Գյումրիի Վ. Աճեմյանի անվան դրամատիկական թատրոնում նկարահանվում են ազգային 20 հեքիաթների հեռուստատեսային տարբերակները

Համավարակն ու դրանով պայմանավորված սահմանափակումները մշակութային օջախներին, ստեղծագործական կենտրոններին մղեցին նոր՝ այլընտրանքային նախագծերի ու մտահղացումների։ Գյումրիի թատրոնում նկարահանվում են հայ գրողների հայտնի ու սիրված հեքիաթների հեռուստատեսային տարբերակները։

Նախագիծն իրականացվում է Կրթության, գիտության, մշակույթի և սպորտի նախարարության պատվերով։ Կարճամետրաժ ֆիլմերն առաջիկայում կցուցադրվեն օնլայն հարթակում ու հեռուստաեթերում։ Նկարահանվող 20 հեքիաթներից մի քանիսը թատրոնի խաղացանկից են, իսկ նոր բեմադրությունները կատարվել են հայկական առակների ու խրատական պատմությունների հիման վրա։

Գյումրիի թատրոնի դերասանուհի Դիանա Մացոյանը դիմահարդարման սենյակում հայելու առջև կրկնում է իրեն վստահված հեքիաթի կերպարի խոսքերը, վարսահարդարն ու դիմահարդարը խոզուկի կերպարն են ամբողջացնում։ Քիչ անց սկսվելու են «Երեք խոզուկները»  հեքիաթի նկարահանումները։ Անցած օրերին դերասանուհին այլ հետաքրքիր կերպարներում է հանդես եկել:

«Առաջին օրը նկարահանվեցի Հովհաննես Թումանյանի «Բարեկենդանը» հեքիաթում, շաշ կինն էի, արդեն դա նկարել ենք, հետո գորտուկ եմ խաղացել, Այգեկցու առակներից «Արդար դատավորում» չար կին էի խաղում, ինձ մնացել է մենակ Նուֆ-Նուֆի կերպարը «Երեք խոզուկները» հեքիաթում», -նշել է դերասանուհին:

Դերասան Արսեն Սաղաթելյանին հեքիաթների շարքում ևս մի քանի դերեր են վստահված։ Հանդիսատեսին ծանոթ ու անծանոթ բեմադրությունների էկրանավորումը հետաքրքիր պրոցես է բոլոր դերակատարների համար։

«Թատրոնն էլ իր մեթոդներն ունի բուժելու, և էսօր փորձում ենք ինչ-ինչ ծրագրեր իրականացնելով ու կյանքի կոչելով՝ մարդկանց հնարավորինս մոտ պահենք թատրոնին»,-ասել է Արսեն Սաղաթելյանը։

«Դերասանի համար միշտ հետաքրքիր է խաղալ մանկական ներկայացումներում, որովհետև պատասխանատվությունը շատ մեծ է, այսինքն, եթե մեծերին դու կարող ես համոզել էմոցիայի ու հուզականության միջոցով, ապա երեխաներին դու պիտի համոզես քո իրական լինելով»,-իր զգացողություններով է կիսվել երիտասարդ դերասան Սարգիս Ղարիբյանը:

Երիտասարդ դերասան Սարգիս Ղարիբյանը մարմնավորում է «Սուտասանը» հեքիաթի դերձակին: Թատրոնի հանդերձարանում իր  կերպարի վերջին դետալներն է ավելացնում: Թատրոնի ստեղծագործական խումբը խոստանում է երեխաներին հեքիաթների նոր ու ժամանակակից լուծումներով գունեղ ֆիլմեր։

«Եթե հիշում եք՝ մեր մանկության տարիներին կար մի հետաքրքիր հաղորդում, որը «Բարի գիշերն» էր, երբ մեզ հյուր էր գալիս Նոնա մորաքույրը: Ֆորմատով մեր նախագիծը նոր է, այսինքն՝ փոքր-ինչ ավելի փոփոխված։ Լինելու է շատ հետաքրքիր 20 հաղորդում, որի հիմնական հասցեատերը լինելու են մանուկները»,-նշում է Գյումրիի Վարդան Աճեմյանի անվան դրամատիկական թատրոնի տնօրեն Լյուդվիգ Հարությունյանը:

«Քո հեքիաթը» ․․․ այսպես է կոչվում նախագիծը, որի շրջանակներում հայ գրողների հայտնի ու սիրված հեքիաթներից բացի, նկարահանվում են նաև Մխիթար Գոշի, Վարդան Այգեկցու առակների հիման վրա բեմադրված խրատական ներկայացումներ:

«Ազգայինի վրա ենք առաջին հերթին շեշտը դրված, մեր ազգային հեքիաթներն են լինելու, նաև Այգեկցու, Գոշի առակները, որտեղ կա բարություն, սեր, որտեղ կա մանկական երազանք, տրամադրություն»,-ասում է Լյուդվիգ Հարությունյանը:

Կարճամետրաժ ֆիլմերի նկարահանումները տեղի են ունենում աճեմյանական բեմում, որտեղ հայկական հեքիաթների միջավայր ստեղծելու համար լուսային էֆեկտներից բացի, օգտագործվում են նաև շարժական ու բնականին շատ մոտ դեկորներ: Սցենարային փոփոխություններ գրեթե չեն եղել, միայն թե մասսայական տեսարաններն են նվազագույնի հասցրել։

«Քո հեքիաթը» նախագծից հետո աճեմյանցիները ծրագրում են ևս մեկ նոր մանկական ներկայացում խաղալ բացօթյա տարածքում: Առաջարկել են, սպասում են թույլտվության։ Թատերական փառատոն անցկացնելու նախագիծը ևս ուժի մեջ է, որը նախատեսվում  է անցկացնել Գյումրիում՝ կրկին բացօթյա։

Արտակարգ դրության սահմանափակումները հանդիսատեսի հետ հանդիպումներն ընդհատեցին, մարդիկ անցած 5 ամիսների ընթացքում հին ու նոր ներկայացումներին հետևելու հնարավորությունունեցել են միայն առցանց տիրույթում: Այդ հարթակում են շուտով ցուցադրվելու նկարահանվող 20 հեքիաթները։ Հայկական բառ ու բանով համեմված փոքրիկ ներկայացումները հետագայում կլինեն նաև հեռուստաէկրաններին։