Գյումրեցի տիկնիկագործ Նարինե Մինասյանը պատրաստում է ազգային ու ինտերիերային էկո տիկնիկներ

Թե ինչպես մանկական նախասիրությունը  հասուն տարիքում կարող է  դառնալ մասնագիտություն։ Մեր ակնարկի հերոսն օրինակներից մեկն է ,որին հաջողվել է մանկության խաղը վերածել բիզնես-գաղափարի։ Մանկության տարիների  հավատարիմ խաղընկերները , որոնք անշունչ տիկնիկներն են եղել ,գյումրեցի Նարինե Մինասյանին  ստեղծագործելու , նոր մասնագիտություն ձեռք բերելու  առիթ են  տվել։

Նարինեն իր տան փոքրիկ արհեստանոցում  ձեռագործ  տիկնիկներ է  պատրաստում ,որոնք  հրապուրում են  ոչ միայն տիկնիկային թատրոնի հերոսներով  ու գունեղ տիկնիկներով  տարված երեխաներին։

Մանկության տարիներին բոլոր աղջիկ երեխաների անբաժան զրուցակիցն ու խաղընկերը լինում են տիկնիկները ։ Ամենասիրելի կերպարներին 30 տարուց ավելի  է պահում է։ Հենց այդ  մանկական տարիների հետաքրքրություններն  էլ տարիներ անց  Նարինեի մոտ դարձան  յուրահատուկ  տիկնիկներ պատրաստելու գաղափար:Բանկային ոլորտի նախկին մասնագետը գործի դրեց կար ու ձևի իր հմտություններն ու ստեղծեց  իր հեղինակայն տիկնիկների առաջին օրինակները:

«Ես սկսեցի արդեն երևակայել ու իմը  ներդնել  տիկնիկների մեջ,այսինքն ստեղծել իմը՝ իմ պատկերացրած կերպարներով,հագուստներով և գույներով»,-նշում է Նարինեն ։

Ստեղծարար շնորհները առարկայացնելու  առիթ  են շրջապատում ապրող մարդիկ, կենդանիներն ու անգամ ամսագրերում պատկերված կերպարները,բայց  տիկնիկագործի յուրօրինակ  ստեղծագործությունները ծնվում են  հեքիաթներ ընթերցելու ժամանակ:

«Հեքիաթների կերպարներով եմ  շատ ոգևորվում ու էդ հեքիաթների կերպարները օգնում են,որ տիկնիկները ստեղծելիս  ներթափանցեմ այդ կերպարի մեջ,իրեն  ինչ որ բնորոշիչ գիծ փոխանցեմ»,-ասում է գյումրեցի տիկնիկագործը։

Գունեղ ու  էկոլոգիապես մաքուր տիկնիկներ պատրաստելիս կարևոր է   բնական  հումքի , կտորի  ընտրությունը։ Տիկնիկների ընտրանիում  հատուկ շարք ունի հայկական մոտիվներով ու կերպարներով ։ Նախապես ուսումնասիրում է  հայկական բնակավայրերին բնորոշ  հագ ու կապի առանձնահատկությունները , ազգային  կերպարներ ստեղծելիս  այցելում է թանգարաններ։

Տարազով  հագուստների վրա Նարինեն մանրանկարչությանը բնորոշ ասեղնագործ աշխատանք է  կատարում, ընդգծում հայկական զարդանախշերով։Ներկայացնում է նաև իր աշխատատանքի դժվարությունները․

«Տարազային հագուստները ես  ամբողջությամբ փորձում են ձեռքով պատրաստել և ինքնուրույն,ինչ որ հատվածներ Մարաշի  ասեղնագործությունից եմ վերցրել,փորձել եմ բնօրինակին նմանեցնել,կան նաև խաչկարազարդ հագուստներ։Մանրակրկիտ աշխատանք է պահանջում հայկական տարազներով փոքրիկ հագուստներ  կարելը »։

Հեքիաթին ու տիկնիկների հավատարմությանն հավատացող տիկնիկագործը երեխաների համար  ստեղծում է  բնական ու համոզիչ կերպարներ: Նարինեն  նոր տեխնոլոգիայով ստեղծում է նաև ինտերիերային տիկնիկներ:Դրանք  խաղալու համար չեն , այլ գեղեցիկ ու նուրբ հուշանվերներ են ։

«Նոր տիկնիկներս արտաքնապես նման են մարմարի,բայց իրականում  հումքը ավանդական ,հասարակ բիազն է,բամբակյա կտորը , որոնք հատուկ  մշակում անցնելուց  և երանգավորվելուց հետո  ստանում են տարբերվող ու առանձնահատուկ տեսք»,- պատմում է տիկնիկագործը։Նարինեն երազում է մեծ արհեստանոց ունենալու մասին,  առաջիկայում կներկայացնի  հայտնի նկարիչների մոտիվներով  նոր տիկնիկներ։ Առաջին համագործակցությունը  եղել է Մարիամ և Երանուհի Ասլամասյան քույրերի պատկերասրահի  հետ։