Գյումրիի սելեկցիոն կայանում առաջին անգամ փորձարկել են կարտոֆիլի 16 տեսակի սորտեր

Գյումրիի սելեկցիոն կայանում գյուղատնտեսներին և հողագործներին է ներկայացվել  աճեցված կարտոֆիլի նոր սերմատեսակներ, որոնք ներկրվել են Ռուսաստանից ու հարմարեցվել են տեղի բնակլիմայական պայմաններին։

16 տեսակի կարտոֆիլի սերմացուների մեծ մասը վաղահաս է, հիմնականում նախատեսված է Արարատյան  դաշտավայրի և Արմավիրի մարզի պահանջարկը բավարարելու համար, մի քանի տեսակներն էլ նախատեսված են մարզի լեռնային ու անջրդի պայմաններում մշակելու համար։

Գյումրիի սելեկցիոն կայանի մասնագետը ներկայացրեց առաջին անգամ փորձամարգերում աճեցված Բրուկ տեսակի կարտոֆիլի սերմացուն։ Միջահաս ամերիկյան կարտոֆիլի սորտի վեգետացիան հարմարեցված է մարզի լեռնային ու բարձր լեռնային բնակլիմայական պայմաններին։ Ունի բարձր բերքատվություն, իսկ պարունակող օսլայի քանակը ամենաշատն է։

Միջահաս և ուշահաս սորտերից բացի սելեկցիոն կայանի դաշտերում մասնագետները աճեցրել են վաղահաս և գերվաղահաս տեսակի կարտոֆիլներ։ Հարթավայրային հողերում դրանք տարեկան երկու անգամ բերքատվություն կարող են ապահովել, իսկ լեռնային բնակավայրերում դեռ փորձարկման փուլում է։

Հայաստանում վաղահաս կարտոֆիլի պահանջարկը մեծ է, իսկ սերմարտադրություն չի եղել կամ կազմակերպվել է փոքր ծավալներով, ինչն էլ պահանջարկը չի բավարարել։ Սելեկցիոն կայանում հացահատիկային մշակաբույսերից բացի առաջին անգամ կարտոֆիլի նոր սորտերի փորձարկման դրական արդյունքները հիմք են տալիս մասնագետներին հաջորդ տարի ցանքատարածքներն ընդլայնելու համար։  «Ընդհանուր ծրագրի նպատակն է էս կարտոֆիլի սերմերի համակարգված արտադրություն սկսել, այսինքն՝ էս փորձերի արդյունքում ընտրելու ենք 5-6 սորտեր, որոնք ամեն տարի լինելու են մեր արտադրության ցիկլի մեջ։ Կան սերմացուի տեսակներ, որ մեկ հեկտարի կամար պահանջվում է 2,5 տոննա սերմացու, իսկ  ակնկալվող բերքատվությունը կլինի 40 տոննա»,- նշեց Գյումրիի սելեկցիոն կայանի տնօրենի պաշտոնակատար Դավիթ Մարտիրոսյանը։

Այս տարի մարզում ամենաշատ կարտոֆիլի ցանքերը՝ մոտ 700 հեկտար մշակվել է Ազատանում։ Գյուղի հողատարածքները մարզում համարվում են կարտոֆիլագործության համար բերքառատ։ Իսկ սելեկցիոնի նոր սորտերը կարող են փորձարկվել նաև անմշակ, բարձրադիր ու անջրդի տարածքների հողերում։ «Կարելի է անջրդի պայմաններում աճեցնել կարտոֆիլը և դա կնպաստի մեր երկրում չմշակվող հողերի լիարժեք մշակությանը, որովհետև մեր երկրում ունեցած վարելահողերի գրեթե 40-45 տոկոսը էսօր չի մշակվում»,- ասաց Ազատան համայնքի ղեկավար Վարդան Իկիլիկյանը։

Գյումրիի սելեկցիոն կայանը մեկ-երկու տարի անց արդեն կունենա բավարար քանակի կարտոֆիլի տեղայնացված  սերմացուներ։ Ֆերմերային տնտեսություններին և գյուղացիներին սորտերն առաջարկելուց բացի մասնագետները կուղղորդեն, թե ինչպես է պետք օրգանական պարարտանյութերով մշակել դրանք, իսկ կարկտահարություններից վնասվելու դեպքում բույսի արագ վերականգնման ինչպիսի տեխնոլոգիա կիրառել։