«Ոսկե գլոբուս» մրցանակաբաշխություն. հաղթողները և ելույթները

Գիշերը Լոս Անջելեսի «Բևեռլի Հիլթոն» հյուրանոցում տեղի է ունեցել «Ոսկե գլոբուս» 75-րդ մրցանակաբաշխությունը, որը վստահաբար կարող ենք ասել՝ կինոաշխարհի պատմության մեջ դեռ երկար կհիշվի:

Կարմիր գորգն այսքան սև երբևէ չէր եղել: Աստղերը, ինչպես ավելի վաղ խոստացել էին, մրցանակաբաշխությանը եկել էին սևազգեստ՝ այսկերպ արտահայտելով իրենց բողոքը սեռական ոտնձգությունների, բռնության և գենդերային անհավասարության դեմ: Որոշ դերասանուհիներ կարմիր գորգի վրա հայտնվեցին ոչ թե ամուսինների կամ գործընկերների հետ, այլ տարբեր հասարակական կազմակերպությունների ակտիվիստների հետ՝ այդկերպ ցանկանալով ներկայացնել այդ մարդկանց աշխատանքը և պայքարը  խտրականության դեմ:

Նշենք, որ անցած տարվանից համաշխարհային կինոաշխարհում այս թեմաները ամենացավոտներից էին, իսկ հունվարի 1-ից կինոոլորտի կարկառուն դեմքերի նախաձեռնությամբ մեկնարկել է Time’sUp (Ժամանակն է) շարժումը:

Անցնելով բուն մրցանակաբաշխությանը՝ ներկայացնենք  «Ոսկե գլոբուսի» հաղթողների ամբողջական ցուցակը: Այս տարի երեկոյի ֆավորիտները «Երեք պաստառ Էբինգից դուրս, Միսսուրի» (Three Billboards Outside Ebbing, Missouri) ֆիլմն էր՝ հաղթեց միանգամից 4 անվանակարգում  և HBO ալիքով հեռարձակվող «Մեծ Փոքրի սուտ» հեռուստասերիալը, որը հաղթեց 3 անվանակարգում:

Դրամատիկական ժանրում լավագույն ֆիլմ ճանաչվեց «Երեք պաստառ Էբինգից դուրս, Միսսուրի» ֆիլմը:

Ֆիլմում ներկայացվում է հիսունն անց ամուսնալուծված Միլդրես Հեյզի պատմությունը, որը ապրում է Միսսուրիում գտնվող էբինգ փոքրիկ քաղաքում: Նրա դեռահաս աղջիկը մոր հետ թեժ վիճաբանությունից հետո տանից դուրս է գալիս և ժամեր անց աղջկան Էբինգ քաղաքից դուրս բռնաբարված և սպանված են գտնում: Տեղի ոստիկանությունը չի կարողանում գտնել հանցագործին ապացույցների բացակայության պատճառով: Հեյզը Էբինգ քաղաքից դուրս վարձակալում է երեք գովազդային պաստառ, որոնց միջոցով ներկայացնում է իր բողոքը արդարադատության բացակայության դեմ և ոստիկանությանը մեղադրում անգործության մեջ:

Կատակերգություն և մյուզիքլ ժանրում լավագույնն էր «Լեդի Բըրդ» (Lady Bird) ֆիլմը

Գրետա Գերվիգի «Լեդի Բըրդ» տրագիկոմեդիան պատմում է դեռահաս Քրիսթեն Մաք Ֆերսոնի մասին, որը ցանկանում է իր փոքրիկ քաղաքից փախչել Նյու Յորք: Այս ֆիլմում միահյուսվում է մի քանի թեմատիկ գիծ՝ առաջին սեր, իրական ընկերություն և կյանքում նպատակ ունենալու ու իրական տեղը գտնելու ցանկություն:

Գլխավոր հերոսուհուն մարմնավորել է իռլանդացի դերասանուհի Սըրշա Ռոնանը: Այս Ֆիլմը կինոքննադատների կողմից դրական կարծիքներ է ստացել:

«Լավագույն ռեժիսոր» անվանակարգում հաղթել է Գիլյերմո դել Տորոն («Ջրի ուրվագծերը», The Shape of Water):

Ֆանտաստիկ մելոդրաման ավելի վաղ՝ Վենետիկի կինոփառատոնում, ստացել էր գլխավոր մրցանակը՝ «Ոսկե առյուծը», իսկ այժմ ֆիլմը մեքսիկացի ռեժիսորին «Ոսկե գլոբուս» բերեց:

«Դրամատիկ ժանրում լավագույն դերասան» կոչմանն արժանացավ Գարրի Օլդմանը՝ «Մռայլ ժամանակներ» ֆիլմի համար

Այս ֆիլմում Գարրի Օլդմանը պարզապես անճանաչելի է դարձել: Նա մարմնավորել է Ուինսթոն Չերչիլին: Ֆիլմում ներկայացվում է Մեծ Բրիտանիայում և ողջ աշխարհում իրավիճակը Երկրորդ համաշխարհային պատերազմի առաջին ամիսներին:

Իր ելույթում Օլդմանը շնորհակալություն է հայտնել ֆիլմի անձնակազմին և իր կնոջը.

«Շնորհակալ եմ կնոջս համբերատարության համար, քանի որ վերջին շրջանում նա երեկոյան քնում էր Ուինսթոն Չերչիլի հետ և արթնանում Գարրի Օլդմանի կողքին»:

«Դրամատիկ ժանրում լավագույն դերասանուհի» անվանակարգում հաղթող է ճանաչվել Ֆրենսիս Մաք-Դորմանդ «Երեք պաստառ Էբինգից դուրս, Միսսուրի» ֆիլմի համար:

«Կատակերգական ժանրի լավագույն դերասան» է ճանաչվել Ջեյմս Ֆրանկոն «Վատագույն արտիստը» ֆիլմի համար

Ֆիլմում պատմվում է երբևէ նկարահանված վատագույն «Սենյակ» ֆիլմի և դրա էսքցենտրիկ ռեժիսոր Թոմի Վայսոյի մասին:

«Կատակերգական ժանրի լավագույն դերասանուհին» է Սըրշա Ռոնան («Լեդի Բըրդ»):

«Երկրորդ պլանի լավագույն դերասան» է ճանաչվել Սեմ Ռոքուելը «Երեք պաստառ Էբինգից դուրս, Միսուրի» ֆիլմում ոստիկանի մարմնավորելու համար:

«Երկրորդ պլանի լավագույն դերասանուհին» Էլիսոն Ջեննին է «Ես Տոնյան եմ» սկանդալային գեղասահորդուհու մասին պատմող ֆիլմում հերոսուհուն մարմնավորելու համար:

«Լավագույն սցենար» անվանակարգում հաղթել է «Երեք պաստառ Էբինգից դուրս, Միսուրի» ֆիլմը

«Լավագույն օտարալեզու ֆիլմ» անվանակարգում հաղթել է Ֆաթիհ Աքինի «Ստվերում» գերմանական արտադրության ֆիլմը, որում ներկայացվում են ահաբեկչության հետևանքով ընտանիքը կորցրած գերմանացի կնոջ ապրումները: Գլխավոր հերոսուհուն մարմնավորում է Դայան Կրյուգերը:

«Լավագույն երգ» անվանակարգում հաղթել է This Is Me-ն («Մեծագույն շոումեն»):

«Լավագույն անիմացիոն ֆիլմ» է ճանաչվել «Կոկոյի գաղտնիքը»:

«Դրամատիկական ժանրի լավագույն սերիալ» է ճանաչվել «Սպասուհու պատմությունները» (The Handmaid’s Tale)

«Կատակերգական ժանրի լավագույն սերիալ» է ճանաչվել «Զարմանալի միսիս Մեյզելը» (The Marvelous Mrs. Maisel)

«Լավագույն մինի սերիալ» է ճանաչվել «Մեծ փոքր սուտ»-ը (Big Little Lies)

«Դրամատիկական ժանրում սերիալի լավագույն դերասան» է ճանաչվել Սթեռլինգ Բրաունը «Սա մենք ենք» (This Is Us) ֆիլմի համար

«Սերիալի լավագույն դերասանուհի» է ճանաչվել- Էլիզաբեթ Մոսս՝«Սպասուհու պատմությունները» (The Handmaid’s Tale)

«Կատակերգական ժանրի սերիալի լավագույն դերասան» է ճանաչվել Ազիզ Անսարին «Ոչնչի վարպետ» (Master of None) ֆիլմում

Սեսիլ Բլաունտ դե Միլլի անվան պատվավոր մրցանակն շնորհվել է հաղորդավարուհի Օփրա Ունիֆրիին: Այս մրցանակը սահմանվել է 1952 թվականից և ամեն տարի «Ոսկե գլոբուսին» այն հանձնում են կինոյում ունեցած նշանակալի ավանդի համար:

Երեկոյի ընթացքում բազմաթիվ ելույթներ եղան սեռական ոտնձգությունների, խտրականությունների թեմայով, բայց Օփրա Ուինֆրիի ելույթն ամենաերկարն էր ու ազդեցիկը: Դահլիճը հոտնկայս դիմավորեց և ճանապարհեց հաղորդավարուհուն: