաստորեն ես 5 մլն դրամ եմ վճարել շինության համար և լինելով տաղավարի սեփականատերը, ինչպես նաև տակի հողակտորի սեփականատերը, այսօր չեմ կարողանում իրականացնել իմ իրավունքներն ու պարտականությունները: Տաղավարը համապատասխանում է քաղաքաշինական բոլոր նորմերին: Գտնվում է մայթի եզրին և եթե նայենք, տաղավարը հավասար հարթության վրա է բոլոր մյուս շենքերի հետ: Եթե օրենքի խախտում լիներ, պետությունը չէր վաճառի շենքը, այլ կքանդեր: Խնդիրը վերաբերում  էր նրան, որ տաղավարը ոչ թե խանգարում էր շինարարությանը, այլ վերանորոգման առիթը փորձում են օգտագործել՝ հարցն իրենց ուզած ձևով լուծելու»,- այսօր հրավիրած ասուլիսում ասել է սեփականատեր Արամ Մանուկյանը:

Քաղաքապետարանն էլ իր ունեցած փաստաթուղթն է ներկայացնում, համաձայն որի՝ Արամ Մանուկյանը աճուրդով գնել է միայն տաղավարը, ոչ թե հողակտորը, որն օտարման ենթակա չէ: Սեփականատերն էլ իր հերթին է երկու տարբեր փաստաթղթերով ներկայացնում հակասությունը, որը վերաբերում է տվյալ հողակտորի նշանակությանը:

Քաղաքապետարանի գրությամբ տարածքը ընդհանուր օգտագործման գոտի է, իսկ կադաստրով տարածքը հասարակական կառուցապատման համար է նախատեսված: Որտեղի՞ց է հակասությունը, երբ Կադաստրի կոմիտեն, ըստ կարգի, հողատարածքների գործառնական նշանակության մասին տեղեկությունները քաղաքապետարանից է ճշտում: Քաղաքապետարանի իրավաբանական բաժնի պետը բացատրում է՝ հնարավոր է՝ փոփոխություններ են կատարվել, որոնք կադաստրում չեն արտացոլվել: Ամեն դեպքում, հողի նշանակության համար, ըստ նրա, հիմք է ընդունվում բոլորովին այլ փաստաթուղթ:

«Պրակտիկայում նման դեպքեր հանդիպում են: Ամեն դեպքում հիմնարար փաստաթուղթ է համարվում գլխավոր հատակագիծը: Հնարավոր է պատճառներ են եղել, որ համապատասխան փոփոխությունները չեն երևացել կադաստրում, բայց դա չի նշանակում, որ մայթի տարածքը կարող է օտարվել: Հիմք է ընդունվում հատակագիծը, իսկ հատակագծով երևում է, որ մայթ է:

Օտարվել է ընդամենը տաղավարը, ոչ թե տաղավարի զբաղեցրած տարածքը: Սա քաղաքացուն իրավունք չի տալիս ենթադրելու, որ իրեն սեփականության իրավունքով պատկանում է ոչ միայն տաղավարը, այլև հողակտորը»,- SHANTNEWS.am-ին ասել է Գյումրու քաղաքապետարանի իրավաբանական բաժնի պետ Աննա Մանուկյանը:

Գյումրիի գլխավոր հատակագիծը որպես հիմք ներկայացվել է վարչական դատարանում, որտեղ Արամ Մանուկյանը վիճարկել է քաղաքապետարանի գրությունն այն մասին, որ հողատարածքը ընդհանուր օգտագործման է: Դատարանը քաղաքապետարանի գրությունը անվավեր է համարել: Քաղաքապետարանը որոշումը բողոքարկել է Վերաքննիչ դատարանում, վերջինս էլ բեկանել է վարչական դատարանի որոշումը և նորից ուղարկել քննության: Բեկանման հիմքը եղել է այն, որ քաղաքապետարանը չի ներկայացրել դատարանին համապատասխան ապացույցներ:

Հունիսի 30-ին նորից է սկսվելու հայցի քննությունը վարչական դատարանի Գյումրիի նստավայրում, իսկ մայթի ասֆալտապատումը, որին տաղավարը խանգարում էր, կատարվել է: Միայն տաղավարի բոլոր կողմերից մոտ մեկական մետր խճապատ տարածք է մնացել, հավանաբար այն բանի համար, որ հետո, եթե որոշում կայացվի տաղավարը հանելու մասին, ասֆալտը չվնասվի: